ఇరాన్-ఇజ్రాయెల్ యుద్ధంపై తొలిసారిగా స్పందించిన ప్రధాని మోదీ.. భారత్‌కు తీవ్ర ఆందోళన కలిగించే అంశమంటూ..

పశ్చిమాసియాలో పరిస్థితులు నివురుగప్పిన నిప్పులా మారాయి. ఇరాన్ మీద అమెరికా- ఇజ్రాయెల్ దాడులు ప్రపంచ వ్యాప్తంగా ఆందోళనకర పరిస్థితులకు దారి తీస్తున్నాయి. ఈ దాడులపై భారత్ ఆచితూచి అడుగులు వేస్తోంది. దౌత్య సంబంధాలే లక్ష్యంగా పనిచేస్తోంది. అమెరికా-ఇరాన్ మధ్య యుద్ధ ఉద్రిక్తతలు తీవ్రంగా మారుతున్న నేపథ్యంలో భారత ప్రధాని నరేంద్ర మోదీ సోమవారం ఈ అంశంపై తొలిసారిగా స్పందించారు.

పశ్చిమాసియాలో నెలకొన్న పరిస్థితిలు భారతదేశానికి తీవ్ర ఆందోళన కలిగించే అంశంగా ఉన్నాయని తెలిపారు. ఈ ప్రాంతంలో పెరుగుతున్న ఘర్షణలు కేవలం ప్రాంతీయ సమస్యగానే కాకుండా, ప్రపంచ శాంతి, ఆర్థిక స్థిరత్వం, ఇంధన సరఫరాలు, భారత పౌరుల భద్రతపై కూడా ప్రభావం చూపే అవకాశముందని ఆయన స్పష్టం చేశారు.ప్రధానమంత్రి మోదీ మాట్లాడుతూ.. ప్రపంచంలో ఎక్కడైనా యుద్ధాలు లేదా ఘర్షణలు చోటు చేసుకున్నప్పుడు భారతదేశం ఎల్లప్పుడూ శాంతి, స్థిరత్వం, దౌత్యపరమైన పరిష్కారాలకే మద్దతు ఇస్తుందని చెప్పారు.

ప్రపంచవ్యాప్తంగా కొనసాగుతున్న అనేక ఉద్రిక్తతలపై భారతదేశం వైఖరి స్పష్టంగా ఉంది. మేము ఎల్లప్పుడూ శాంతి, స్థిరత్వాన్ని కాపాడుకోవాలని పిలుపునిచ్చాము. రెండు ప్రజాస్వామ్య దేశాలు కలిసి నిలబడినప్పుడు, శాంతి కోసం వినిపించే స్వరం మరింత బలపడుతుందని ఆయన వ్యాఖ్యానించారు.

పశ్చిమాసియా ప్రాంతంలో పరిస్థితులు వేగంగా మారుతున్న నేపథ్యంలో, అక్కడ నివసిస్తున్న లేదా పనిచేస్తున్న భారతీయ పౌరుల భద్రతకు అత్యున్నత ప్రాధాన్యత ఇస్తామని ప్రధాని మోదీ హామీ ఇచ్చారు. చర్చలు, దౌత్య మార్గాల ద్వారా అన్ని వివాదాలకు పరిష్కారం కనుగొనడానికే భారతదేశం మద్దతు ఇస్తుంది. ఈ ప్రాంతంలోని భారతీయుల భద్రతను నిర్ధారించడానికి అన్ని దేశాలతో కలిసి పనిచేయడం కొనసాగిస్తామని ఆయన తెలిపారు.

ఈ నేపథ్యంలో.. ప్రధాని మోదీ బెంజమిన్ నెతన్యాహుకు ఫోన్ చేసి తాజా పరిస్థితులపై చర్చించారు. ఈ సంభాషణలో పౌరుల భద్రతే అత్యంత కీలకమని స్పష్టం చేస్తూ, శత్రుత్వాలను వెంటనే తగ్గించాల్సిన అవసరం ఉందని ఆయన నొక్కి చెప్పారు. యుద్ధం కొనసాగితే నిరపరాధ పౌరులు ఎక్కువగా నష్టపోతారని పేర్కొంటూ.. పోరాటాన్ని వీలైనంత త్వరగా ముగించాల్సిన అవసరం ఉందని మోదీ పునరుద్ఘాటించారు.

అలాగే మరో ప్రకటనలో ప్రధాని మోదీ యునైటెడ్ అరబ్ ఎమిరేట్స్ (UAE)లో ఇటీవల జరిగిన పరిణామాలపై కూడా స్పందించారు. తాను యుఎఇ అధ్యక్షుడు మొహమ్మద్ బిన్ జాయెద్ అల్ నహ్యాన్ తో మాట్లాడినట్లు వెల్లడించారు. యుఎఇపై జరిగిన దాడులను భారత్ తీవ్రంగా ఖండిస్తోందని.. ప్రాంతీయ స్థిరత్వానికి అవి ముప్పుగా మారుతాయని ఆయన తెలిపారు. యుఎఇతో భారత్‌కు ఉన్న వ్యూహాత్మక, ఆర్థిక, ప్రజల మధ్య సంబంధాలు ఎంతో కీలకమైనవని కూడా ఆయన గుర్తుచేశారు.

క్లుప్తంగా చెప్పాలంటే అమెరికా-ఇరాన్ యుద్ధం నేపథ్యంలో ప్రధాని మోదీ చేసిన వ్యాఖ్యలు India యొక్క స్పష్టమైన విదేశాంగ విధానాన్ని ప్రతిబింబిస్తున్నాయి. యుద్ధం కంటే శాంతి, ఘర్షణల కంటే సంభాషణలు, ప్రతీకార చర్యల కంటే దౌత్యమే సరైన మార్గమని భారత్ మరోసారి ప్రపంచానికి సందేశం ఇచ్చింది. పశ్చిమాసియాలో పరిస్థితులు ఎలా మారతాయన్నది చూడాల్సి ఉన్నా, ఈ సంక్షోభాన్ని శాంతియుతంగా పరిష్కరించేందుకు భారతదేశం తన వంతు పాత్రను పోషించేందుకు సిద్ధంగా ఉందని ప్రధాని మోదీ వ్యాఖ్యలు స్పష్టం చేస్తున్నాయి.