Indian Railways: రైలు ప్రయాణికులకు గమనిక.. ఆ పరిహారం 10 రెట్లు పెంపు..

Indian Railways: దేశంలో చాలా మంది తమ ప్రయాణాల కోసం భారతీయ రైల్వే సేవలను వినియోగిస్తుంటారు. తక్కువ ఖర్చుతో పాటు ప్రయాణ వెసులుబాటును అందించటమే దీనికి కారణంగా తెలుస్తోంది.

అయితే ఇటీవల దేశవ్యాపంగా రైల్వే ప్రమాదాలు చోటుచేసుకున్న సంగతి తెలిసిందే. ఈ ఏడాది ఒడిశాలో జరిగిన అతిపెద్ద ప్రమాదం చాలా మంది ప్రాణాలను బలిగొంది. ఈ క్రమంలో రైల్వే బోర్డు ప్రమాద బాధితులకు అందించే పరిహారాన్ని పెంచాలని నిర్ణయించింది. 2012-13 తర్వాత తొలిసారిగా రైల్వే బోర్డు దీనిపై నిర్ణయం తీసుకుంది.

రైలు లేదా మనుషుల లెవెల్ క్రాసింగ్ ప్రమాదాల్లో ప్రాణాలు కోల్పోయిన వ్యక్తుల కుటుంబాలకు ఎక్స్-గ్రేషియాను పెంచుతున్నట్లు ప్రకటించింది. గతంలో రూ.50 వేలుగా ఉన్న పరిహారాన్ని తాజాగా రూ.5 లక్షలకు పెంచుతున్నట్లు రైల్వే బోర్డు వెల్లడించింది. అలాగే రైలు ప్రమాదంలో తీవ్రంగా గాయపడిన వ్యక్తులకు గతంలో చెల్లిస్తున్న రూ.25 వేల పరిహారాన్ని రూ.2.50 లక్షలకు పెంచింది. తక్కువ తీవ్రత కలిగిన గాయాలకు గురైతే గతంలో ఇస్తున్న రూ.5 వేల పరిహారానికి బదులు రూ.50,000 చెల్లించాలని నిర్ణయించింది.

అంతేకాకుండా మానవ సహిత లెవల్ క్రాసింగ్ గేట్ల వద్ద రైల్వే ప్రాథమిక బాధ్యత కారణంగా ప్రమాదాలకు గురైన రహదారి వినియోగదారులకు సవరించిన ఎక్స్-గ్రేషియా ఉపశమనాన్ని సర్క్యులర్ పొడిగించింది. అలాగే ఉగ్రవాద దాడులు, హింసాత్మక దాడులు, రైలు దోపిడీలు వంటి నేరాలుగా వర్గీకరించారు. ఈ సందర్భాల్లో ప్రాణాంతక గాయాలతో బాధపడే ప్రయాణికులపై ఆధారపడిన వారికి రూ.1.5 లక్షలు, తీవ్ర గాయాలపాలైన వారికి రూ. 50,000, స్వల్ప గాయాలైన ప్రయాణికులకు రూ.5,000 అందించాలని బోర్డు నిర్ణయించింది.

రైలు ప్రమాదాల కారణంగా 30 రోజులకు మించి ఆసుపత్రిలో చికిత్స పొందే ప్రయాణికులకు రోజుకు రూ.3,000 చెల్లించాలని బోర్డు నిర్ణయించింది. ఈ మెుత్తం ప్రతి 10 రోజుల వ్యవధి ముగింపులో లేదా డిశ్చార్జ్ అయిన తర్వాత ఏది ముందు జరిగితే అప్పుడు విడుదల చేయబడుతుంది. అలాగే అవాంఛనీయ సంఘటనల సమయంలో తీవ్రంగా గాయపడిన ప్రయాణికులు ఆసుపత్రిలో చేరిన ఆరు నెలల వరకు ఇలాంటి పరిస్థితులలో రోజుకు రూ.1,500 అందుకుంటారు. ఆ తర్వాత ఐదు నెలలు రోజుకు రూ.750 చొప్పున పొందుతారు.