Stock Market: అనుకున్నదే జరుగుతోందా..?భారీ నష్టాల్లో దేశీయ మార్కెట్లు..

Market Fall: దేశీయ స్టాక్ మార్కెట్లో మెగా ర్యాలీకి బ్రేక్ పడినట్లు కనిపిస్తోంది. వరుసగా రెండో రోజు కూడా నష్టాల్లో ట్రేడవుతున్నాయి. వారాంతంలో మార్కెట్ల కరెక్షన్ సూచీల్లో కనిపిస్తోంది.

ఉదయం 9.50 గంటల సమయంలో బెంచ్ మార్క్ సూచీ సెన్సెక్స్ 220 పాయింట్ల మేర నష్టాల్లో ఉండగా.. మరో కీలక సూచీ నిఫ్టీ 83 పాయింట్లు కోల్పోయింది. ఇదే క్రమంలో నిఫ్టీ బ్యాంక్ సూచీ 81 పాయింట్లు, నిఫ్టీ మిడ్ క్యాప్ సూచీ 296 పాయింట్ల నష్టంతో మార్కెట్ కరెక్షన్ కొనసాగుతోంది.

అంతర్జాతీయ మార్కెట్ల ప్రభావం కూడా దేశీయ సూచీలను ప్రభావితం చేస్తోంది. ప్రధానంగా ఆసియా మార్కెట్లు నష్టాల్లో ఉండటంతో ఆ సెంటిమెంట్ దేశీయ ఇన్వెస్టర్లను ప్రభావితం చేస్తోందని నిపుణులు చెబుతున్నారు. మరో పక్క యూఎస్ ఫెడ్ వడ్డీ రేట్లలో వెనకడుగు వేసేది లేదని చెప్పటం కొంత ఆందోళనలకు కారణంగా నిలుస్తోంది.

NSEలో ఎన్టీపీసీ, భారతీ ఎయిర్ టెల్, ఏషియన్ పెయింట్స్, డాక్టర్ రెడ్డీస్, బజాజ్ ఆటో, హెచ్డీఎఫ్సీ బ్యాంక్, జేఎస్డబ్ల్యూ స్టీల్, ఇండస్ ఇండ్ బ్యాంక్, నెస్లే, హెచ్డీఎఫ్సీ, ఐసీఐసీఐ బ్యాంక్ కంపెనీల షేర్లు లాభాల్లో కొనసాగుతూ టాప్ గెయినర్లుగా ట్రేడవుతున్నాయి.

ఇదే క్రమంలో అదానీ ఎంటర్ ప్రైజెస్, ఏషియన్ పెయింట్స్, బీపీసీఎల్, హిందాల్కొ, టెక్ మహీంద్రా, ఎస్బీఐ, దివీస్ ల్యాబ్, టాటా మోటార్స్, బజాజ్ ఫిన్ సర్వ్, టైటాన్, హెచ్డీఎఫ్సీ లైఫ్, టాటా స్టీల్, టాటా కన్జూమర్, పవర్ గ్రిడ్, ఐటీసీ, హెచ్సీఎల్ టెక్, గ్రాసిమ్, అల్ట్రాటెక్ సిమెంట్స్, ఇన్ఫోసిస్, సన్ ఫార్మా కంపెనీల షేర్లు నష్టాల్లో కొనసాగుతూ టాప్ లూజర్లుగా కొనసాగుతున్నాయి.