Market Crash: సాయంత్రానికి కుప్పకూలిన మార్కెట్లు.. మాయమైన రూ.15 లక్షల కోట్లు..

Stock Market Closing: ఉదయం ఉల్లాసంగా ప్రారంభమైన దేశీయ స్టాక్ మార్కెట్లు కొన్ని గంటల్లోనే నష్టాల్లోకి జారుకున్నాయి. దీంతో ప్రధాన సూచీలు సెన్సెక్స్, నిఫ్టీలు భారీగా క్షీణించాయి. దీనికి ప్రధాన కారణం ఏమిటంటే..??

సాయంత్రం మార్కెట్లు ముగిసే సమయంలో బెంచ్ మార్క్ సూచీ సెన్సెక్స్ 526 పాయింట్లు కోల్పోగా.. మరో కీలక సూచీ నిఫ్టీ 155 పాయింట్ల మేర భారీ నష్టంతో ముగించాయి. ఇంట్రాడేలో సూచీలు కనిష్ఠాలను చేరుకున్నాయి. ఇదే సమయంలో నిఫ్టీ బ్యాంక్ సూచీ 297 పాయింట్లు, నిఫ్టీ మిడ్ క్యాప్ సూచీ 233 పాయింట్ల మేర నష్టాలతో తమ ప్రయాణాన్ని నేడు ముగించాయి. మార్కెట్లు ఒక్కసారిగా తలకిందులు కావటంతో దేశీయ పెట్టుబడిదారులకు సంపద దాదాపు రూ.15 లక్షల కోట్ల మేర ఆవిరైపోయింది.

అసలు మార్కెట్లు ఇంత భయంకరంగా మారటానికి కారణాలను పరిశీలిస్తే.. మిడిల్ ఈస్ట్‌లో భౌగోళిక రాజకీయ సంక్షోభం పెరగడం, USలో బాండ్ ఈల్డ్‌లు పెరగడం, కీలకమైన కార్పొరేట్‌ల సెప్టెంబర్ త్రైమాసిక ఆదాయాలు ఊహించిన దానికంటే బలహీనంగా ఉండటంతో అక్టోబర్ 25న భారీ అమ్మకాలను చూసింది.

ఈ అంశాలు మార్కెట్ సెంటిమెంట్‌ను ప్రభావితం చేసే అవకాశం ఉన్నందున ఇన్వెస్టర్లు ముందుగానే జాగ్రత్త పడటం ప్రారంభించారు. ఇజ్రాయెల్-హమాస్ వివాదంతో ముడిపడి ఉన్న అనిశ్చితులు సమీప కాలంలో మార్కెట్లపై ప్రభావం చూపుతూనే ఉంటాయని జియోజిత్ ఫైనాన్స్ కు చెందిన వికె విజయ్ కుమార్ వెల్లడించారు.

NSEలో టాటా స్టీల్, కోల్ ఇండియా, హిందాల్కొ, టాటా కన్జూమర్, ఎస్బీఐ, మారుతీ, మహీంద్రా అండ్ మహీంద్రా, ఎల్ టిఐఎమ్, నెస్లే, పవర్ గ్రిడ్ కంపెనీల షేర్లు లాభాల్లో ట్రేడింగ్ ముగించి టాప్ గెయినర్లుగా నిలిచాయి.

ఇదే క్రమంలో అపోలో హాస్పిటల్స్, అదానీ ఎంటర్ ప్రైజెస్, ఎస్బీఐ లైఫ్, సిప్లా, ఐషర్ మోటార్స్, ఎన్టీపీసీ, ఎయిర్ టెల్, దివీస్ ల్యాబ్, బజాజ్ ఫైనాన్స్, టాటా మోటార్స్ , టెక్ మహీంద్రా, ఐసీఐసీఐ బ్యాంక్, ఇన్ఫోసిస్, ఇండస్ఇండ్ బ్యాంక్, ఎల్ టి, బజాజ్ ఆటో, హెచ్డీఎఫ్సీ లైఫ్, బీపీసీఎల్, గ్రాసిమ్, టైటాన్ కంపెనీల షేర్లు నష్టాలతో టాప్ లూజర్లుగా తమ ప్రయాణాన్ని నేడు మార్కెట్లలో ముగించాయి.