వరుసగా మూడో రోజు జంప్, లాభాల్లో స్టాక్ మార్కెట్లు: ఐటీ జంప్, బ్యాంకింగ్ కిందకు

ముంబై: దేశీయ స్టాక్ మార్కెట్లు మంగళవారం (మే 25) లాభాల్లో ప్రారంభం అయ్యాయి. గత రెండు సెషన్‌లలో లాభపడిన సూచీలు మూడో సెషన్‌లోను సానుకూలంగా కదులుతున్నాయి. తాజాగా అంతర్జాతీయంగా సానుకూల సంకేతాలు, దేశీయంగా కరోనా కేసులు తగ్గడం, కీలక రంగాల షేర్లు రాణించడం వంటి వివిధ అంశాలు సూచీలకు అండగా నిలిచాయి. ప్రధానంగా కరోనా కేసులు తగ్గడం ఇన్వెస్టర్ల సెంటిమెంటును బలపరిచింది. అయితే బ్లాక్ ఫంగస్ కేసులు వెలుగులోకి రావడం సూచీలు లాభాల్లోనే అప్రమత్తంగా కదులుతున్నాయి.

లాభాల్లో ముగిసిన మార్కెట్లు

సెన్సెక్స్ నేడు 50,922.32 పాయింట్ల వద్ద ప్రారంభమై, 50,961.35 పాయింట్ల వద్ద గరిష్టాన్ని, 50,666.00 పాయింట్ల వద్ద కనిష్టాన్ని తాకింది. సెన్సెక్స్ మధ్యాహ్నం గం.12.30 సమయానికి 124.85 (0.25%) పాయింట్లు లాభపడి 50,776.37 పాయింట్ల వద్ద ట్రేడ్ అయింది. నిఫ్టీ 15,291.75 పాయింట్ల వద్ద ప్రారంభమై, 15,293.85 వద్ద గరిష్టాన్ని, 15,223.05 వద్ద కనిష్టాన్ని తాకింది. నిఫ్టీ చివరకు 58.00 (0.38%) పాయింట్లు ఎగిసి 15,255.60 పాయింట్ల వద్ద క్లోజ్ అయింది.

టాప్ గెయినర్స్, లూజర్స్

నేటి టాప్ గెయినర్స్ జాబితాలో బ్రిటానియా 2.62 శాతం, JSW స్టీల్ 4.03 శాతం, ఏషియన్ పేయింట్స్ 3.01 శాతం, టైటాన్ కంపెనీ 2.81 శాతం, ఓఎన్జీసీ 2.34 శాతం, లాభపడ్డాయి.

టాప్ లూజర్స్ జాబితాలో HDFC బ్యాంకు 1.67 శాతం, యాక్సిస్ బ్యాంకు 1.01 శాతం, ఇండస్ ఇండ్ బ్యాంకు 0.67 శాతం, ఎస్బీఐ 0.49 శాతం, HDFC లైఫ్ 0.37 శాతం నష్టపోయాయి.

మోస్ట్ యాక్టివ్ స్టాక్స్‌లో టాటా స్టీల్, SBI, JSW స్టీల్, HDFC బ్యాంకు, టాటా మోటార్స్ ఉన్నాయి.

రంగాలవారీగా..

నిఫ్టీ 50 స్టాక్స్ 0.35 శాతం, నిఫ్టీ మిడ్ క్యాప్ 0.27 శాతం లాభపడ్డాయి. నిఫ్టీ ఆటో 0.86 శాతం, నిఫ్టీ ఎనర్జీ 0.19 శాతం, నిఫ్టీ ఎఫ్ఎంసీజీ 0.95 శాతం,

నిఫ్టీ ఐటీ 1.12 శాతం, నిఫ్టీ మీడియా 3.30 శాతం, నిఫ్టీ మెటల్ 1.49 శాతం,

నిఫ్టీ ఫార్మా 0.35 శాతం, నిఫ్టీ రియాల్టీ 0.28 శాతం లాభపడ్డాయి.

నిఫ్టీ బ్యాంకు 0.81 శాతం, నిఫ్టీ ఫైనాన్షియల్ సర్వీసెస్ 0.40 శాతం, నిఫ్టీ పీఎస్‌యూ బ్యాంకు 1.08 శాతం, నిఫ్టీ ప్రయివేటు బ్యాంకు 0.81 శాతం నష్టపోయాయి.