Alert: మీరూ స్టాక్ మార్కెట్ ఇన్వెస్టరా..?? అయితే ముందుగా ఇది చదవాల్సిందే..

2023-24 ఆర్థిక సంవత్సరం మొదటి త్రైమాసికంలో భారతీయ కార్పొరేట్ కంపెనీల లాభాలు 3.1 శాతం తగ్గాయి. గత ఏడాది ఇదే త్రైమాసికంలో కార్పొరేట్ కంపెనీల లాభాలు 31 శాతం పెరగగా, భారీగా క్షీణించడం నెలవారీ జీతభత్యాల నుంచి పెట్టుబడిదారుల వరకు అందరినీ దిగ్భ్రాంతికి గురి చేసింది. వాస్తవానికి కరోనా మహమ్మారి కాలం కాలం 2020-21 ఆర్థిక సంవత్సరం మొదటి త్రైమాసికం తర్వాత ఇదే అత్యంత చెత్త మొదటి త్రైమాసిక ఫలితాలుగా వెల్లడైంది.

జూలై ప్రారంభమైనప్పటి నుంచి భారతీయ కంపెనీలు తమ జూన్ త్రైమాసిక ఫలితాలను విడుదల చేస్తున్నాయి. ఈ త్రైమాసిక ఫలితాల ఆధారంగా పలు కీలక అంశాలు వెల్లడయ్యాయి. దాదాపు 2,539 కంపెనీల త్రైమాసిక ఫలితాలను గణిస్తే మొత్తం విక్రయాలు రూ.22.9 లక్షల కోట్లకు పెరిగాయి. గతేడాది ఇదే త్రైమాసికంలో రూ.21.7 లక్షల కోట్లుగా ఇది ఉన్నాయి. అలాగే మెుత్తం వ్యయాలు 6.4 శాతం పెరిగి రూ.19.6 లక్షల కోట్లకు చేరుకుంది. బ్యాంక్ ఆఫ్ బరోడా ఆర్థిక శాస్త్ర విభాగం నివేదిక ప్రకారం గత ఏడాది రూ.1.97 లక్షల కోట్లతో పోలిస్తే ఇది 3.1 శాతం తగ్గింది.

ఈ సర్వేలో పాల్గొన్న 2,539 కంపెనీలు దాదాపు 33 రంగాలకు చెందినవి. దేశంలోని 18 రంగాలు సగటు అమ్మకాల వృద్ధి 7.7 శాతం కంటే ఎక్కువగా ఉన్నాయని నివేదిక పేర్కొంది. గత ఏడాది కంటే 22 పరిశ్రమల ఆదాయం మెరుగుపడింది. సీజనల్ డిమాండ్ కారణంగా ముఖ్యంగా వినియోగ వస్తువులు, ఎలక్ట్రానిక్స్, రిటైల్ రంగాలు బలమైన అమ్మకాలను నమోదు చేశాయి. నికర లాభాన్ని పరిశీలిస్తే, దాదాపు 20 రంగాలు సగటున 3.5 శాతం వృద్ధిని సాధించాయి. ఇదే క్రమంలో వినియోగ వస్తువులు, ఆరోగ్య సంరక్షణ సహా 15 రంగాలు మాత్రమే గతేడాది లాభాల వృద్ధిని అధిగమించాయి.

జాతీయ స్టాక్ మార్కెట్లో లిస్టయిన 50 కంపెనీల పన్ను తర్వాత లాభం 4 శాతం పెరిగిందని మోతీలాల్ ఓస్వాల్ తెలిపింది. ప్రభుత్వ రంగ చమురు మార్కెటింగ్ కంపెనీలు మొత్తం పనితీరును ప్రభావితం చేశాయి. చమురు మేజర్లను మినహాయించి, నిఫ్టీ 50 కంపెనీలు 9 శాతం ఆదాయ వృద్ధిని నమోదు చేశాయి. స్థిరమైన వడ్డీ రేట్లు తక్కువ ఉత్పత్తి ఖర్చులు ఉన్నప్పటికీ, భారతీయ కంపెనీల లాభాల వృద్ధి మందగించడం పెట్టుబడిదారులను కలవరపెట్టింది. బలహీనమైన పనితీరు మార్కెట్‌లో డిమాండ్ తక్కువగా ఉండటం ఈ పరిస్థితికి అంతర్లీన కారణమని బ్యాంక్ ఆఫ్ బరోడా పేర్కొంది.