Stock Market: నష్టాల్లో దేశీయ స్టాక్ మార్కెట్లు.. లాభాల స్వీకరణలో ఇన్వెస్టర్లు..

Stock Market: గత వారం మంచి లాభాలతో ముగిసిన దేశీయ స్టాక్ మార్కెట్లు.. మళ్లీ నేడు తిరోగమనం బాటలో నడుస్తున్నాయి. ప్రధానంగా అంతర్జాతీయ మార్కెట్ల నుంచి వస్తున్న ప్రతికూల పవనాలతో ఇన్వెస్టర్లు లాభాల బుక్కింగ్ వైపు మెుగ్గుచూపుతున్నారు. దీంతో మార్కెట్లు నేడు స్వల్ప నష్టాలతో ప్రారంభమయ్యాయి.

మార్కెట్ సూచీలు..

ప్రధాన సూచీ నెన్సెక్స్ ఉదయం 9.32 గంటల సమయంలో 253 పాయింట్ల నష్టంలో ట్రేడ్ అవుతోంది. ఇదే సమయంలో నిఫ్టీ సూచీ 80 పాయింట్ల మేర నష్టాల్లో ఉంది. మరో సూచీ బ్యాంక్ నిఫ్టీ మాత్రం స్వల్ప లాభాలతో ప్రరంభమైనప్పటికీ.. 93 పాయింట్ల నష్టంలో ఉంది. మిడ్ క్యాప్ నిఫ్టీ సూచీ మాత్రం 310 పాయింట్ల నష్టంలో సాగుతోంది.

అంతర్జాతీయ మార్కెట్లు..

అమెరికాలో రిటైల్ ద్రవ్యోల్బణం ప్రస్తుతం నాలుగు దశాబ్దాల గరిష్ఠానికి చేరుకోవటం ప్రపంచాన్ని ఆందోళనలోకి నెడుతోంది. ఈ క్రమంలో వడ్డీ రేట్లను మరింత పెంచాలని సెంట్రల్ బ్యాంక్ ఫెడరల్ రిజర్వ్‌పై ఒత్తిడి పెరుగుతోంది. ఫెడ్ ఛైర్మన్ జెరోమ్ పావెల్ కూడా మరింత పదునైన వడ్డీ రేట్ల పెంపుదల గురించి సూచన చేశారు.

అయితే మాంద్యం భయాలతో ఇన్వెస్టర్లు మార్కెట్ నుంచి తమ పెట్టుబడులను ఉపసంహరించుకుంటున్నారు. గత ట్రేడింగ్ సెషన్‌లో అమెరికా మార్కెట్ సూచీ నాస్‌డాక్ 3.08 శాతం మేర క్షీణించింది. ఇదే సమయంలో యూరోపియన్ మార్కెట్లు పుంజుకున్నాయి.

టాప్ గెయినర్స్..

బజాజ్ ఆటో, ఐసీఐసీఐ బ్యాంక్, ఐషర్ మోటార్స్, ఎస్బీఐ, డాక్టర్ రెడ్డీస్, ఇన్ఫోసిస్, హీరో మోటొకార్ప్, సిప్లా, హెచ్డీఎఫ్సీ లైఫ్, సన్ ఫార్మా, ఎస్బీఐ లైఫ్, టీసీఎస్ కంపెనీలు మాత్రం టాప్ గెయినర్స్ గా నిలుస్తూ లాభాల్లో ఉన్నాయి.

టాప్ లూజర్స్..

మహీంద్రా అండ్ మహీంద్రా, జేఎస్డబ్ల్యూ స్టీల్, అదానీ ఎంటర్ప్రైజెస్, టాటా స్టీల్, హిందాల్కొ, అపోలో హాస్పిటల్స్, బీపీసీఎల్, ఎల్ అండ్ టీ, గ్రాసిమ్, అల్ట్రాటెక్ సిమెంట్,ఓఎన్జీసీ, బ్రిటానియా, కోల్ ఇండియా, విప్రో స్టాక్స్ నష్టాల్లో కొనసాగుతూ టాప్ లూజర్స్ గా నిలిచాయి.