Indigo: ఇండిగో సీఈఓ రాజీనామా.. తర్వాతి బాధ్యతలు ఎవరు చేపట్టబోతున్నారంటే..

భారతదేశంలోనే అతిపెద్ద ప్రయాణికుల విమానయాన సంస్థ ఇండిగో ముఖ్య కార్యనిర్వహణాధికారి (CEO) పీటర్ ఎల్బర్స్‌ తన పదవికి అనూహ్యంగా రాజీనామా చేశారు. వెంటనే పదవి నుంచి వైదొలగుతున్నట్లు ప్రకటించిన ఆయన, తన నోటీస్ కాలాన్ని రద్దు చేయాలని కోరుతూ సమర్పించిన రాజీనామా లేఖ పరిశ్రమ వర్గాల్లో తీవ్ర చర్చనీయాంశంగా మారింది.

భారత విమానయాన రంగం వేగంగా విస్తరిస్తున్నప్పటికీ, ఇండిగో, ఎయిర్ ఇండియా, స్పైస్‌జెట్ వంటి ప్రధాన విమానయాన సంస్థలు వరుసగా వివిధ సవాళ్లను ఎదుర్కొంటున్నాయి. కొత్త ప్రభుత్వ నిబంధనలు, ఇరాన్ ద్వారా పెరుగుతున్న ముడి చమురు ధరలు ఈ రంగం లాభదాయకతపై తీవ్ర ప్రభావం చూపుతున్నాయి.

ఈ పరిణామాల నేపథ్యంలో, ఇండిగోను నిర్వహిస్తున్న మాతృ సంస్థ ఇంటర్‌గ్లోబ్ ఏవియేషన్ లిమిటెడ్ (InterGlobe Aviation Ltd) నేడు సాయంత్రం స్టాక్ ఎక్స్ఛేంజ్‌కు అధికారికంగా ప్రకటన విడుదల చేసింది. పీటర్ ఎల్బర్స్‌ రాజీనామాను ధృవీకరిస్తూ, సంస్థ మేనేజింగ్ డైరెక్టర్ రాహుల్ భాటియా తాత్కాలికంగా CEO బాధ్యతలను స్వీకరించి, అన్ని కార్యకలాపాలను పర్యవేక్షిస్తారని స్పష్టం చేసింది.

తన రాజీనామా లేఖలో ఎల్బర్స్‌ వ్యక్తిగత కారణాలను పేర్కొన్నారు. నోటీసు కాలాన్ని మినహాయింపునివ్వాలని కోరడం పలువురి దృష్టిని ఆకర్షించింది. నేడు ట్రేడింగ్ ముగిసే సరికి, ఇండిగో షేర్లు 3.46 శాతం వృద్ధితో ₹4383 వద్ద ముగిశాయి. అయితే, 2026 ప్రారంభం నుండి చూస్తే ఈ స్టాక్ విలువ ఇప్పటికే 14.23 శాతం క్షీణించింది.

మార్చి 10న జరిగిన బోర్డు సమావేశంలో, ఇండిగో పీటర్ ఎల్బర్స్‌ రాజీనామాను ఆమోదించింది. కంపెనీ ఇటీవల ఎదుర్కొన్న కార్యకలాపాల సమస్యల నేపథ్యంలోనే ఈ మార్పు చోటుచేసుకుంది. గత డిసెంబర్‌లో ఇండిగో కార్యకలాపాల్లో తీవ్ర గందరగోళం నెలకొని, దాదాపు 4,500 విమానాలు రద్దయ్యాయి. ఇది భారత విమానయాన రంగానికి పెద్ద లోటుగా నిలిచింది. ఈ విషయంపై కేంద్ర విమానయాన మంత్రిత్వ శాఖ జోక్యం చేసుకుని పరిస్థితుల్ని చక్కదిద్దింది.

పైలట్ల మానసిక స్థితి, అలసటపై కేంద్ర ప్రభుత్వం కొత్త నిబంధనలు అమలులోకి తెచ్చినా, ఇండిగో తన సిబ్బంది షెడ్యూళ్లను సకాలంలో సరిగ్గా అప్‌డేట్ చేయడంలో విఫలమైంది. ఈ కారణంగానే ఇండిగో విమానాల నిర్వహణలో తీవ్రమైన సమస్యలు తలెత్తాయి. ఈ ఘటనపై ఇండిగో సంస్థ ప్రజలకు క్షమాపణలు కూడా చెప్పింది.