ఐటీ ఫలితాలు: 17 లక్షల కోట్లు ఆవిరి! ఇప్పుడు ఏం జరుగుతుంది?

ఇది భారత ఐటీ కంపెనీల త్రైమాసిక ఫలితాల సీజన్. అందుకే ఇన్వెస్టర్లందరి కళ్లూ ఇప్పుడు వీటిపైనే ఉన్నాయి. భారత ఉద్యోగ మార్కెట్‌కు, స్టాక్ మార్కెట్‌కు ఐటీ రంగమే అతిపెద్ద బలం.

కానీ ఏఐ (AI) రంగం పెరుగుదల కారణంగా ఐటీ రంగ షేర్లన్నీ భారీ పతనాన్ని ఎదుర్కొంటున్నాయి. ఈ తరుణంలో రాబోయే త్రైమాసిక ఫలితాలే ఈ రంగం భవిష్యత్తును నిర్ధారించే కీలక అంశమని ఇన్వెస్టర్లు భావిస్తున్నారు.

భారత అగ్రశ్రేణి ఐటీ సేవల సంస్థలైన టీసీఎస్, ఇన్ఫోసిస్, విప్రో, ఎల్టీఐమైండ్‌ట్రీ షేర్లు వాటి గరిష్ట ధరల నుంచి దాదాపు 50 శాతం వరకు పడిపోయాయి. అంతేకాదు, టాప్ 10 ఐటీ కంపెనీల మార్కెట్ విలువ వాటి గరిష్ట స్థాయి నుంచి ఏకంగా 17 లక్షల కోట్ల రూపాయల వరకు ఆవిరైపోయింది.

ఇప్పుడు ఇన్వెస్టర్ల ముందున్న ఏకైక ప్రశ్న... ఈ త్రైమాసిక ఫలితాల సీజన్‌లోనైనా కోల్పోయిన 17 లక్షల కోట్ల రూపాయలను తిరిగి రాబట్టగలమా, లేదా? అనేది. ఇదే సమయంలో, ఈ క్వార్టర్లీ సీజన్ ఎలా ఉండబోతోందనే దానిపై మోర్గాన్ స్టాన్లీ తన అంచనాలను వెల్లడించింది.

2027 ఆర్థిక సంవత్సరం మొదటి త్రైమాసికంలో (జూన్ క్వార్టర్) ఫలితాలు మందకొడిగా ఉంటాయని, రెండో త్రైమాసికంలో వృద్ధి తక్కువగా నమోదవుతుందని మోర్గాన్ స్టాన్లీ అంచనా వేసింది. అంతేకాదు, 2027 ఆర్థిక సంవత్సరానికి మొత్తం రెవెన్యూ గైడెన్స్ కూడా తగ్గుతుందని, ముఖ్యంగా పెద్ద ఐటీ కంపెనీల ఆదాయ అంచనాల్లో భారీ కోత ఉంటుందని తెలిపింది.

ఉదాహరణకు, టీసీఎస్ రేటింగ్‌ను 'equal-weight'కి తగ్గించింది. టీసీఎస్ షేరు యాక్సెంచర్ కంటే ప్రీమియం ధరలో ట్రేడ్ అవుతోందని, ఇది మొత్తం ఐటీ రంగానికి పెద్ద రిస్క్ అని పేర్కొంది.

ఈ త్రైమాసికంలో భారత పెద్ద ఐటీ కంపెనీల ఆదాయ వృద్ధి కేవలం 1.5 - 3.5 శాతం మధ్యే ఉంటుందని తెలిపింది. అదేవిధంగా, విప్రో ఆదాయం ఈ క్వార్టర్‌లో నెగటివ్‌లో (మైనస్) ఉంటుందని పేర్కొంది.

భారత ఐటీ రంగం ఈ పరిస్థితికి రావడానికి ఏఐ ఒక కారణమైనప్పటికీ, క్లయింట్లు నిర్ణయాలు తీసుకోవడంలో చాలా ఆలస్యం చేస్తుండటం, ధరల పోటీ తీవ్రంగా ఉండటం వంటివి కూడా ప్రధాన కారణాలు. ఏఐ రంగంలో భారీగా పెట్టుబడులు పెట్టాల్సి వస్తోంది. దీంతో, సాధారణంగా వచ్చే ప్రాజెక్టులను దక్కించుకోవడానికి కూడా తీవ్రంగా పోరాడాల్సిన పరిస్థితి ఏర్పడింది.

త్రైమాసిక ఫలితాల విడుదల తేదీలు

టీసీఎస్ (TCS) జూలై 9, ఎల్టీఐ మైండ్‌ట్రీ (LTIMindtree) జూలై 11, హెచ్‌సీఎల్ టెక్నాలజీస్ (HCL Tech) జూలై 13, ఎల్ అండ్ టీ టెక్నాలజీ (LTTS) జూలై 14, విప్రో (Wipro) జూలై 16, టెక్ మహీంద్రా (Tech Mahindra) జూలై 16, టాటా టెక్నాలజీస్ (Tata Tech) జూలై 17, ఇన్ఫోసిస్ (Infosys) జూలై 23, ఎంఫసిస్ (Mphasis) జూలై 23, కోఫోర్జ్ (Coforge) జూలై 27,