AI ప్రపంచంలో కొత్త మైలురాయి... భారతీయ టెక్ నిపుణుడైన రాహుల్ పాటిల్ ఇప్పుడు ఆంత్రోపిక్ కొత్త CTO

ఆర్టిఫిషియల్ ఇంటెలిజెన్స్ (AI) రంగంలో వేగంగా ఎదుగుతున్న అమెరికా సంస్థ "ఆంత్రోపిక్" ఇప్పుడు భారతీయ టెక్ నిపుణుడైన రాహుల్ పాటిల్ ను చీఫ్ టెక్నాలజీ ఆఫీసర్ CTO గా నియమించింది. OpenAI, గూగుల్, మైక్రోసాఫ్ట్, మెటా వంటి టెక్ దిగ్గజాలతో పోటీ పెరుగుతున్న సమయంలో ఆంత్రోపిక్ తన టెక్ బేస్‌ను బలపరచడానికే ఈ నిర్ణయం తీసుకుంది.

రాహుల్ పాటిల్ ఇప్పుడు ఆంత్రోపిక్ లో ఇంజినీరింగ్ విభాగానికి నాయకత్వం వహించనున్నారు. ఇందులో ఇన్‌ఫెరెన్స్, ప్రోడక్ట్స్, ఇన్‌ఫ్రాస్ట్రక్చర్, సెక్యూరిటీ వంటి ముఖ్య విభాగాలు ఉంటాయి. ఆయన స్థానంలో ఉన్న సహ-వ్యవస్థాపకుడు సామ్ మెక్‌కాండ్లిష్ ఇప్పుడు కంపెనీలో చీఫ్ ఆర్కిటెక్ట్ అనే కొత్త పాత్రలోకి మారుతున్నారు.

లింక్డ్ఇన్‌లో రాహుల్ పాటిల్ మాట్లాడుతూ, AI రంగంలో అవకాశాలు చాలా పెద్దవి అన్నారు. ఈ అవకాశాలను నిజం చేయడం ఒక అద్భుతమైన ప్రయాణం అవుతుందని చెప్పారు. అలాగే, ఈ పెద్ద మార్పు సమయంలో ప్రతిరోజూ జాగ్రత్తగా నిర్ణయాలు తీసుకోవడం చాలా ముఖ్యం అని చెప్పారు. బాధ్యతాయుతంగా AI ను ఉపయోగించడం ద్వారానే విజయాన్ని సాధించవచ్చని ఆయన పేర్కొన్నారు.

ఆంత్రోపిక్ లో చేరకముందు రాహుల్ పాటిల్ ఫిన్‌టెక్ కంపెనీ Stripe లో సుమారు 5½ సంవత్సరాలు పనిచేశారు. చివరికి ఆయన CTOగా, కంపెనీ ఇంజినీరింగ్ టీమ్‌కి మరియు గ్లోబల్ ఆపరేషన్స్‌కి నాయకత్వం వహించారు. దానికి ముందు ఆయన ఒరాకిల్ క్లౌడ్, అమెజాన్ వెబ్ సర్వీసెస్ (AWS), మైక్రోసాఫ్ట్ అజూర్ వంటి పెద్ద టెక్ కంపెనీల్లో కూడా ముఖ్యమైన బాధ్యతలు చేపట్టారు. పాటిల్ బెంగళూరులోని PES యూనివర్సిటీ నుంచి కంప్యూటర్ సైన్స్‌లో బ్యాచిలర్ డిగ్రీ పూర్తి చేశారు. తరువాత అరిజోనా స్టేట్ యూనివర్సిటీ నుంచి మాస్టర్స్, యూనివర్సిటీ ఆఫ్ వాషింగ్టన్ నుంచి MBA చేసారు.

