Patents record: కళ్లు చెదిరే రేంజ్‌లో భారతీయుల ఆవిష్కరణలు.. గత 10 నెలల్లోనే ఏకంగా..

Intellectual Property: అంతర్జాతీయ విపణిలో భారతీయులకు ఆదరణ పెరుగుతోంది. మన మేధో సంపత్తికి అగ్రరాజ్యాలు సైతం తలొగ్గక తప్పని పరిస్థితి నెలకొంది. ఇప్పటికే ప్రపంచంలోని టాప్ కంపెనీల అధినేతల్లో ఇండియన్స్ హవా కొనసాగుతోంది. దీనికి మరింత బూస్ట్ ఇచ్చే విధంగా కేంద్ర మంత్రి పీయూష్ గోయల్ ఓ ప్రకటన చేశారు.

గత 10 నెలల్లో భారత పేటెంట్ కార్యాలయం 75 వేల పేటెంట్లకు అనుమతి మంజూరు చేసినట్లు కేంద్ర వాణిజ్యం మరియు పరిశ్రమల శాఖ మంత్రి పీయూష్ గోయల్ తెలిపారు. కొత్త ఆవిష్కరణలలో దేశ సామర్థ్యాన్ని ఈ సంఖ్య ప్రతిబింబిస్తోందంటూ హర్షం వ్యక్తం చేశారు. గణతంత్ర దినోత్సవం సందర్భంగా కొందరు ఆవిష్కర్తలు, వ్యవస్థాపకులతో ఆయన సమావేశమయ్యారు. ఈ సందర్భంగా పలు కీలక విషయాలు వెల్లడించారు.

వ్యాపారాన్ని ప్రభుత్వం సులభతరం చేస్తోందని మంత్రి వివరించారు. చట్టాలను సరళీకృతం చేయడంతో పాటు నియమ నిబంధనల భారాన్ని తగ్గిస్తున్నట్లు చెప్పారు. జన్ విశ్వాస్ చట్టం ఆ దిశగా మొదటి అడుగు అని గుర్తుచేశారు. ఇది వ్యాపారులతో పాటు ప్రజలకూ ఓదార్పునిచ్చిందన్నారు.

చిన్న పొరపాట్లకే కేసులు నమోదుచేసే సాంప్రదాయం గురించి ఆందోళన చెందాల్సిన అవసరం లేదని పీయూష్ గోయల్ దైర్యం చెప్పారు. మారుతున్న కాలానికి అనుగుణంగా క్రిమినల్ ప్రొవిజన్లలోనూ మార్పులు చేస్తున్నట్లు తెలిపారు. మేధో సంపత్తి (IP) చట్టాలను ఆధునీకరించడానికి మరియు పేటెంట్లు, ట్రేడ్‌మార్క్‌లు, కాపీరైట్‌లకు సంబంధించిన గజిబిజి ప్రక్రియలను క్రమబద్ధీకరించడానికి అనేక సంస్కరణలను చేపట్టినట్లు స్పష్టం చేశారు.