Trade deal: చమురు యుద్ధంలో కొత్త మలుపు! రష్యాను వదిలి వెనిజులా వైపు భారత్ అడుగులు!

గత కొన్నేళ్లుగా భారతదేశం తన చమురు అవసరాల కోసం రష్యాపై ఎక్కువగా ఆధారపడుతోంది. అయితే అమెరికా అధ్యక్షుడిగా డొనాల్డ్ ట్రంప్ బాధ్యతలు చేపట్టాక అంతర్జాతీయ రాజకీయ ముఖచిత్రం వేగంగా మారుతోంది. ముఖ్యంగా రష్యా నుండి చమురు కొనుగోళ్లను తగ్గించి.. దానికి బదులుగా వెనిజులా , అమెరికా నుండి చమురును దిగుమతి చేసుకోవాలని ట్రంప్ యంత్రాంగం భారత్‌పై ఒత్తిడి పెంచుతోంది. ఈ నేపథ్యంలో కుదిరిన కొత్త వాణిజ్య ఒప్పందం (Trade deal) మన ఇంధన భవిష్యత్తును ఎలా మార్చబోతోందో ఇప్పుడు చూద్దాం.

2022లో ఉక్రెయిన్ యుద్ధం మొదలైనప్పటి నుండి పాశ్చాత్య దేశాలు రష్యాపై ఆంక్షలు విధించాయి. కానీ, భారత్ మాత్రం తన వినియోగదారుల ప్రయోజనాల కోసం రష్యా నుండి తక్కువ ధరకే చమురును కొనుగోలు చేస్తూ వస్తోంది. గత ఏడాది (2024-25) గణాంకాల ప్రకారం.. భారత్ మొత్తం చమురు దిగుమతుల్లో 36% వాటా రష్యాదే. అయితే ట్రంప్ రాకతో ఈ పరిస్థితి మారుతోంది. రష్యా వార్ మెషీన్‌ కు నిధులు సమకూరుస్తున్నారంటూ భారత్‌పై విమర్శలు చేస్తూనే, వెనిజులా వైపు మొగ్గు చూపాలని ఆయన సూచిస్తున్నారు.

వెనిజులా ఆయిల్: పాత బంధం.. కొత్త ఆశలు!

ఒక దశాబ్దం క్రితం భారత్ వెనిజులా నుండి భారీగా చమురును దిగుమతి చేసుకునేది. 2013లో దాదాపు $13 బిలియన్ల విలువైన చమురును కొన్నాం. కానీ అమెరికా ఆంక్షల వల్ల అది 2024 నాటికి కేవలం 0.3 శాతానికి పడిపోయింది. ఇప్పుడు వెనిజులాలో రాజకీయ మార్పులు రావడం, అక్కడ ట్రంప్ అనుకూల వాతావరణం ఏర్పడటంతో మళ్ళీ అక్కడి నుండి చమురు తెచ్చుకునే అవకాశం కనిపిస్తోంది.

అమెరికా అధ్యక్షుడు ట్రంప్ స్వయంగా మాట్లాడుతూ.. "భారత్ ఇకపై రష్యాకు బదులుగా వెనిజులా నుండి చమురు కొంటుంది" అని ప్రకటించారు. దీనికోసం ప్రత్యేకమైన ఒప్పందాన్ని (Trade deal) కూడా ఖరారు చేసినట్లు సమాచారం.

రిలయన్స్ వంటి దిగ్గజాలకు పండగే!

వెనిజులా నుండి వచ్చే ముడి చమురు చాలా 'హెవీ'గా (Heavy crude) ఉంటుంది. దీనిని శుద్ధి చేయాలంటే అత్యాధునిక రిఫైనరీలు కావాలి. భారత్‌లో రిలయన్స్ ఇండస్ట్రీస్ (Reliance Industries) కి అటువంటి సామర్థ్యం ఉంది. గతంలో కూడా రిలయన్స్ వెనిజులా నుండి పెద్ద ఎత్తున చమురును కొనేది. ఇప్పుడు అమెరికా ఆంక్షలు సడలిస్తే, తాము మళ్ళీ వెనిజులా ఆయిల్ కొనడానికి సిద్ధమని రిలయన్స్ ఇప్పటికే స్పష్టం చేసింది. దీనివల్ల మన దేశానికి చమురు సరఫరాలో వైవిధ్యం (Diversification) రావడమే కాకుండా ఇంధన భద్రత కూడా లభిస్తుంది.

ఏది ఏమైనా ట్రంప్ ఒత్తిడి వల్ల భారత్ రష్యాను పూర్తిగా వదులుకుంటుందా? లేదా? అనేది ఇంకా స్పష్టంగా తెలియదు. ఎందుకంటే రష్యా చమురు ఇప్పటికీ భారత్‌ కు ఆర్థికంగా చాలా లాభదాయకం. అయితే వెనిజులా మార్కెట్ ఓపెన్ అవ్వడం వల్ల భారత్‌కు మరిన్ని ప్రత్యామ్నాయాలు దొరుకుతాయి. ఇది అంతర్జాతీయ మార్కెట్లో చమురు ధరలపై బేరమాడేందుకు భారత్‌ కు అదనపు శక్తిని ఇస్తుంది. రాబోయే రోజుల్లో మోదీ ప్రభుత్వం ఈ ట్రేడ్ డీల్ (Trade deal) లోని అంశాలను ఎలా అమలు చేస్తుందో చూడాలి.