భారతదేశంలో టాప్ 10 మ్యూచువల్ ఫండ్స్ 2025

ఆంత్రోపిక్ టెక్ టీమ్‌లో కొన్ని మార్పులు చేస్తున్నారు. ఈ నియామకంతో పాటుగా కోర్ టెక్నికల్ టీమ్‌ను రీ-స్ట్రక్చర్ చేస్తోంది. ప్రోడక్ట్ ఇంజినీరింగ్ టీమ్‌ను ఇన్‌ఫ్రాస్ట్రక్చర్ మరియు ఇన్‌ఫెరెన్స్ టీమ్‌లతో మరింత దగ్గరగా కలపనుంది. సహ-వ్యవస్థాపకుడు సామ్ మెక్‌కాండ్లిష్ ఇక పై పెద్ద మోడల్ ట్రైనింగ్ మరియు ప్రీ-ట్రైనింగ్ పనుల పై ఫోకస్ చేస్తారు. ఇద్దరూ ఆంత్రోపిక్ ప్రెసిడెంట్ డానియెలా అమోడైకి నేరుగా రిపోర్ట్ చేస్తారు.

ఆంత్రోపిక్ యొక్క Claude మోడల్స్ కి గ్లోబల్ లెవెల్‌లో డిమాండ్ ఊహించని స్థాయిలో పెరుగుతోంది. 2023లో 1,000 కస్టమర్ల కంటే తక్కువగా ఉన్న గ్లోబల్ కస్టమర్ బేస్, 2025 నాటికి 3 లక్షల వ్యాపార కస్టమర్లకు చేరింది అంటే 300 రెట్లు వృద్ధి. రెవెన్యూ కూడా 2024లో $87 మిలియన్ నుంచి 2025లో $1 బిలియన్ దాటింది, ఆగస్టులో "$5 బిలియన్" మార్క్‌ను కూడా క్రాస్ చేసింది. ఆంత్రోపిక్ ఎకనామిక్ ఇండెక్స్ ప్రకారం, Claude వినియోగంలో 80% అమెరికా దేశం బయట నుంచే వస్తోంది. ముఖ్యంగా దక్షిణ కొరియా, ఆస్ట్రేలియా, సింగపూర్ లలో ఒక్కో వ్యక్తి వినియోగం అమెరికా కంటే ఎక్కువగా ఉంది.

ఆంత్రోపిక్ సెప్టెంబర్ 26న తన అంతర్జాతీయ సిబ్బందిని మూడు రెట్లు పెంచబోతున్నామని అలాగే అప్లైడ్ AI టీమ్‌ను ఐదు రెట్లు పెద్దదిగా విస్తరించనుందని ప్రకటించింది. కంపెనీ భారత్, ఆస్ట్రేలియా, న్యూజిలాండ్, కొరియా, సింగపూర్ వంటి దేశాల్లో కార్యకలాపాలను విస్తరించనుంది. ఈ ప్రకటన కంపెనీ $13 బిలియన్ నిధులు సేకరించిన కొన్ని రోజుల తర్వాత వచ్చింది, దీని తర్వాత ఆంత్రోపిక్ విలువ $183 బిలియన్‌కు చేరింది.

గూగుల్, ఓపెన్ఏఐ, మెటా, మైక్రోసాఫ్ట్ వంటి టెక్ దిగ్గజాలు తదుపరి తరం AI మోడల్స్ కోసం వందల బిలియన్ల డాలర్లు ఇన్‌ఫ్రాస్ట్రక్చర్‌ పై ఖర్చు చేస్తున్నాయి. ఆంత్రోపిక్ కూడా ఈ AI రేసులో తన స్థానాన్ని బలంగా నిలబెట్టుకోవడానికి వేగంగా అడుగులు వేస్తోంది. రాహుల్ పాటిల్ CTOగా చేరడం కంపెనీకి టెక్నికల్ దిశలో ఒక కీలక మైలురాయిగా భావిస్తుంది. అతను కంపెనీ యొక్క ఇంజినీరింగ్, ప్రోడక్ట్స్, ఇన్‌ఫ్రాస్ట్రక్చర్, సెక్యూరిటీ విభాగాలను నడిపిస్తారు. ఆంత్రోపిక్ తన గ్లోబల్ కార్యకలాపాలను విస్తరించడానికి, అప్లైడ్ AI టీమ్‌ను పెద్దదిగా చేయడానికి, మరియు అంతర్జాతీయ మార్కెట్లలో స్థానాన్నిపొందడానికి ఇప్పటికే భారీ ప్రయత్నాలు చేస్తున్నారు.