అంతర్జాతీయ ఆర్థికవ్యవస్థపై రష్యా-ఉక్రెయిన్ యుద్ధ ప్రభావం, భారత్‌కు చమురు 'డబుల్' భారం

ఉక్రెయిన్‌పై రష్యా యుద్ధం నేపథ్యంలో పాశ్చాత్య దేశాలు రష్యా మీద విధిస్తున్న ఆంక్షల వల్ల అంతర్జాతీయ మందగమనం ఏర్పడే పరిస్థితి లేదు. ఇందుకు కారణం ఈ రెండు దేశాల ప్రపంచ స్థూల దేశీయ ఉత్పత్తిలో రెండు శాతం వాటా కంటే తక్కువగా ఉంది. అలాగే, చాలా ప్రాంతీయ ఆర్థిక వ్యవస్థలు బలంగా ఉన్నాయి. ఇటీవల కరోనా నుండి క్రమంగా పుంజుకుంటున్నాయి. అయితే కొన్ని దేశాలు, పరిశ్రమలపై తాజా పరిణామాలు ప్రతికూల ప్రభావాన్ని చూపుతాయని, ఆర్థిక నష్టాన్ని కలుగజేస్తాయని అంటున్నారు. లక్షలాదిమంది ఇబ్బంది పడతారు.

ధరలు పెరిగే అవకాశం

ప్రపంచంలో మూడో అతిపెద్ద పెట్రోలియం ఉత్పత్తిదారు, సహజవాయు ప్రధాన ఎగుమతిదారు రష్యా. ఉక్రెయిన్ నుండి వ్యవసాయ ఆహార ఉత్పత్తుల్ని ప్రపంచవ్యాప్తంగా ఎన్నో దేశాలు దిగుమతి చేసుకుంటున్నాయి. ఈ దేశం ప్రపంచంలోనే అతిపెద్ద గోధుమ పంట ఎగుమతిదారు. సన్ ఫ్లవర్ ఆయిల్స్ ఎగుమతిలోను ముందు ఉంది. ఇవి నిలిచిపోతే ఆహార ధరలు భారీగా పెరిగే అవకాశముంది. ఇప్పటికే రష్యా-ఉక్రెయిన్ యుద్ధం నేపథ్యంలో మనవద్ద నూనె ధరలు పెరిగాయి.

ఐరోపా ఆర్థిక రికవరీకి చిక్కులు

వివిధ దేశాల కేంద్ర బ్యాంకులు కరోనా తగ్గిన నేపథ్యంలో వడ్డీ రేట్లను పెంచాలని భావిస్తున్నాయి. ప్రస్తుత పరిస్థితుల్లో వడ్డీ రేట్లపై పెంపుపై పునరాలోచన చేసే అవకాశాలు ఉన్నాయి. మరోవైపు, ప్రస్తుత రష్యా - ఉక్రెయిన్ యుద్ధం యూరోప్ ఆర్థిక రికవరీపై ప్రభావం చూపవచ్చు. ఇప్పటికే అక్కడ చమురు ధరలు గరిష్టాల వద్ద ఉన్నాయి. రష్యా నుండి నలభై శాతం సహజ వాయువును ఐరోపా పొందుతోంది. ఈ వనరుల సరఫరాలో ఇబ్బందులు కలిగితే ఆర్థిక వ్యవస్థకు చిక్కులు తప్పవు.

ధరలు పెరిగి తగ్గుదల...

అంతర్జాతీయ మార్కెట్లో క్రూడాయిల్ ధరలు ఇటీవల తగ్గుతున్నాయి. నాలుగు రోజుల క్రితం 100 డాలర్లను కూడా క్రాస్ చేసింది. ప్రస్తుతం వెస్ట్ టెక్సాస్ ఇంటర్మీడియేట్ 91.93 డాలర్లు, బ్రెంట్ క్రూడ్ 94.51 డాలర్ల వద్ద ట్రేడ్ అయింది.

చమురు బిల్లు భారం

పెరిగిన చమురు ధరల నేపథ్యంలో భారత్‌పై గత ఏడాదితో పోలిస్తే బిల్లు రెండింతలు అయ్యే అవకాశాలున్నాయి. మార్చి 31వ తేదీ నాటికి బిల్లు 100 బిలియన్ డాలర్లు దాటనుందని తెలుస్తోంది. అంతర్జాతీయ ముడిధరలు పెరగడమే ఇందుకు కారణం. గత ఏడాది ఇదే నెలలో చమురు దిగుమతులకు భారత్ 7.7 బిలియన్ డాలర్లు వెచ్చించింది. కానీ జనవరి నెలలో ఏకంగా 11.6 బిలియన్ డాలర్లు చెల్లించవలసి వచ్చింది. ఇప్పుడు ఫిబ్రవరిలో బ్యారెల్ చమురు ధర 90 డాలర్ల నుండి 100 డాలర్లు దాటిన నేపథ్యంలో ఈ బిల్లు 115 బిలియన్ డాలర్లకు చేరుకోవచ్చునని అంచనా.