బంగారంపై కాసుల వర్షం! Gold ETFల్లోకి రికార్డు స్థాయి పెట్టుబడులు.. అసలు కారణం ఇదే!

సాధారణంగా భారతీయులకు బంగారం అంటే ప్రాణం. పెళ్లిళ్లు ఉన్నా, పండగలు వచ్చినా ఫిజికల్ గోల్డ్ కొనడానికే మనం మొగ్గు చూపుతాం. కానీ, మారుతున్న కాలంతో పాటు ఇన్వెస్టర్ల ఆలోచనలు కూడా మారుతున్నాయి. ఇప్పుడు అందరి చూపు Gold ETF (Gold Exchange Traded Funds) వైపు మళ్లింది. 2025 డిసెంబర్ నెలలో భారతీయ గోల్డ్ ఈటీఎఫ్‌లు సృష్టించిన రికార్డులు చూస్తుంటే ట్రేడర్లు సైతం ఆశ్చర్యపోతున్నారు.

డిసెంబర్‌ లో రికార్డు స్థాయి పెట్టుబడులు

వరల్డ్ గోల్డ్ కౌన్సిల్ (WGC) తాజా నివేదిక ప్రకారం.. గడిచిన డిసెంబర్ నెలలో భారతీయ Gold ETF లలోకి ఏకంగా 1.25 బిలియన్ డాలర్లు (సుమారు రూ. 10,400 కోట్లు) నికర పెట్టుబడులు వచ్చాయి. నవంబర్ నెలలో వచ్చిన 379 మిలియన్ డాలర్లతో పోలిస్తే ఇది ఏకంగా 231 శాతం పెరుగుదల కావడం విశేషం. గతేడాది వరుసగా ఏడు నెలల పాటు ఈ ఇన్ ఫ్లోస్ కొనసాగాయి.

ప్రపంచ దేశాలతో పోటీ పడుతున్న భారత్

గోల్డ్ ఈటీఎఫ్‌(Gold ETF) పెట్టుబడుల్లో భారత్ ఇప్పుడు గ్లోబల్ లీడర్‌గా ఎదుగుతోంది. డిసెంబర్ నెలలో ప్రపంచవ్యాప్తంగా అత్యధిక పెట్టుబడులు సాధించిన దేశాల్లో అమెరికా (6.07 బిలియన్ డాలర్లు) మొదటి స్థానంలో ఉండగా, భారత్ రెండో స్థానంలో నిలిచింది. చైనా (545 మిలియన్ డాలర్లు), బ్రిటన్ (515 మిలియన్ డాలర్లు) వంటి దేశాలను భారత్ వెనక్కి నెట్టడం గమనార్హం.

Gold ETF కు ఎందుకు అంత క్రేజ్?

2025 సంవత్సరం ఆసియా గోల్డ్ మార్కెట్‌కు ఒక మైలురాయిగా నిలిచిపోయింది. 2007 నుండి 2024 వరకు వచ్చిన మొత్తం పెట్టుబడుల కంటే.. కేవలం 2025లోనే ఆసియా ఈటీఎఫ్‌లలోకి ఎక్కువ నిధులు రావడం ఒక సంచలనం. బంగార ధరలు గతేడాది 53% పైగా పెరగడమే దీనికి ప్రధాన కారణం.

ఎందుకు అందరూ Gold ETF వైపు చూస్తున్నారు?

• భద్రత: ఫిజికల్ గోల్డ్‌లా దొంగతనాల భయం ఉండదు.
• లిక్విడిటీ: ఎప్పుడు కావాలంటే అప్పుడు స్టాక్ మార్కెట్ పని వేళల్లో సులభంగా విక్రయించుకోవచ్చు.
• ఖచ్చితత్వం: 24 క్యారెట్ల స్వచ్ఛమైన బంగారం ధరలకు అనుగుణంగానే ఇవి పనిచేస్తాయి.
• తక్కువ ఖర్చు: మేకింగ్ ఛార్జీలు లేదా తరుగు వంటి భయాలు ఉండవు.

ముందున్న సవాళ్లు, అవకాశాలు

ప్రస్తుతం అంతర్జాతీయంగా ఉన్న భౌగోళిక ఉద్రిక్తతలు (Geopolitical tensions), ట్రేడ్ వార్స్, డాలర్ విలువ తగ్గడం వంటివి బంగారం ధరలను ఆకాశానికి చేర్చాయి. నిపుణుల అభిప్రాయం ప్రకారం.. అమెరికా సుప్రీంకోర్టు తీర్పులు, వెనిజులా వంటి దేశాల్లో జరుగుతున్న పరిణామాలు బంగారం ధరలపై ప్రభావం చూపే అవకాశం ఉంది.

మొత్తంగా చూస్తే బంగారంలో పెట్టుబడి పెట్టేందుకు గోల్డ్ ఈటీఎఫ్ అనేది ఒక సేఫ్ ఆప్షన్ గా కనిపిస్తుంది. అయితే స్వల్పకాలంలో కొంత ఒడిదుడుకులు (Volatility) ఉన్నప్పటికీ సురక్షితమైన పెట్టుబడిగా Gold ETFకు డిమాండ్ తగ్గేలా కనిపించడం లేదు. మీ పోర్ట్‌ఫోలియోలో కనీసం 10-15% బంగారంలో పెట్టుబడి పెట్టడం ఎప్పుడూ లాభదాయకమేనని ఆర్థిక నిపుణులు సూచిస్తున్నారు.