UPI News: పార్లమెంటరీ ప్యానెల్ కీలక నివేదిక.. ఫోన్‌ పే, గూగుల్‌ పే సహా ఫిన్‌టెక్స్‌పై ప్రతిపాదనలు

Digital transactions: డిజిటల్ పేమెంట్స్ విభాగంలో కనీవినీ ఎరుగని రీతిలో భారత్ దూసుకుపోతోంది. అగ్రరాజ్యాలు సైతం అందుకోలేని ఘనత ఇండియా సొంతం చేసుకుంది. అయితే దేశీయ ఫిన్‌టెక్ దిగ్గజం పేటీఎం సంక్షోభం నేపథ్యంలో పార్లమెంటరీ ప్యానెల్ కేంద్రానికి కీలక సిఫార్సులు చేసింది.

ప్రస్తుతం దేశంలో వేగంగా అభివృద్ధి చెందుతున్న డిజిటల్ చెల్లింపుల మార్కెట్‌లో వాల్‌ మార్ట్ యాజమాన్యంలోని ఫోన్‌ పే మరియు గూగుల్ పే లు 83 శాతం కంటే ఎక్కువ మార్కెట్ షేర్ కలిగి ఉన్నాయి. దీనిలో 46.91 శాతంతో ఫోన్‌ పే అగ్రస్థానంలో ఉండగా.. 36.39 శాతంతో గూగుల్ కొనసాగుతున్నట్లు IT మరియు కమ్యూనికేషన్స్ పార్లమెంటరీ కమిటీ తన నివేదికలో పేర్కొంది.

అయితే ఈ యాప్‌లకు ప్రత్యామ్నాయంగా దేశీయ ఫిన్‌టెక్ ప్లేయర్‌ల వృద్ధికి మద్దతు ఇవ్వాలని భారత పార్లమెంటరీ ప్యానెల్ ప్రభుత్వాన్ని కోరింది. మరో ప్రముఖ చెల్లింపుల సంస్థ పేటీఎం తన పేమెంట్స్ బ్యాంక్ వ్యాపారం విషయంలో ఆంక్షలకు గురవుతున్న తరుణంలో.. 58 పేజీల నివేదికతో కూడిన సవివర సిఫార్సులను చేసింది.

పరిమాణం ప్రకారం దేశీయంగా అభివృద్ధి చేసిన BHIM UPI మార్కెట్ వాటా కేవలం 0.22 శాతమేనని నివేదిక స్పష్టం చేసింది. కేవలం రెండు కంపెనీల ఏకచత్రాధిపత్యంపై రిజర్వ్ బ్యాంక్ ఆఫ్ ఇండియా ప్రత్యేక విభాగం నేషనల్ పేమెంట్స్ కార్పొరేషన్ ఆఫ్ ఇండియా ఇటీవల ఆందోళన వ్యక్తం చేసింది. ఒక నెలలో ఏ ప్లేయర్ అయినా 30 శాతానికి మించి UPI లావాదేవీలు ప్రాసెస్ చేయకుండా కట్టడి చేయాలని ప్రతిపాదించింది. తాజాగా ప్యానెల్ కూజా ఇదే తరహా అభిప్రాయం వ్యక్తం చేసింది.