Q3 results: Q3లో భారీగా వెనకేసిన ఎయిర్‌లైన్‌.. 100 శాతానికి పైగా పెరిగిన నికర లాభం

Indigo News: దేశీయ విమానయాన రంగం శరవేగంగా వృద్ధి చెందుతోంది. దీంతో ఆయా ఎయిర్‌లైన్స్ మంచి లాభాలను పోస్ట్ చేస్తున్నాయి. ఈ రంగంలోని ప్రముఖ ప్లేయర్ ఇండిగో కూడా మూడవ త్రైమాసికంలో సత్తా చాటింది.

భారతదేశపు అతిపెద్ద బడ్జెట్ ఎయిర్‌లైన్ ఇండిగో.. డిసంబరుతో ముగిసిన తన త్రైమాసిక ఫలితాలను ఇవాళ ప్రకటించింది. దాని మాతృ సంస్థ ఇంటర్‌గ్లోబ్ ఏవియేషన్ లిమిటెడ్ నికర లాభం 111 శాతం మేర భారీ వృద్ధి నమోదు చేసినట్లు తెలిపింది. విమాన ప్రయాణానికి పెరిగిన నిరంతర డిమాండ్ మరియు అక్టోబర్‌లో ప్రవేశపెట్టిన ఇంధన సర్‌ఛార్జ్‌ సత్ఫలితాలను ఇచ్చినట్లు వెల్లడించింది.

ఇండిగో మొత్తం ఆదాయం 15 వేల 410 కోట్ల నుంచి 20 వేల 062 కోట్లకు పెరిగనట్లు సంస్థ పేర్కొంది. తద్వారా 30 శాతం వృద్ధి కనిపించిందని వివరించింది. గతంలోని 1,422 కోట్ల నుంచి నికర లాభం 2,998 కోట్లకు చేరినట్లు ఎక్స్ఛేంజీలకు తెలిపింది. ఈ త్రైమాసికంలో 62.1 శాతం మార్కెట్ వాటాను కలిగి 243.10 లక్షల మంది ప్రయాణికులను గమ్యస్థానానికి చేర్చినట్లు రిపోర్ట్ చేసింది.

ఏడాది క్రితం ఇండిగో 199.70 లక్షల మంది ప్రయాణికులను తీసుకువెళ్లి 55.7 శాతం మార్కెట్ వాటాను సాధించింది. దీంతో కరోనా ముందు సంవత్సరం 2019 అక్టోబర్-డిసెంబర్ త్రైమాసికంలోని 181.82 లక్షల మందితో 47.5 శాతంగా ఉన్న మార్క్‌ షేర్‌ను అధిగమించింది. మునుపటి రెండు క్వార్టర్స్‌లోనూ అంతకంతకూ లాభాలను పెంచుకుంటూ పోయింది. తద్వారా మార్కెట్ అంచనాలను అధిగమించగలిగింది.