GCC: ఉద్యోగం పోయినా బెంగ లేదు: ఐటీ నిపుణులకు వరంగా మారుతున్న కొత్త గ్లోబల్ సెంటర్లు! ఎలాగంటే..

భారతదేశ ఐటీ, ఇంజనీరింగ్ రంగంలో ప్రస్తుతం ఒక వింత పరిస్థితి కనిపిస్తోంది. గ్లోబల్ కేపబిలిటీ సెంటర్లు (GCC) గత ఏడాది సుమారు 5,500 నుండి 6,000 మంది ఉద్యోగులను తొలగించాయి. కానీ, అదే సమయంలో లక్షన్నర కొత్త ఉద్యోగాలను సృష్టించడం విశేషం. ఈ గణాంకాలు చూస్తుంటే.. జీసీసీ రంగం పతనమవుతోందా? లేక కొత్త రూపం దాల్చుతోందా? అనే సందేహం కలగడం సహజం. అసలు ఈ రంగంలో జరుగుతున్న అంతర్గత మార్పులేంటో ఇప్పుడు చూద్దాం.

లేఆఫ్స్‌ కు కారణం ఏంటి?

ప్రపంచవ్యాప్తంగా ఉన్న మాతృ సంస్థలు (Parent Companies) తమ వ్యాపార వ్యూహాలను మార్చుకోవడం వల్ల ఈ ఉద్యోగాల కోతలు సంభవించాయి. ముఖ్యంగా టెక్నికలర్ (Technicolour) వంటి సంస్థలు పెద్ద ఎత్తున లేఆఫ్స్ ప్రకటించగా.. ఫోర్డ్, ఫిడిలిటీ ఇన్వెస్ట్‌మెంట్స్, బోయింగ్, ఒరాకిల్, టార్గెట్ వంటి దిగ్గజ సంస్థలు కూడా భారత్‌లోని తమ సెంటర్లలో సిబ్బందిని తగ్గించుకున్నాయి. దీనికి మరికొన్ని కారణాలు కూడా ఉన్నాయి.

• గ్లోబల్ ఎఫెక్ట్: అమెరికా లేదా యూరప్‌లోని ప్రధాన కార్యాలయాల్లో నిర్ణయాలు మారినప్పుడు, దానికి అనుగుణంగా భారత్‌లోని టీమ్స్‌లో కూడా మార్పులు జరుగుతున్నాయి.
• ఏఐ రీసెట్: ఆర్టిఫిషియల్ ఇంటెలిజెన్స్ (AI) వాడకం పెరగడంతో పాత పద్ధతుల్లో పనిచేసే ఉద్యోగాల అవసరం తగ్గుతోంది.

ఆశ్చర్యపరిచే వృద్ధి: 150,000 కొత్త కొలువులు

ఒకవైపు ఉద్యోగాలు పోతున్నా, మరోవైపు GCC రంగం అద్భుతమైన వృద్ధిని కనబరుస్తోంది. 2025లో మాత్రమే 101 కొత్త జీసీసీలు భారత్‌లో తమ కార్యకలాపాలను ప్రారంభించాయి.

• కొత్త సెంటర్లు: గ్రీన్‌ఫీల్డ్ విస్తరణ ద్వారా దాదాపు 1.35 లక్షల నుండి 1.5 లక్షల కొత్త ఉద్యోగాలు అందుబాటులోకి వచ్చాయి.
• వేగంగా ఉపాధి: ఉద్యోగం కోల్పోయిన ఇంజనీరింగ్, టెక్ నిపుణులు, ఈ కొత్త సెంటర్ల కారణంగా మూడు నెలల లోపే మళ్లీ ఉపాధి పొందగలుగుతున్నారు. గూగుల్, మైక్రోసాఫ్ట్, మెటా వంటి సంస్థలు ఎంచుకున్న విభాగాల్లో కోతలు విధించినా.. ఏఐ, క్లౌడ్ కంప్యూటింగ్ విభాగాల్లో మాత్రం నియామకాలు కొనసాగిస్తూనే ఉన్నాయి.

స్కిల్ ఉంటేనే మనుగడ

ప్రస్తుతం జరుగుతున్నది 'జాబ్ కట్స్' మాత్రమే కాదు.. అది 'స్కిల్ రీసెట్' అని నిపుణులు వివరిస్తున్నారు. ఫైనాన్స్, హెచ్‌ఆర్, ఆపరేషన్స్, అనలిటిక్స్ రంగాల్లో పనితీరు మారుతోంది. పాత నైపుణ్యాలతో ఉన్న పాత్రలు కనుమరుగవుతుంటే, ఏఐ నైపుణ్యాలు ఉన్న వారికి డిమాండ్ విపరీతంగా పెరుగుతోంది. దీనివల్ల భారతీయ నిపుణులు తమను తాము అప్‌గ్రేడ్ చేసుకోవాల్సిన అవసరం ఏర్పడింది.

భారతదేశం ఇప్పుడు కేవలం తక్కువ ఖర్చుతో కూడిన 'కాస్ట్ కటింగ్' సెంటర్ మాత్రమే కాదు. ప్రపంచ స్థాయి ఉత్పత్తులను తయారు చేసే 'గ్లోబల్ హబ్' గా మారుతోంది. ఈ మార్పు క్రమంలో కొంత ఒడిదుడుకులు ఉన్నప్పటికీ.. దీర్ఘకాలంలో గ్లోబల్ క్యాపబిలిటీ సెంటర్స్ (GCC) రంగం భారత ఆర్థిక వ్యవస్థకు బలమైన పిల్లర్‌ గా నిలవనుంది. కేవలం నైపుణ్యం ఉన్నవారికి మాత్రమే ఇక్కడ తిరుగుండదని ఈ గణాంకాలు స్పష్టం చేస్తున్నాయి.