పాసింజర్ వాహన విక్రయాల దూకుడు.. ఆ మూడు కంపెనీలదే మార్కెట్లో హవా..

గడచిన ఆర్థిక సంవత్సరం దేశంలో పాసింజర్ వాహనాల విక్రయాల్లో మంచి వృద్ధి నమోదైంది. ఈ రంగంలోని కంపెనీలను వేధించిన చిప్ కొరత తగ్గడం, స్పోర్ట్ యుటిలిటీ వెహికల్స్(SUVలు) కోసం డిమాండ్ పెరగడం ప్రధాన కారణంగా ఉన్నట్లు సొసైటీ ఆఫ్ ఇండియన్ ఆటోమొబైల్ మ్యానుఫ్యాక్చరర్స్(SIAM) డేటా వెల్లడించింది.

ఈ కారణంగా 2022-23 ఆర్థిక సంవత్సరంలో ప్యాసింజర్ వాహనాల అమ్మకాలు ఏకంగా 26.7 శాతం పెరిగాయి. 2023 ఆర్థిక సంవత్సరంలో హోల్‌సేల్ ప్యాసింజర్ వాహనాల వాల్యూమ్‌ 3.9 మిలియన్ యూనిట్లుగా నమోదయ్యాయి. ఈ సంఖ్య గత ఏడాది 3.1 మిలియన్ యూనిట్లుగా ఉన్నాయి. ఈ క్రమంలో మార్చిలో 3.61 లక్షల యూనిట్లు తయారు కాగా.. వాటిలో 2.92 లక్షల యూనిట్లు దేశీయంగానే మార్చిలో అమ్ముడయ్యాయి.

ప్రధానంగా దేశీయ మార్కెట్లో మారుతీ సుజుకీ, హ్యుందాయ్, టాటా మోటార్స్ కంపెనీలు అత్యధికంగా కార్లను సప్లై చేశాయి. అమ్మకాల పరంగా మారుతీ, హ్యుందాయ్ కంపెనీలు మెుదటి స్థానాల్లో కొనసాగుతున్నాయి. FADA డేటా ప్రకారం 2-వీలర్లు 12 శాతం, 3-వీలర్లు 69 శాతం, ప్యాసింజర్ వాహనాలు 14 శాతం, వాణిజ్య వాహనాలు 10 శాతం అమ్మకాల వృద్ధిని నమోదు చేశాయి. ట్రాక్టర్లు మాత్రమే 4 శాతం అమ్మకాల వృద్ధిని నమోదు చేశాయి.