Real Estate: సామాన్యుడికి దూరమవుతున్న 3BHK కల.. కొత్త రిపోర్టులో విస్తుపోయే నిజాలు!

భారతదేశంలోని మెట్రో నగరాల్లో సొంత ఇల్లు, ముఖ్యంగా 3BHK ఫ్లాట్ కొనడం అనేది ఇప్పుడు ఒక అసాధ్యమైన పనిగా మారుతోంది. పెరిగిన డిమాండ్, అంతకు మించి పెరిగిన ధరలు మధ్యతరగతి కుటుంబాల బడ్జెట్‌ను తలకిందులు చేస్తున్నాయి. 'స్క్వేర్ యార్డ్స్' (Square Yards) సంస్థ ఇటీవల విడుదల చేసిన "ఫ్రమ్ ఆస్పిరేషన్ టు రియాలిటీ" అనే నివేదిక ప్రకారం.. ప్రధాన నగరాల్లో రియల్ ఎస్టేట్ మార్కెట్ ముఖచిత్రం పూర్తిగా మారిపోయింది.

మారిన అవసరాలు - పెరిగిన ధరలు

కోవిడ్-19 మహమ్మారి తర్వాత ప్రజల ఆలోచనా విధానంలో మార్పు వచ్చింది. ఇల్లు అంటే కేవలం నివసించే చోటు మాత్రమే కాదు, అది ఆఫీసుగా, క్లాస్‌రూమ్‌ గా, వినోద కేంద్రంగా మారిపోయింది. అందుకే ఇప్పుడు చాలా మంది పెద్ద ఇళ్లను, ముఖ్యంగా 3BHK ఫ్లాట్లను కోరుకుంటున్నారు. అయితే ఈ డిమాండ్‌ను ఆసరాగా చేసుకుని ధరలు భారీగా పెరిగాయి. ఐదు ప్రధాన నగరాల్లో ఒక కొత్త 3BHK సగటు ధర ఇప్పుడు దాదాపు రూ. 2.7 కోట్లకు చేరుకుంది.

ఆదాయానికి - ధరలకు మధ్య అగాధం

ఒక కుటుంబం ఏడాదికి రూ. 23 లక్షలు సంపాదిస్తున్నా, ఆ 3BHK ఫ్లాట్ కొనాలంటే తమ మొత్తం ఆదాయాన్ని కనీసం 12 ఏళ్ల పాటు దాచాల్సి ఉంటుంది. అంటే తిండి, బట్టలు, చదువు, వైద్యం వంటి నిత్యవసర ఖర్చులను పక్కన పెడితేనే ఇది సాధ్యం. దేశంలో ఏడాదికి రూ. 22 లక్షల కంటే ఎక్కువ సంపాదించే వారు కేవలం ఒక శాతం మందే ఉన్నారు. అంటే దేశంలోని టాప్ 1% ధనవంతులకు కూడా 3BHK కొనడం ఇప్పుడు భారంగా మారుతోందన్నమాట. ప్రస్తుతం మార్కెట్‌ లో ఉన్న ఇళ్ల సరఫరాలో కేవలం 11% మాత్రమే సరసమైన ధరల్లో ఉన్నాయి, మిగిలిన 89% ప్రీమియం విభాగంలోనే ఉండటం రియల్ ఎస్టేట్ (Real Estate) రంగంలోని అసమానతలను చూపుతోంది.

హైదరాబాద్, ఇతర నగరాల్లో పరిస్థితి

ఈ నివేదిక ప్రకారం వివిధ నగరాల్లో పరిస్థితులు భిన్నంగా ఉన్నాయి:

• Hyderabad: ఇక్కడ నగరం వేగంగా విస్తరించడంతో, ఆదాయం కంటే ఇళ్ల ధరలు చాలా వేగంగా పెరిగాయి.
• Bengaluru: ఐటీ హబ్ అయిన బెంగళూరులో ఆదాయం, ప్రాపర్టీ ధరల పెరుగుదల మధ్య కొంత సమతుల్యత కనిపిస్తోంది.
• Mumbai & Delhi-NCR: ఇక్కడ ఒకే నగరంలో ప్రాంతాన్ని బట్టి ధరల్లో భారీ వ్యత్యాసాలు ఉన్నాయి.
• Pune: నగర కేంద్ర ప్రాంతాల్లో ధరలు పెరగడంతో కొనుగోలుదారులు శివారు ప్రాంతాల (Peripheral areas) వైపు మొగ్గు చూపుతున్నారు.

కొనుగోలుదారులకు నిపుణుల సలహా

ప్రాంతాన్ని జాగ్రత్తగా ఎంచుకోవడం ద్వారా రూ. 30 లక్షల నుండి రూ. 60 లక్షల వరకు ఆదా చేయవచ్చని నిపుణులు చెబుతున్నారు. సంపన్న వర్గాలు, ఇన్వెస్టర్లు సిటీ సెంటర్లలో పెట్టుబడి పెడుతుండగా.. సామాన్య కొనుగోలుదారులు అభివృద్ధి చెందుతున్న శివారు ప్రాంతాలను ఎంచుకోవడం ఉత్తమమని 'స్క్వేర్ యార్డ్స్' సీఈఓ తనుజ్ షోరీ సూచించారు. రియల్ ఎస్టేట్ (Real Estate) లో పెట్టుబడి పెట్టే ముందు హోమ్ లోన్ సామర్థ్యం, భవిష్యత్తు అవసరాలు అలాగే మీ బడ్జెట్‌ ను క్షుణ్ణంగా అంచనా వేసుకోవడం ఇప్పడు అత్యంత ముఖ్యం.