Bengaluru: రియల్ ఎస్టేట్‌లో మారిన లెక్కలు! బెంగళూరు, హైదరాబాద్‌లో ట్రెండ్ ఎలా ఉందంటే..

సొంతిల్లు అనేది ప్రతి ఒక్కరి జీవితకాల కల. అయితే ప్రస్తుతం ఉన్న పరిస్థితులు చూస్తుంటే ఆ కల నెరవేరడం కొంచెం కష్టంగానే అనిపిస్తోంది. ప్రముఖ రియల్ ఎస్టేట్ కన్సల్టెన్సీ నైట్ ఫ్రాంక్ (Knight Frank) తాజాగా విడుదల చేసిన నివేదిక ప్రకారం.. ఈ ఏడాది జనవరి-మార్చి త్రైమాసికంలో బెంగళూరు (Bengaluru), హైదరాబాద్ (Hyderabad) సహా.. దేశంలోని ఎనిమిది ప్రధాన నగరాల్లో ఇళ్ల అమ్మకాలు 4 శాతం మేర తగ్గాయి. గత ఏడాది ఇదే సమయంలో 88,361 యూనిట్లు అమ్ముడవ్వగా ఈసారి అది 84,827 యూనిట్లకు పరిమితమైంది.

అమ్మకాలు తగ్గడానికి అసలు కారణాలేంటి?

నిపుణుల విశ్లేషణ ప్రకారం ఇళ్ల అమ్మకాలు తగ్గడానికి ప్రధానంగా రెండు కారణాలు కనిపిస్తున్నాయి. మొదటిది, ఆకాశాన్ని తాకుతున్న ప్రాపర్టీ ధరలు. గత రెండేళ్లుగా రియల్ ఎస్టేట్ రేట్లు విపరీతంగా పెరగడంతో మధ్యతరగతి ప్రజలు ఇల్లు కొనాలంటే వెనకడుగు వేస్తున్నారు. ఇక రెండోది, అంతర్జాతీయంగా నెలకొన్న ఉద్రిక్తతలు. ముఖ్యంగా ఇరాన్-ఇజ్రాయెల్ యుద్ధం (వెస్ట్ ఆసియా సంక్షోభం) వల్ల మార్కెట్‌లో అనిశ్చితి నెలకొంది. దీనివల్ల ఇన్వెస్టర్లు, సామాన్య కొనుగోలుదారులు తమ నిర్ణయాలను వాయిదా వేసుకుంటున్నారు.

బెంగళూరు , హైదరాబాద్‌లలో జోరు

దేశవ్యాప్తంగా అమ్మకాలు తగ్గినప్పటికీ, ఐటీ హబ్‌లుగా పేరొందిన నగరాల్లో మాత్రం పరిస్థితి ఆశాజనకంగానే ఉంది. ముఖ్యంగా బెంగళూరు (Bengaluru) లో ఇళ్ల అమ్మకాలు 5 శాతం పెరిగి 13,092 యూనిట్లకు చేరుకున్నాయి. టెక్ కంపెనీల విస్తరణ, ఉద్యోగ అవకాశాలు ఉండటంతో బెంగళూరులో డిమాండ్ తగ్గలేదు. అటు మన హైదరాబాద్ కూడా 1 శాతం వృద్ధిని నమోదు చేసి 9,541 యూనిట్ల విక్రయాలను సాధించింది. చెన్నై (9%), కోల్‌కతా (5%), అహ్మదాబాద్ (2%) నగరాలు కూడా పాజిటివ్ గ్రోత్‌ను చూపించాయి.

ముంబై, ఢిల్లీలలో పతనం

దేశ ఆర్థిక రాజధాని ముంబైలో అమ్మకాలు 7 శాతం తగ్గగా, దేశ రాజధాని ఢిల్లీ-NCRలో ఏకంగా 11 శాతం పతనం నమోదైంది. పూణేలో కూడా 11 శాతం క్షీణత కనిపించింది. కొత్తగా మార్కెట్లోకి వచ్చే ఇళ్ల సరఫరా (New Supply) కూడా 2 శాతం తగ్గి 94,855 యూనిట్లకు పరిమితమైంది.

నిపుణులు ఏమంటున్నారు?

నైట్ ఫ్రాంక్ ఇండియా సీఎండీ శిశిర్ బైజల్ అభిప్రాయం ప్రకారం, గత కొన్నేళ్లుగా రియల్ ఎస్టేట్ మార్కెట్ భారీ వృద్ధిని చూసింది. ఇప్పుడు కనిపిస్తున్న తగ్గుదల సహజమైన మార్పు అని ఆయన అంటున్నారు. అయితే, ధరలు నిరంతరం పెరుగుతూ ఉండటం వల్ల సామాన్యుడి స్థోమత (Affordability) దెబ్బతింటోందని, ఇది ఆందోళన కలిగించే విషయమని ఆయన పేర్కొన్నారు. కేవలం లగ్జరీ ఇళ్లకే డిమాండ్ పరిమితమైతే, మార్కెట్ సమతుల్యత దెబ్బతినే అవకాశం ఉంది.
సొంతిల్లు కొనాలనుకునే వారు ప్రస్తుత వడ్డీ రేట్లు, మార్కెట్ ధరలను క్షుణ్ణంగా పరిశీలించి నిర్ణయం తీసుకోవడం ఉత్తమం.