Stock Market: భారీ లాభాల్లో మార్కెట్ల ముగింపు.. అక్టోబరుపైనే ఆశలు.. రూ.3.28 లక్షల కోట్లు లాభం

Closing Bell: దేశీయ స్టాక్ మార్కెట్లు చివరి రోజు ట్రేడింగ్ లాభాల్లో ముగించాయి. ప్రధాన సూచీలు సూపర్ లాభాల్లో ముగియటంతో పాటు అక్టోబర్ సిరీస్ F&Oపై ఇన్వెస్టర్లు మంచి ఆసక్తిని కనబరిచారు.

మార్కెట్లు ముగిసే సమయంలో బెంచ్ మార్క్ సూచీ సెన్సెక్స్ 320 పాయింట్ల లాభపడగా.. మరో కీలక సూచీ నిఫ్టీ 115 పాయింట్ల మేర గెయిన్ అయ్యింది. ఇదే క్రమంలో నిఫ్టీ బ్యాంక్ సూచీ 284 పాయింట్లు, నిఫ్టీ మిడ్ క్యాప్ సూచీ 433 పాయింట్ల మేర లాభాలతో సెప్టెంబర్ నెల చివరి రోజు ట్రేడింగ్ ఆశాజనకంగా ముగించాయి. ఈ క్రమంలో ప్రధానంగా ఫార్మా, మెటల్ రంగాల షేర్లు 2 శాతం మేర లాభపడ్డాయి.

ప్రపంచ మార్కెట్ల సానుకూల సూచనల సంకేతాలు నేడు భారత స్టాక్ మార్కెట్లు నిన్నటి నష్టాల నుంచి తేరుకునేందుకు దోహదపడ్డాయి. దీంతో నేడు ఇన్వెస్టర్లు కొనుగోళ్లకు మెుగ్గుచూపారు. ఈ క్రమంలో అన్ని BSE లిస్టెడ్ కంపెనీల మార్కెట్ క్యాపిటలైజేషన్ రూ.3.28 లక్షల కోట్లు పెరిగి రూ.319.94 లక్షల కోట్లకు చేరుకుంది. ఈరోజు లాభపడిన వాటిలో హెవీ వెయిట్ కలిగిన రిలయన్స్, హెచ్‌డీఎఫ్‌సీ బ్యాంక్, ఐసీఐసీఐలు ఉన్నాయి.

ఎన్ఎస్ఈలో హిందాల్కొ, ఎన్టీపీసీ, డాక్టర్ రెడ్డీస్, హీరో మోటార్స్, టాటా మోటార్స్, దివీస్ ల్యాబ్స్, అపోలో హాస్పిటల్స్, సన్ ఫార్మా, ఓఎన్జీసీ, సిప్లా, యూపీఎల్, గ్రాసిమ్, టాటా స్టీల్, కోల్ ఇండియా, ఎస్బీఐ లైఫ్, అల్ట్రాటెక్ సిమెంట్స్, ఎస్బీఐ, జేఎస్డబ్ల్యూ స్టీల్, బజాజ్ ఆటో, ఇండస్ఇండ్ బ్యాంక్ షేర్లు లాభాలతో టాప్ గెయినర్లుగా ట్రేడింగ్ ముగించాయి.

ఇదే క్రమంలో అదానీ ఎంటర్ ప్రైజెస్, ఎల్ టిఐఎమ్, ఇన్ఫోసిస్, టెచ్సీఎల్ టెక్నాలజీస్, నెస్లే, టెక్ మహీంద్రా, టీసీఎస్, టైటాన్, పవర్ గ్రిడ్, ఏషియన్ పెయింట్స్, బజాజ్ ఫిన్ సర్వ్, మహీంద్రా అండ్ మహీంద్రా కంపెనీల షేర్లు నష్టాల్లో ట్రేడింగ్ ముగించి టాప్ లూజర్లుగా వారాంతంలో నిలిచాయి.