జీతం పెరిగినా చిల్లి గవ్వ మిగలడం లేదా? మధ్యతరగతిని ముంచేస్తున్న కొత్త ట్రాప్ ఇదే!

మన దేశంలో మధ్యతరగతి కుటుంబాల పరిస్థితి ఇప్పుడు 'పైన పటారం.. లోన లోటారం' అన్నట్టుగా తయారైంది. బయటకు చూస్తే ఐదంకెల జీతాలు, చేతిలో క్రెడిట్ కార్డులు, అద్దాల మేడల్లో ఉద్యోగాలు కనిపిస్తున్నాయి కానీ, నెల ఆఖరు వచ్చేసరికి జేబులో చిల్లి గవ్వ మిగలడం లేదన్నది చేదు నిజం. ఇటీవలే ప్రముఖ చార్టర్డ్ అకౌంటెంట్ నితిన్ కౌశిక్ ఈ అంశంపై చేసిన విశ్లేషణ నెట్టింట వైరల్ అవుతోంది. ఆయన అభిప్రాయం ప్రకారం, భారతీయ మధ్యతరగతి ప్రజలు ప్రస్తుతం ఒక తెలియని సంక్షోభంలో (Silent Crisis) చిక్కుకున్నారు.

జీతం రూ. 1.5 లక్షలు ఉన్నా సరిపోవడం లేదా?

కౌశిక్ లెక్కల ప్రకారం.. 2015లో ఒక వ్యక్తి నెలకు 90 వేల రూపాయలు సంపాదిస్తే, అది ఈరోజు 1.5 లక్షల రూపాయలతో సమానం. అంటే కాగితం మీద మీ జీతం 66% పెరిగినట్లు కనిపిస్తున్నా, వాస్తవానికి మీ కొనుగోలు శక్తి మాత్రం పెరగలేదు. దీనినే 'నామినల్ వేజ్ ట్రాప్' అంటారు. ఇంటి అద్దెలు, పిల్లల స్కూల్ ఫీజులు, ఇన్సూరెన్స్ ప్రీమియంలు గత పదేళ్లలో రెట్టింపు అయ్యాయి. దీంతో పెరిగిన జీతం అంతా ఈ పెరిగిన ఖర్చులకే సరిపోతోంది.

పొదుపు మాయమవుతోంది.. అప్పులు పెరుగుతున్నాయి!

ఒకప్పుడు భారతీయులు ఫిక్స్‌డ్ డిపాజిట్ల (FD) మీద ఎక్కువగా ఆధారపడేవారు. కానీ ఇప్పుడు FDలపై వచ్చే వడ్డీ 7% ఉంటే, విద్యా, వైద్య రంగాల్లో ద్రవ్యోల్బణం 10-12% వరకు ఉంటోంది. దీనివల్ల మనం దాచుకున్న డబ్బు కాలక్రమేణా తన విలువను కోల్పోతోంది. మరోవైపు, ఐటీ రంగంలో జరుగుతున్న లేఆఫ్స్ (Layoffs) మధ్యతరగతి ప్రజల్లో అభద్రతాభావాన్ని పెంచుతున్నాయి. ఉద్యోగం ఎప్పుడు పోతుందో తెలియని పరిస్థితుల్లో, పెరిగిన EMIలు కట్టడానికి చాలామంది క్రెడిట్ కార్డులు, పర్సనల్ లోన్లపై ఆధారపడుతున్నారు.

పరిష్కారం ఏంటి?

మధ్య తరగతి కుటుంబాలు కేవలం పొదుపు చేయడం వల్ల ఇప్పుడున్న ఆర్థిక పరిస్థితులను తట్టుకోవడం కష్టమని నిపుణులు హెచ్చరిస్తున్నారు. ద్రవ్యోల్బణాన్ని మించి రాబడి ఇచ్చే అసెట్స్ (Assets) పై పెట్టుబడి పెట్టడం అలవాటు చేసుకోవాలి. లేదంటే, ఎంత కష్టపడి సంపాదించినా భవిష్యత్తులో ఆర్థిక ఇబ్బందులు తప్పవు.

ప్రస్తుత పరిస్థితుల్లో కేవలం జీతం పెరగడం అనేది ఆర్థిక ఎదుగుదలకు సంకేతం కాదు. ఆదాయం పెరుగుతున్న వేగం కంటే ఖర్చులు, ద్రవ్యోల్బణం వేగంగా దూసుకుపోతున్నాయి. దీనికి తోడు కంపెనీల్లో ఎప్పుడు ఏ క్షణాన లేఆఫ్స్ (layoffs) జరుగుతాయో తెలియని అనిశ్చితి నెలకొంది. అందుకే ఇప్పుడున్న మధ్యతరగతి వర్గం కేవలం పొదుపు మీద మాత్రమే కాకుండా, తెలివైన పెట్టుబడుల మీద దృష్టి పెట్టాలి. సంప్రదాయ పద్ధతుల్లో డబ్బును దాచుకోవడం వల్ల ఆ డబ్బు విలువ క్రమంగా తగ్గిపోతుంది. కాబట్టి, స్టాక్ మార్కెట్, మ్యూచువల్ ఫండ్స్ వంటి ద్రవ్యోల్బణాన్ని తట్టుకోగల మార్గాలను ఎంచుకోవడం ఉత్తమం.