Trade Deficit: జూలైలో తగ్గిన వాణిజ్య లోటు.. పడిపోయిన భారత ఎగుమతులు..

Trade Deficit: జూలై మాసంలో భారత వాణిజ్య లోటు తగ్గి 20.67 బిలియన్ డాలర్లకు చేరుకుంది. ఇదే సమయంలో ఇండియా ఎగుమతులు భారీగా క్షీణించాయని ప్రభుత్వ గణాంకాలు వెల్లడించాయి.

ఈ క్రమంలో భారత దిగుమతుల విలువ 52.92 బిలియన్ డాలర్లుగా ఉండగా.. ఎగుమతులు కేవలం 32.25 బిలియన్ డాలర్లుగా ఉన్నాయి. గత ఏడాది ఇదే కాలానికి వాణిజ్య లోటు 25.43 బిలియన్ డాలర్లుగా ఏడాది ప్రాతిపదికన ప్రస్తుతం తగ్గుదల నమోదైంది. జూన్‌లో వాణిజ్య లోటు మేలో 22.1 బిలియన్ డాలర్లతో పోలిస్తే జూన్‌లో 20.13 బిలియన్ డాలర్లకు తగ్గింది. అయితే జూలైలో జూన్ సంఖ్యల కంటే స్వల్ప పెరుగుదల కనిపించింది.

రాయిటర్స్ పోల్స్ ప్రకారం ఆర్థిక నిపుణులు జూలై మాసానికి 21 బిలియన్ డాలర్ల ఆర్థిక లోటును అంచనా వేశారు. ప్రస్తుతం నమోదైన సంఖ్యలు సైతం దాదాపుగా వారు అంచనాలకు దగ్గరగానే నమోదయ్యాయి. సరుకుల వాణిజ్య ఎగుమతులు జూలైలో 9 నెలల కనిష్ట స్థాయి 32.25 బిలియన్ డాలర్లకు పడిపోయాయి. ఏప్రిల్-జూలైలో వస్తువుల ఎగుమతుల వృద్ధి సంవత్సరానికి 14.50 శాతం మేర పడిపోయింది. ఇదే కాలానికి దిగుమతులు 13.79 శాతం పడిపోయాయి.

ఎగుమతుల్లో ప్రధానంగా ఎలక్ట్రానిక్ వస్తువులు, ఇనుప ఖనిజం, మందులు, ఫార్మా వంటి రంగాల ద్వారా నడపబడుతున్నాయి. ఏప్రిల్-జూలైలో పెట్రోలియం ఉత్పత్తుల ఎగుమతులు ఏడాదికి 11.41 శాతం క్షీణించాయి. నాలుగు నెలల కాలంలో రత్నాలు, ఆభరణాల ఎగుమతులు ఏడాదితో పోలిస్తే 3.68 శాతం మేర తగ్గాయి.