Gold silver: బంగారం వద్దు.. వెండి ముద్దు! జ్యువెలరీ మార్కెట్‌లో మారుతున్న ట్రెండ్స్! అసలు కారణం ఇదే!

భారతీయులకు ఆభరణాలు అంటే కేవలం అలంకారం మాత్రమే కాదు. అదొక సెంటిమెంట్. సురక్షితమైన పెట్టుబడి కూడా. అయితే మారుతున్న కాలంతో పాటు భారతీయుల అభిరుచులు కూడా మారుతున్నాయి. ఒకప్పుడు ఆభరణాలు అంటే కేవలం బంగారం మాత్రమే గుర్తొచ్చేది. కానీ, ఇప్పుడు బంగారం, వెండి (Gold Silver) మధ్య పోటీ పెరుగుతోంది. ధరల పెరుగుదల, మారుతున్న జీవనశైలి , డిజిటల్ ప్రభావం వల్ల వినియోగదారులు ఇప్పుడు సరికొత్తగా ఆలోచిస్తున్నారు.

ధరల సెగ.. వెండి వైపు అడుగులు

ప్రస్తుతం బంగారం ధరలు సామాన్యులకు అందనంత ఎత్తులో ఉన్నాయి. ఈ నేపథ్యంలో, బడ్జెట్ పరిమితుల వల్ల చాలామంది వెండి నగలను ప్రత్యామ్నాయంగా ఎంచుకుంటున్నారు. ముఖ్యంగా యువతలో ఈ మార్పు స్పష్టంగా కనిపిస్తోంది. పెద్ద పెద్ద బ్రాండ్లు కూడా ఇప్పుడు వెండి నగలలో అద్భుతమైన డిజైన్లను అందుబాటులోకి తెస్తున్నాయి. క్యారెట్‌లేన్ , పీఎన్‌జీ జ్యువెలర్స్ వంటి ప్రముఖ సంస్థల రిటైలర్లు చెబుతున్న ప్రకారం.. వెండి ఇప్పుడు కేవలం తక్కువ ధర కోసమే కాదు, ఆధునిక స్టైలింగ్ కోసం కూడా వాడుతున్నారు.

ఆన్‌లైన్ బ్రౌజింగ్.. ఆఫ్‌లైన్ కొనుగోలు

మునుపటిలా షాపులకు వెళ్లి గంటల కొద్దీ వెతకడం ఇప్పుడు తగ్గుతోంది. దాదాపు 70 శాతం మంది కస్టమర్లు ముందుగా ఆన్‌లైన్‌లో తమకు నచ్చిన డిజైన్లను చూసుకుంటున్నారు. సోషల్ మీడియా లేదా వెబ్‌సైట్లలో షార్ట్‌లిస్ట్ చేసుకుని, ఆ తర్వాతే నేరుగా స్టోర్‌కి వెళ్తున్నారు. అక్కడ నగలను స్వయంగా చూసి ఫినిషింగ్ చెక్ చేసుకున్న తర్వాతే ఫైనల్ చేస్తున్నారు. దీనివల్ల ప్రయాస తగ్గడమే కాకుండా బడ్జెట్‌కు తగ్గట్టుగా ముందే ప్లాన్ చేసుకునే అవకాశం కలుగుతోంది.

స్టైలింగ్ సర్వీసులకు పెరుగుతున్న డిమాండ్

ఇప్పుడు నగలు అమ్మడం అంటే కేవలం తూకం వేసి ఇవ్వడం మాత్రమే కాదు. కస్టమర్లకు 'స్టైలింగ్ అడ్వైస్' కూడా అవసరమవుతోంది. ముఖ్యంగా పెళ్లి కూతుళ్లు తమ డ్రెస్సింగ్‌ కు తగ్గట్టుగా ఎలాంటి నెక్లెస్‌లు లేదా చెవి రింగులు బాగుంటాయో జ్యువెలరీ స్టోర్లలోనే అడిగి తెలుసుకుంటున్నారు. వెస్ట్రన్, ఇండియన్ డ్రెస్సులకు రెండింటికీ నప్పే విధంగా 'వర్సటైల్' నగలను కొనేందుకు ఎక్కువ ఆసక్తి చూపిస్తున్నారు.

ఫంక్షన్లకు హెవీ.. డైలీ వేర్‌కు లైట్!

జీవనశైలి మారడం వల్ల ప్రతిరోజూ ఆఫీసులకు లేదా ట్రావెలింగ్‌ లో వేసుకోగలిగే 'లైట్ వెయిట్' , 'స్టాకబుల్' (ఒకదానిపై ఒకటి ధరించగలిగే) నగలకి ఆదరణ పెరుగుతోంది. బంగారం ధరలు ఎక్కువగా ఉండటంతో రోజువారీ వాడకానికి తక్కువ బరువున్న బంగారు ఆభరణాలను కొంటున్నారు. అదే సమయంలో పెళ్లిళ్ల వంటి పెద్ద ఫంక్షన్ల కోసం వెండిపై గోల్డ్ కోటింగ్ ఉన్న పెద్ద సైజు నగలను ఎంచుకుంటున్నారు. దీనివల్ల తక్కువ ఖర్చుతో గ్రాండ్ లుక్ పొందవచ్చని కస్టమర్లు భావిస్తున్నారు.

మొత్తానికి ఇండియన్ జ్యువెలరీ మార్కెట్ ఇప్పుడు బంగారం, వెండి (Gold Silver) రెండింటికీ సమ ప్రాధాన్యత ఇస్తోంది. పెట్టుబడి కోసం బంగారం వైపు, ఫ్యాషన్, బడ్జెట్ కోసం వెండి వైపు జనం మొగ్గు చూపుతున్నారు.