సామాన్యులు ఇల్లు కొనాలనే ఆశలు వదిలేసుకోండి.. రాబోయే కొన్ని సంవత్సరాల్లో ఇళ్ల ధరలకు రెక్కలు

India real estate outlook: భారతదేశంలో గృహ డిమాండ్ నిరంతరంగా పెరుగుతుండటంతో.. రాబోయే కొన్ని సంవత్సరాల్లో ఇళ్ల ధరలు సంవత్సరానికి 5 నుండి 10 శాతం మేర పెరిగే అవకాశం ఉందని పరిశ్రమల సమాఖ్య CII (Confederation of Indian Industry), ప్రాపర్టీ కన్సల్టెంట్ కొలియర్స్ ఇండియా సంయుక్త నివేదిక తెలిపింది. రియల్ ఎస్టేట్ @ 2047: బిల్డింగ్ ఇండియాస్ ఫ్యూచర్ గ్రోత్ కారిడార్స్ అనే శీర్షికతో విడుదలైన ఈ నివేదికను గురువారం ముంబైలో రోడ్డు రవాణా, రహదారుల మంత్రిత్వ శాఖ డిప్యూటీ సెక్రటరీ హర్లీన్ కౌర్ ఆవిష్కరించారు.

ఈ నివేదిక ప్రకారం ప్రస్తుతం భారతదేశంలో వార్షిక గృహ అమ్మకాలు సుమారు 3-4 లక్షల యూనిట్లుగా ఉండగా.. 2047 నాటికి ఈ సంఖ్య 10 లక్షల యూనిట్లకు (1 మిలియన్) పెరుగుతుందని అంచనా వేస్తోంది. పెరుగుతున్న ఆదాయాలు, జనాభా మార్పులు, పట్టణీకరణ వేగవంతం కావడం, అలాగే ప్రభుత్వ గృహ విధానాలు ఈ వృద్ధికి ప్రధాన అంశాలుగా పేర్కొన్నారు.

కొలియర్స్ ఇండియా నివేదికలో పేర్కొన్నట్లుగా.. ఆదాయ స్థాయిలు పెరుగుతుండటం, పట్టణ వలసలు, ప్రీమియం హౌసింగ్ డిమాండ్ కారణంగా రాబోయే కొన్ని సంవత్సరాలలో సగటు ఆస్తి ధరలు ఏటా 5 నుంచి 10 శాతం పెరుగుతాయి. మెరుగైన మౌలిక సదుపాయాలు, గృహ కొనుగోలుదారులకు ప్రభుత్వ ప్రోత్సాహకాలు, ప్రసిద్ధ డెవలపర్లకు పెరుగుతున్న ప్రాధాన్యత కూడా ఈ వృద్ధికి దోహదపడతాయి. ఈ నివేదికలో మరో ముఖ్యాంశం ఏమిటంటే.. రియల్ ఎస్టేట్ మార్కెట్ పరిమాణం 2025 నాటికి 0.3 ట్రిలియన్ డాలర్లుగా ఉండగా.. 2047 నాటికి అది 5 నుంచి 10 ట్రిలియన్ డాలర్ల స్థాయికి పెరగవచ్చని అంచనా వేస్తోంది. ఇది భారత ఆర్థిక వ్యవస్థలో రియల్ ఎస్టేట్ రంగం ఎంత వేగంగా విస్తరిస్తోందో స్పష్టం చేస్తోంది.

టైర్ II, టైర్ III నగరాలు.. ముఖ్యంగా ఆధ్యాత్మిక, పారిశ్రామిక, వాణిజ్య కేంద్రాలు, రాబోయే దశాబ్దాల్లో గృహ డిమాండ్‌లో స్థిరమైన పెరుగుదల చూపే అవకాశం ఉంది. మౌలిక సదుపాయాల అభివృద్ధి, కొత్త రహదారులు, ఎక్స్‌ప్రెస్‌వేలు, పారిశ్రామిక కారిడార్లు పట్టణాల విస్తరణకు, అలాగే చుట్టుపక్కల ప్రాంతాల భూవినియోగంలో మార్పులకు దారితీస్తాయని నివేదిక పేర్కొంది. భారతదేశం యొక్క మౌలిక సదుపాయాల విస్తరణ కొత్త వృద్ధి కారిడార్‌లను తెరవడంతో పాటు, రియల్ ఎస్టేట్ భూభాగాన్ని పునర్నిర్మిస్తోంది. టైర్ II & III నగరాలు ఇప్పుడు రాబోయే ఆర్థిక వృద్ధికి కేంద్ర బిందువులుగా మారుతున్నాయని హర్లీన్ కౌర్ పేర్కొన్నారు.

సిగ్నేచర్ గ్లోబల్ ఇండియా లిమిటెడ్ వ్యవస్థాపకుడు, చైర్మన్ ప్రదీప్ అగర్వాల్ మాట్లాడుతూ.. స్థిరమైన వృద్ధిని నిర్ధారించడానికి, రియల్ ఎస్టేట్, మౌలిక సదుపాయ రంగాలు నిరంతరం సాంకేతిక పరిజ్ఞానాన్ని పెంపొందించుకోవాలని అన్నారు. కొలియర్స్ ఇండియా సీఈఓ, మేనేజింగ్ డైరెక్టర్ బాదల్ యాగ్నిక్ మాట్లాడుతూ.. రియల్ ఎస్టేట్ రంగంలో జరుగుతున్న పరివర్తన భవిష్యత్తులో కొత్త ఆస్తి తరగతుల పెరుగుదలకు దారితీస్తుంది. ఆఫీస్, రెసిడెన్షియల్, ఇండస్ట్రియల్ & వేర్‌హౌసింగ్‌తో పాటు డేటా సెంటర్లు, షేర్డ్ లివింగ్ వంటి విభాగాల్లో విస్తృత వృద్ధి కనిపిస్తుందని చెబుతున్నారు.

క్లుప్తంగా చెప్పాలంటే భారత రియల్ ఎస్టేట్ రంగం ప్రస్తుతం వేగవంతమైన అభివృద్ధి దశలో ఉంది. గృహ డిమాండ్ పెరుగుదల, పెట్టుబడిదారుల నమ్మకం, ప్రభుత్వం తీసుకుంటున్న సంస్కరణలు అన్నీ కలిసి భారత గృహ మార్కెట్‌ను రాబోయే సంవత్సరాల్లో స్థిరమైన 5 నుంచి 10 శాతం వార్షిక ధరల పెరుగుదలదిశగా నడిపిస్తున్నాయని చెప్పవచ్చు.