బంగారాన్ని CPI నుండి తొలగిస్తే ద్రవ్యోల్బణం పూర్తిగా అదుపులోకి.. SBI రీసెర్చ్ సంచలన నివేదిక ఇదిగో..

భారతదేశ రిటైల్ ద్రవ్యోల్బణంపై స్టేట్ బ్యాంక్ ఆఫ్ ఇండియా (SBI) రీసెర్చ్ విడుదల చేసిన తాజా నివేదిక దేశ ఆర్థిక పరిస్థితిపై ఒక ఆసక్తికరమైన అంశాన్ని బయటపెట్టింది. బంగారం ధరలను వినియోగదారుల ధరల సూచిక (CPI) గణన నుండి తొలగిస్తే, రాబోయే రెండు నెలల్లో దేశ ద్రవ్యోల్బణం పూర్తిగా ప్రతికూలంగా ఉండే అవకాశం ఉందని ఈ నివేదిక తెలిపింది. ఇది భారత ఆర్థిక వ్యవస్థలో చాలా అరుదుగా కనిపించే పరిస్థితిగా చెప్పుకోవచ్చు.

అక్టోబర్ నెలలో CPI ద్రవ్యోల్బణం 0.25 శాతం వద్ద నమోదైంది. ఇది ఇప్పటివరకు నమోదైన అత్యల్ప స్థాయిలలో ఒకటి. ఈ తగ్గుదల ప్రధానంగా కూరగాయలు, పప్పుధాన్యాలు, పండ్లు, సుగంధ ద్రవ్యాలు, తినదగిన నూనెలు వంటి ఆహార వస్తువుల ధరలు క్రమంగా పడిపోవడం ద్వారా వచ్చింది. దేశవ్యాప్తంగా సరఫరా వ్యవస్థలు మెరుగుపడటం, వ్యవసాయ ఉత్పత్తులు ప్రబలంగా అందుబాటులో ఉండటం ఈ ధరల తగ్గుదలకు తోడ్పడ్డాయి.

ఈ ద్రవ్యోల్బణ గణాంకాల్లో అత్యంత ఆసక్తికరమైన అంశం బంగారం ధరల పెరుగుదల. బంగారంపై భారతీయుల పెట్టుబడి సంప్రదాయం ఎప్పుడూ బలంగానే ఉంటుంది. ఈసారి వ్యక్తిగత సంరక్షణ, దాని ప్రభావం విభాగంలో ద్రవ్యోల్బణం 57.8 శాతం పెరగడంలో బంగారం ధరల భారీ పెరుగుదలే ప్రధాన కారణంగా SBI పేర్కొంది. కానీ బంగారం ప్రభావాన్ని తొలగిస్తే, అక్టోబర్ నెల CPI గణాంకం -0.57 శాతానికి పడిపోతుంది. అంటే బంగారం లేకుండా చూస్తే, దేశం డిఫ్లేషన్ దిశగా వెళ్లే పరిస్థితి ఉంది. కోర్ CPI కూడా దాదాపు స్థిరంగానే కనిపించింది. కానీ బంగారం లేకపోతే ఇది 2.6 శాతం వరకు తగ్గినట్లు SBI విశ్లేషించింది.

ఇందులో రాష్ట్రాల వారీగా ద్రవ్యోల్బణ పరిస్థితులు చాలా అసమానంగా ఉన్నాయనేది మరో ముఖ్యమైన విషయం. కేరళలో ద్రవ్యోల్బణం 8.56 శాతం వద్ద అత్యధికంగా నమోదైనప్పటికీ, జమ్మూ & కాశ్మీర్, కర్ణాటక రాష్ట్రాల్లో ద్రవ్యోల్బణం 3 శాతం కంటే తక్కువగా ఉంది. మొత్తం 22 రాష్ట్రాల్లో 12 రాష్ట్రాలు ప్రతికూల ద్రవ్యోల్బణాన్ని చూస్తున్నాయి. మిగిలిన రాష్ట్రాల్లో కూడా అది చాలా తక్కువ స్థాయిలోనే ఉంది. ఇది భారత ఆర్థిక వ్యవస్థలో ప్రాంతాల మధ్య వ్యత్యాసాలు ఎంతగా పెరిగాయో సూచిస్తుంది.

ఇలాంటి తక్కువ Inflation రిజర్వ్ బ్యాంక్ ఆఫ్ ఇండియా (RBI)కి ఒక పెద్ద విధాన సవాలుగా నిలుస్తోంది. ఎందుకంటే ప్రస్తుతం దేశ GDP వృద్ధి 7 శాతానికి పైగా ఉంది. బలమైన వృద్ధి, అత్యల్ప ద్రవ్యోల్బణం ఒకేసారి ఉండటం అరుదైన సంఘటన. డిసెంబర్ నెలలో జరగబోయే ద్రవ్య విధాన సమీక్షలో RBI ద్రవ్యోల్బణ నియంత్రణ, ఆర్థిక వృద్ధి మధ్య సున్నితమైన సమతుల్యతను సాధించాల్సి ఉంటుంది. అదనంగా GST రేట్ల హేతుబద్ధీకరణ వలన అంచనాలకు మించి ద్రవ్యోల్బణం తగ్గింది. ఇది RBI నిర్ణయాలను మరింత క్లిష్టతరం చేస్తుంది.

తెలుగు రాష్ట్రాల్లో బంగారం ధరలు ఇవే..

SBI నివేదిక ప్రకారం అక్టోబర్ సమీక్షలో RBI ఇప్పటికే "స్థితి యథాతథం" వ్యూహాన్ని అనుసరించడం వలన భవిష్యత్‌లో వడ్డీ రేట్ల కోతలకు పెద్దగా అవకాశం లేదు. నవంబర్-డిసెంబర్ CPI గణాంకాలు, Q3 GDP వివరాలు, త్వరలో రానున్న కొత్త CPI సిరీస్ (base year revised) RBIకోసం కీలక ఫ్యాక్టర్లు అవుతాయి. FY27 నాటికి CPI మళ్లీ కూడా స్థిరంగా ఉండే అవకాశమున్నందున, తక్కువ ద్రవ్యోల్బణం, బలమైన వృద్ధి అనే రెండు విభిన్న దిశల్లో ఉన్న అంశాలను RBI సమతూకంలో ఉంచాల్సిన కఠిన పరిస్థితి ఎదురవుతోంది.