Twitter: ఎలాన్ మస్క్ కి సాయం చేస్తున్న భారతీయుడు.. ట్విట్టర్ నిర్వహణలో ఎవరీ శ్రీరామ్ కృష్ణన్..?

Twitter: బిలియనీర్ ఎలాన్ మస్క్ ఎట్టకేలకు ట్విట్టర్ డీల్ పూర్తిచేసి తన సొంతం చేసుకున్నారు. లక్షల కోట్లు వెచ్చించి కొన్న కంపెనీలో భారీ మార్పులు తెస్తున్నారు. రాత్రనక పగలనక ఉద్యోగులకు కంటి మీద కునుకు లేకుండా చేస్తున్నారు. అయితే దీని వెనుక ఒక భారతీయుడు ఉన్నాడనే విషయం ఇప్పుడు అందరినీ ఆశ్చర్యానికి గురిచేస్తోంది

తమిళతంబీ సాయం..

ఎలాన్ మస్క్ గత వారం మైక్రో-బ్లాగింగ్ సైట్‌కి "చీఫ్ ట్విట్" అయిన తర్వాత ట్విట్టర్‌లో పని చేయడంలో సహాయం చేయడానికి భారతీయ సంతతికి చెందిన శ్రీరామ్ కృష్ణన్‌ను సంప్రదించారు. టెక్ బిలియనీర్‌కు ట్విట్టర్‌లో "తాత్కాలికంగా" సహాయం చేస్తున్నట్లు కృష్ణన్ సోమవారం వెల్లడించారు. ఇది చాలా ముఖ్యమైన కంపెనీ అని, ప్రపంచంపై గొప్ప ప్రభావాన్ని చూపగలదని తాను నమ్ముతున్నానంటూ ట్వీట్ చేశారు. ఎలాన్ మస్క్ మాత్రమే దీనిని సమర్థవంతంగా నిర్వహించగలని తాను నమ్ముతున్నట్లు వెల్లడించారు.

వెంచర్ క్యాపిటల్ కంపెనీ..

శ్రీరామ్ కృష్ణన్ క్రిప్టో, వెబ్3 స్టార్టప్‌లలో పెట్టుబడి పెట్టే వెంచర్ క్యాపిటల్ ఫండ్ అయిన ఆండ్రీసెన్ హోరోవిట్జ్ (a16z)లో సాధారణ భాగస్వామిగా ఉన్నారు. ఆయన గతంలో ఫేస్ బుక్, స్నాప్ కంపెనీల్లో పనిచేసిన అనుభవం ఉంది. ఆయన మైక్రోసాఫ్ట్‌లో ఉత్పత్తి, ఇంజనీరింగ్ బృందాలకు నాయకత్వం వహించారు.

శ్రీరామ్ కృష్ణన్..?

భారతీయుడు శ్రీరామ్ కృష్ణన్ తమిళనాడుకు చెందిన వ్యక్తి. ఆయన చెన్నైలోని ఎస్‌ఆర్‌ఎం ఇంజినీరింగ్‌ కాలేజ్‌లో 2001-2005 వరకు చదువుకున్నారు. అన్నా యూనివర్సిటీల నుంచి బ్యాచిలర్‌ డిగ్రీని కంప్లీట్ చేశారు. చదువు పూర్తైన తర్వాత మైక్రోసాఫ్ట్‌లో విజువల్‌ స్టూడియో విభాగంలో ప్రోగ్రాం మేనేజర్‌గా తన కెరియర్‌ స్టార్ట్ చేశారు.

ఎలాన్ మస్క్ తో పరిచయం..

శ్రీరామ్ కృష్ణన్ భార్య ఆర్తి రామమూర్తి స్టార్టప్‌ల నుండి వెంచర్ క్యాపిటల్స్, క్రిప్టోకరెన్సీలు వంటి అంశాలపై చర్చలు జరిపేందుకు క్లబ్‌హౌస్ పేరుతో 2021లో టాక్ షోను ప్రారంభించారు. ఈ షోకు గతంలో ఎలాన్‌ మస్క్‌ గెస్ట్‌గా వచ్చారు. దీనికి తోడు వారికి సోషల్ మీడియా కంపెనీల్లో పనిచేసిన అనుభవం ఉండటంతో ట్విట్టర్ విషయంలో సలహాలు, సూచనలు అందించేందుకు కృష్ణన్ సహాయాన్ని ఎలాన్ మస్క్ తీసుకుంటున్నారు.