కరోనా దెబ్బ, భారత వృద్ధి రేటు 23.9% ప్రతికూలత

2020-21లో భారత వృద్ధిరేటు దారుణంగా పతనమైంది. ఏప్రిల్-జూన్ త్రైమాసికంలో 23.9 శాతం మేర ప్రతికూలత నమోదు చేసింది. కరోనా మహమ్మారి, లాక్ డౌన్ కారణంగా ఆర్థిక కార్యకలాపాలు పూర్తిగా నిలిచిపోయాయి. దీంతో వృద్ధి రేటు దశాబ్దాల కనిష్టానికి చేరుకుంటుందని ఇప్పటికే ఆర్థిక నిపుణులు అంచనా వేశారు. ఈ అంచనాలకు అనుగుణంగా వృద్ధి రేటు దారుణంగా పడిపోయింది.

స్టాటిస్టిక్స్ మినిస్ట్రీ డేటా ప్రకారం గత ఏడాది ఇదే క్వార్టర్‌త పోలిస్తే 23.9 శాతం మేర క్షీణించింది. 1996లో క్వార్టర్ జీడీపీ లెక్కలు ప్రారంభించినప్పటి నుండి మొదటిసారి దారుణ క్షీణత నమోదు చేస్తుందని ఆర్థికవేత్తలు ముందు నుండి చెబుతున్నారు. జీడీపీ 19.2 శాతం క్షీణత నమోదు చేస్తుందని బ్లూమ్‌బర్గ్ సర్వేలో ఆర్థికవేత్తలు అంచనా వేశారు. దీనిని మించి ప్రతికూలత నమోదు చేసింది.

జనవరి-మార్చి క్వార్టర్‌లో వృద్ధిరేటు 3.1 శాతంగా నమోదయింది. ఏడాది ప్రాతిపదికన ఇది 17 ఏళ్ల కనిష్టం. 2019-20 ఆర్థిక సంవత్సరం జూన్ క్వార్టర్‌లో 5.2 శాతం వృద్ధిని నమోదు చేసింది.