ఇన్ఫోసిస్ సీఈవోకు భారీ ప్రోత్సాహకం, రూ.3.25 కోట్ల స్టాక్ ఇన్సెంటివ్స్

సాఫ్టువేర్ దిగ్గజం ఇన్ఫోసిస్ కంపెనీ సీఈవో సలీల్ పరేఖ్‌కు ఈ సంస్థ బారీ ప్రోత్సాహకాలు ప్రకటించింది. దాదాపు రూ.3.25 కోట్ల విలువైన షేర్లను కేటాయించింది. 2015లో ఇన్సెంటివ్ కాంపన్సేషన్ ప్లాన్ కింద వీటిని కేటాయించింది. ప్రస్తుతం కంపెనీకి ఉన్న రిస్ట్రిక్టెడ్ స్టాక్ యూనిట్ (RSU) నుండి వీటిని కేటాయించింది. కంపెనీ చీఫ్ ఆపరేటింగ్ ఆఫీసర్ ప్రవీణ్ రావుకు 58,650 RSU వాటాను కేటాయించింది.

అయిదుగురికి..

ఇన్ఫోసిస్ సీఈవో సలీల్ పరేఖ్‌కు రూ.3.25 కోట్ల విలువైన షేర్లను, కంపెనీ చీఫ్ ఆపరేటింగ్ ఆఫీసర్ ప్రవీణ్ రావుకు 58,650 RSU వాటాలను కేటాయించినట్లు కంపెనీ తన రెగ్యులేటరీ ఫైలింగ్‌లో తెలిపింది. ఇన్సెంటివ్ కాంపన్సేషన్ ప్లాన్ కింద మొత్తం అయిదుగురు కీలక వ్యక్తులకు 3,53,270 RSUలను కేటాయించింది. వీటికి కనీసం నాలుగేళ్ల వెస్టింగ్ పీరియడ్ ఉంటుంది.

మరో ఆరుగురికి PSU

ఎక్స్‌పాండింగ్ స్టాక్ ఓనర్‌షిప్ ప్రోగ్రాం 2019 ప్రకారం ఆరుగురు కీలక వ్యక్తులకు 1,69,000 ప్రిఫరెన్షియల్ స్టాక్స్ యూనిట్ (PSU)లను కేటాయించింది ఇన్ఫోసిస్. అర్హత ఉన్న మరో 411 మందికి 17,76,500 PSUలను కేటాయించింది.

371 మంది అర్హత కలిగిన ఉద్యోగులకు..

RSU స్కీం కింద మొత్తం 371 అర్హత కలిగిన ఉద్యోగులకు 1,487,150 RSUలు కేటాయించినట్లు ఫైలింగ్‌లో ఇన్ఫోసిస్ తెలిపింది. కంపెనీ పర్ఫార్మెన్స్ ప్రోగ్రాం కింద పనితీరు ఆధారంగా షేర్లు కేటాయిస్తారు. స్టాక్ ఇన్సెంటివ్స్‌ను ఫిబ్రవరి 27, 2020 తేదీతో అందించింది.