భారత ఇంధన కరువు తీరినట్లే.. అండమాన్ సముద్ర తీరంలో భారీగా చమురు నిక్షేపాలు..

భారతదేశ ఇంధన రంగంలో మరో కీలక మైలురాయి నమోదైంది. ప్రభుత్వ రంగ సంస్థ 'ఆయిల్ ఇండియా లిమిటెడ్' (OIL) అండమాన్ తీరప్రాంతంలో తన రెండవ సహజ వాయువు (Natural Gas) నిల్వలను కనుగొంది. ఈ తాజా ఆవిష్కరణతో రాబోయే రోజుల్లో ఈ సరిహద్దు బేసిన్ దేశంలోనే ఒక ముఖ్యమైన హైడ్రోకార్బన్ ఉత్పత్తి ప్రాంతంగా ఆవిర్భవించగలదనే నమ్మకం మరింత బలపడింది.

కేంద్ర పెట్రోలియం, సహజ వాయువుల శాఖ మంత్రి హర్దీప్ సింగ్ పూరి శుక్రవారం ఈ విజయానికి సంబంధించిన వివరాలను అధికారికంగా వెల్లడించారు. అండమాన్ దీవుల తూర్పు తీరానికి సుమారు 15 కిలోమీటర్ల దూరంలో.. 355 మీటర్ల నీటి లోతులో ఉన్న 'విజయపురం-3' అన్వేషణా బావిలో ఈ సరికొత్త గ్యాస్ నిల్వలు బయటపడినట్లు ఆయన ప్రకటించారు.

గతంలో సెప్టెంబర్ 2025లో ఇదే బ్లాక్‌లోని 'విజయపురం-2' బావిలో మొదటిసారిగా సహజ వాయువు నిల్వలను కనుగొన్నారు. ఆ విజయం అందించిన ఉత్సాహంతో తవ్వకాలు జరపగా, అత్యంత విజయవంతంగా భారీ గ్యాస్ నిల్వలను గుర్తించిన రెండవ బావిగా 'విజయపురం-3' నిలిచింది. కంపెనీ అండమాన్ తీరంలో చేపట్టిన ఈ ప్రత్యేక అన్వేషణ కార్యక్రమంలో భాగంగా ఇప్పటివరకు మొత్తం మూడు అన్వేషణా బావులను తవ్వగా, అందులో రెండు బావుల్లో ఊహించిన విధంగానే హైడ్రోకార్బన్‌ల ఉనికి స్పష్టంగా నిర్ధారణ అయింది. ఈ అద్భుతమైన సక్సెస్ రేటుతో ఈ బేసిన్‌లో రాబోయే రోజుల్లో మరిన్ని అన్వేషణలు చేయడానికి అపారమైన అవకాశాలు మెరుగయ్యాయని కంపెనీ వర్గాలు ఆనందం వ్యక్తం చేశాయి.

Also Read

ఎల్పీజీ ధరల సెగ..జూన్ 1 నుండి సిలిండర్ బుకింగ్, నిబంధనలలో కీలక మార్పులు

ఈ సరికొత్త ఆవిష్కరణ అక్కడ ఒక అద్భుతమైన పెట్రోలియం వ్యవస్థ పనిచేస్తుందనడానికి స్పష్టమైన నిదర్శనమని ఆయిల్ ఇండియా లిమిటెడ్ స్పష్టం చేసింది. అంతేకాకుండా ఈ బేసిన్ పరిధిలో ఇంకా భారీగా అదనపు హైడ్రోకార్బన్ నిల్వలు దాగి ఉండే అవకాశం ఉందని శాస్త్రవేత్తలు అంచనా వేస్తున్నారు. దేశీయంగా చమురు, సహజ వాయువుల ఉత్పత్తిని పెంచి విదేశీ దిగుమతుల భారాన్ని తగ్గించుకోవడానికి భారత్ చేస్తున్న ప్రయత్నాలకు ఈ తాజా గ్యాస్ నిల్వల ఆవిష్కరణ ఒక పెద్ద బూస్ట్‌లా ఉపయోగపడనుంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.