IT News: టెక్కీలకు బ్యాడ్ న్యూస్.. 20 ఏళ్ల తర్వాత వినాశనం.. అస్సలు ఊహించనిదే..

IT Hirings: ప్రస్తుతం ఐటీ కంపెనీల్లో పనిచేస్తున్న చాలా మంది టెక్ ఉద్యోగులకు ఆందోళనలు రోజురోజుకూ పెరుగుతున్నాయ్. ఎప్పుడు తమ కంపెనీ లేఆఫ్ మెయిల్ పంపుతుందో అని కంగారుగా ఉంటున్నారు. దీని వెనుక కారణాలు ఆందోళనల కలిగిస్తున్నాయి.

ఇలాంటి గడ్డు పరిస్థితుల్లో ప్రపంచ స్థాయి టెక్ దిగ్గజాలు ఉద్యోగులను లేఆఫ్ చేసి పారేస్తున్నాయి. అయితే ఇండియాలోని ఐటీ రంగంలో పరిస్థితులు కొంత మెరుగ్గానే ఉన్నాయని చెప్పుకోవచ్చు. ఇప్పటికీ దేశీయ ఐటీ సేవల కంపెనీలు ఇక్కడి ఇంజనీర్లు, గ్రాడ్యుయేట్లకు సంతోషాన్ని కలిగించి శుభవార్తను మాత్రం ప్రకటించటం లేదు. అవును రిక్రూట్మెంట్ల విషయంలో కంపెనీలు కఠినంగా ఉన్నాయి. ఐఐటీ, ఐఐఎమ్ వంటి దిగ్గజ విద్యా సంస్థల్లో స్వల్ప రిక్రూట్మెంట్స్ ధోరణి కొనసాగుతోంది.

ప్రస్తుతం ఉన్న గణాంకాల ప్రకారం భారతీయ ఐటీ రంగంలోని కంపెనీల రిక్రూట్మెంట్ 20 ఏళ్ల కనిష్ఠానికి పడిపోయిందని షాకింగ్ నివేదికలు బయటకు వచ్చాయి. ఏడాదిలో దేశీయంగా టెక్ కంపెనీలు 70,000-80,000 ఉద్యోగులను మాత్రమే నియమించుకోవటం అత్యంత తక్కువ నియామకాలను నమోదు చేసింది. అయితే కరోనా సమయమైన 2022 టెక్ ఉద్యోగులకు ఇండియాలోనే కాకుండా ప్రపంచవ్యాప్తంగా మంచి బూమ్ ఏర్పడిన కాలం. ఆ సమయంలో దేశంలోని టెక్ సంస్థలు రికార్డు స్థాయిలో 6 లక్షల మంది ఫ్రెషర్లను నియమించుకున్నాయి.

ఆ తర్వాత 2023లో సైతం దేశీయంగా ఫ్రెషర్ల నియామకం దాదాపు 2.50 లక్షలకు చేరుకున్నాయి. అయితే ఏడాది చివరి త్రైమాసికాల్లో పరిస్థితులు, ఆదాయాలు దిగజారటంతో చాలా కంపెనీలు కొత్త నియామకాలను పూర్తిగా లేదా పాక్షికంగా నిలిపివేశాయి. టీసీఎస్, ఇన్ఫోసిస్, విప్రో, హెచ్సీఎల్ టెక్ వంటి పేరున్న సంస్థలు కూడా క్యాంపస్ రిక్రూట్మెంట్ డ్రైవ్‌లకు దూరంగా నిలిచాయి. ఇలాంటి పరిస్థితుల్లో టైర్-2 నగరాల్లోని ప్రతిభావంతులైన టెక్ ఉద్యోగ ఆశావహులు అనేక ఇబ్బందులను ఎదుర్కొంటున్నారు.