IT News: గతం గతహా..!! టెక్కీలకు సినిమా చూపిస్తున్న ఐటీ కంపెనీలు.. ఇకపై బ్యారాల్లేవ్..

IT News: గడచిన కొన్ని సంవత్సరాలుగా ఐటీ బూమ్ పీక్స్ కు చేరుకుంది. ఎవరిని ముట్టుకున్నా సాఫ్ట్‌వేర్ ఉద్యోగం అంటూ నాలుగు రాళ్లు వెనకేసుకున్నారు. కానీ ఇప్పుడు ఆ కారం చెల్లిపోయింది.

ప్రస్తుతం ప్రపంచ మార్కెట్ల పతనంతో దేశీయ టెక్ కంపెనీలు అత్యంత గడ్డు కాలాన్ని చూస్తున్నాయి. వస్తున్న ఆదాయాలకు తగ్గుతున్న మార్జిన్లు తోడుకావటంతో పాటు పెరిగిన ఉద్యోగుల ఖర్చులతో కంపెనీలు రూటు మార్చేశాయి. ఈ క్రమంలో జీతాల పెంపుల కోసం కంపెనీలు మారే టెక్కీలకు కళ్లెం వేస్తున్నాయి.

టీసీఎస్, విప్రో, ఇన్ఫోసిస్, హెచ్సీఎల్ వంటి టాప్ టెక్ దిగ్గజ కంపెనీలు తమ ఉద్యోగులకు అవసరమైన నైపుణ్యాలను నేర్పిస్తూ.. కొత్త నియామకాలను దాదాపుగా తగ్గించేశాయి. దీంతో అట్రిషన్ రేటు తగ్గింది. చాలా మంది ఐటీ ఉద్యోగులు ప్రస్తుతం వారు పనిచేస్తున్న కంపెనీల్లోనే కొనసాగాల్సిన పరిస్థితి ఏర్పడింది. సాధారణంగా ఐటీ రంగంలో వేతన పెంపులు 7-12 శాతం మధ్య ఉంటాయి. అయితే కరోనా కాలంలో టెక్కీలకు డిమాండ్ పెరగటం వల్ల కంపెనీలు ఉద్యోగులను ఆకర్షించేందుకు వారి పాత జీతంపై 30-40 శాతం పెంపును ఆఫర్ చేశాయి. అయితే ఇప్పుడు మాత్రం జీతాల పెంపు కోసం కంపెనీలు మారే ఉద్యోగులకు పెద్దగా ప్రయోజనం ఉండటం లేదు.

కంపెనీలు సైతం ఖర్చుల మదింపులో భాగంగా ఎక్కువ వేతనాలను ఆఫర్ చేసేందుకు సుముఖంగా లేవని పలు నివేదికలు చెబుతున్నాయి. వాస్తవానికి తక్కువ జీతానికైనా ఉద్యోగం దొరికితే చాలని ఫ్రెషర్లు, రెసిషన్ లో ఉద్యోగాలు కోల్పోయిన టెక్కీలు అనుకుంటున్నారు. టీసీఎస్ వంటి కంపెనీలు వార్షిక వ్యాపారంలో 440 మిలియన్ డాలర్లు నష్టపోతున్నందున కొత్త ఉద్యోగులను భారీగా తగ్గించాయి. ఫలితంగా ఐటీ రంగంలో మొత్తం ఉపాధి తగ్గింది. గత కొన్ని నెలలుగా GCC కంపెనీలు మాత్రమే టెక్ ఉద్యోగులను నియమించుకున్నాయి.

ప్రస్తుతం లేబర్ మార్కెట్‌లో టెక్ వర్కర్ల సప్లై పెరిగినప్పటికీ.. ఖాళీల సంఖ్య తక్కువగానే ఉన్నాయి. దీంతో కొత్త కంపెనీలోకి మారే ఉద్యోగులకు ఆఫర్ చేస్తున్న హైక్స్ సగానికి పైగా పడిపోయాయి. ప్రస్తుతం కంపెనీలు ఏఐ, సైబర్ సెక్యూరిటీ, డైటా సైంటిస్టులు, డేటా ఇంజనీర్లు, క్లౌడ్ ఇంజనీరింగ్ వంటి నిపుణులకు మాత్రమే మెరుగైన ప్యాకేజీలను ఆఫర్ చేస్తున్నాయి. చాలా కంపెనీలు కొత్త ప్రాజెక్టులు తగ్గటంతో అనేక మంది ఉద్యోగులను బెంచ్ పై కొనసాగిస్తున్నాయి. పరిస్థితులు రానున్న త్రైమాసికాల్లో వేగంగా మారకపోతే కంపెనీల్లో ఉద్యోగుల ఊచకోత తప్పదని ఈ రంగంలోని నిపుణులు అభిప్రాయపడుతున్నారు.