దిమ్మతిరిగే నష్టాలు నమోదు చేసిన Axis Bank.. ఆందోళనలో ఇన్వెస్టర్లు..!

Axis Bank Q4 Results: దేశీయ ప్రైవేటు బ్యాంకింగ్ దిగ్గజాల్లో ఒకటైన యాక్సిస్ బ్యాంక్ ఈరోజు తన నాలుగో త్రైమాసిక ఫలితాలను విడుదల చేసింది. అయితే ఈ ఫలితాలను చూసిన చాలా మంది నోరెళ్లబెడుతున్నారు.

అవును ప్రైవేటు దిగ్గజ రుణదాత యాక్సిస్ మార్చితో ముగిసిన త్రైమాసికంలో ఏకంగా రూ.5,728.42 కోట్లు నష్టాన్ని నమోదు చేసింది. అయితే దీనిని చూసిన చాలా మంది ఆందోళన చెందుతున్నారు. అసలు లాభాల్లో ఉండాల్సిన బ్యాంక్ ఎందుకు ఇంత భారీ నష్టాలను నమోదు చేసిందోనని అర్థం కాక గందరగోళానికి గురవుతున్నారు.

గత ఆర్థిక సంవత్సరం ఇదే కాలంలో దిగ్గజ బ్యాంక్ రూ.4,117.77 కోట్ల లాభాన్ని ఆర్జించింది. మార్చితో ముగిసిన త్రైమాసికంలో బ్యాంక్.. నికర వడ్డీ ఆదాయం, ఆర్జించిన వడ్డీకి- ఖర్చు చేసిన వడ్డీకి మధ్య వ్యత్యాసం ఏడాది ప్రాతిపదికన 33.1 శాతం పెరిగి త్రైమాసికానికి రూ.11,742.2 కోట్లకు చేరుకుంది. అయితే తాజా నష్టాలకు సిటీ బ్యాంక్ ఇండియా కన్స్యూమర్ బిజినెస్ కొనుగోలు చేయటమే ప్రధాన కారణమని వెల్లడించింది.

బ్యాంక్ నివేదించిన ఖర్చులను పరిశీలిస్తే.. సిటీ ఇండియా కన్స్యూమర్ బిజినెస్ కొనుగోలుకు సంబంధించి వన్-టైమ్ స్టాంప్ డ్యూటీ కోసం రూ.179.27 కోట్లను వెచ్చించింది. దీనికి తోడు ఆర్థిక నివేదికల తయారీలో ఉపయోగించే ప్రొవిజనింగ్, వ్యయ విధానాలు మరియు/లేదా అంచనాల సమన్వయం కోసం రూ.361.47 కోట్లు ఖర్చు చేసినట్లు బ్యాంక్ తెలిపింది.

మార్చితో ముగిసిన త్రైమాసికంలో బ్యాంక్ వడ్డీయేతర ఆదాయం రూ. 4,895.3 కోట్లుగా నమోదు చేసింది. అదే కాలానికి ప్రీ-ప్రొవిజన్ నిర్వహణ లాభం 41.8 శాతం పెరిగి రూ.9,167.6 కోట్లకు చేరుకుంది. అలాగే 2022-23 ఆర్థిక సంవత్సరంలో లాభం 26.5 శాతం క్షీణించి రూ.9,580 కోట్లకు చేరుకుంది. గత ఏడాదితో పోలిస్తే నికర వడ్డీ ఆదాయం 30 శాతం పెరిగి రూ.42,946 కోట్లకు చేరుకుంది. 2022-23 ఆర్థిక సంవత్సరానికి ఒక్కో షేరుకు రూ.1 తుది డివిడెండ్‌ను బోర్డు సిఫార్సు చేసినట్లు బ్యాంక్ తెలిపింది.