Stock Market: బుల్ పరుగులు.. భారీ లాభాల్లో స్టాక్ మార్కెట్ సూచీలు.. అదరగొడుతున్న స్టాక్స్

Stock Market: నిన్న భారీ నష్టాలను చవిచూసిన భారత స్టాక్ మార్కెట్లు నేడు పుంజుకున్నాయి. కొనుగోలుదారుల నుంచి అందిన మద్దతుతో మధ్యాహ్నం 1.05 గంటలకు సూచీలు భారీ లాభాల్లో ట్రేడ్ అవుతున్నాయి. ఈ క్రమంలో బెంచ్ మార్క్ సూచీ సెన్సెక్స్ 1116 పాయింట్ల లాభంలో ఉండగా.. మరో సూచీ నిఫ్టీ 320 పాయింట్లకు పైగా లాభంలో కొనసాగుతోంది. ఇదే సమయంలో బ్యాంక్ నిఫ్టీ సూచీ 914 పాయింట్లు, నిఫ్టీ మిడ్ క్యాప్ 483 పాయింట్ల లాభాలతో కొనసాగుతున్నాయి.

నష్టాల నుంచి తేరుకున్న సమయంలో బీఎస్ఈ సూచీలో ఉన్న మెుత్తం 3,461 స్టాక్స్ లో 2,402 కంపెనీల షేర్లు లాభాల్లో కొనసాగుతున్నాయి. ఈ క్రమంలో నిఫ్టీ ఆటో సూచీ 2.41 శాతానికి పైగా లాభాల్లో కొనసాగుతోంది. దీనికి తోడు ఐటీ రంగం షేర్లు భారీగా లాభపడ్డాయి.

ఈ రోజు ప్రధానంగా రిలయన్స్ ఇండస్ట్రీస్, బజాజ్ ఫిన్ సర్వ్, మారుతీ కంపెనీల షేర్లలో భారీ మెుమెంటం కనిపించింది. ఆటో, బ్యాంక్, మెటల్, ఆయిల్ & గ్యాస్, పవర్, రియల్టీ రంగాలకు చెందిన సూచీలు 1-2 శాతం చొప్పున అధికంగా ట్రేడవుతున్నాయి.