India EU Trade Deal: యూరప్‌తో చారిత్రాత్మక ఒప్పందం! 'మదర్ ఆఫ్ ఆల్ డీల్స్'తో భారత్‌కు భారీ లాభం!

ప్రపంచ ఆర్థిక ముఖచిత్రాన్ని మార్చేసే దిశగా భారత్ ఒక భారీ అడుగు వేసింది. దాదాపు రెండు దశాబ్దాల నిరీక్షణకు తెరదించుతూ.. భారత్, యూరోపియన్ యూనియన్ (EU) మధ్య చారిత్రాత్మక స్వేచ్ఛా వాణిజ్య ఒప్పందం (Trade Deal) కుదిరింది. ప్రధానమంత్రి నరేంద్ర మోదీ దీనిని 'మదర్ ఆఫ్ ఆల్ డీల్స్ (Mother of all deals)' అని అభివర్ణించారు. ఇండియా ఎనర్జీ వీక్ సందర్భంగా ఆయన ఈ కీలక ప్రకటన చేశారు.

200 కోట్ల మందికి చేరువగా భారత ఉత్పత్తులు

ఈ ఒప్పందం ద్వారా దాదాపు 200 కోట్ల మంది జనాభా కలిగిన భారీ మార్కెట్ భారత్‌ కు అందుబాటులోకి రానుంది. ప్రపంచ జీడీపీలో 25% వాటా కలిగిన యూరోపియన్ యూనియన్‌ తో ఈ ఒప్పందం కుదుర్చుకోవడం వల్ల భారత ఎగుమతులకు సరికొత్త రెక్కలు రానున్నాయి. ముఖ్యంగా అమెరికా, చైనాల మధ్య వాణిజ్య యుద్ధం నడుస్తున్న తరుణంలో.. ఈ డీల్ భారత్‌ కు ఒక రక్షణ కవచంలా మారబోతోంది.

ఏ రంగాలకు మేలు జరుగుతుంది?

ఈ వాణిజ్య ఒప్పందం వల్ల ప్రధానంగా కింది రంగాలకు భారీ ప్రయోజనం చేకూరనుంది:

• టెక్స్‌టైల్స్ (వస్త్ర రంగం): ఐరోపా మార్కెట్లోకి భారత వస్త్రాల ఎగుమతులు సులభతరం అవుతాయి.
• రత్నాలు, ఆభరణాలు: జెమ్స్ అండ్ జువెలరీ రంగానికి ఇది ఊతమిస్తుంది.
• చర్మం, పాదరక్షలు: లెదర్ పరిశ్రమకు ఈ ఒప్పందం ఒక గొప్ప వరం.
• మిషనరీ, కెమికల్స్: యంత్రాలు, రసాయనాల ఎగుమతులు కూడా గణనీయంగా పెరగనున్నాయి.

అమెరికా టారిఫ్ షాక్ నుండి విముక్తి!

గత ఏడాది అమెరికా మాజీ అధ్యక్షుడు ట్రంప్ భారత ఉత్పత్తులపై 50% వరకు పన్నులు (Tariffs) విధించిన సంగతి తెలిసిందే. దీనివల్ల భారత ఎగుమతిదారులు తీవ్ర ఇబ్బందులు ఎదుర్కొన్నారు. అమెరికాపై ఆధారపడటం తగ్గించుకునే క్రమంలో భారత్ ఇప్పటికే యూకే, ఒమన్, న్యూజిలాండ్‌లతో ఒప్పందాలు చేసుకుంది. ఇప్పుడు ఈయూతో కుదిరిన ఈ ఒప్పందం (Trade Deal) భారత్‌ కు ఒక మరింత బలాన్ని ఇచ్చింది.

ఈయూ - భారత్ వాణిజ్య గణాంకాలు

ప్రస్తుతం ఈయూ అనేది భారత దేశానికి అతిపెద్ద వాణిజ్య భాగస్వామి.

• 2024లో భారత్-ఈయూ మధ్య సుమారు 140 బిలియన్ డాలర్ల వ్యాపారం జరిగింది.
• మెషినరీ, బేస్ మెటల్స్, మినరల్ ప్రొడక్ట్స్ భారత్ నుండి ప్రధానంగా ఎగుమతి అవుతున్నాయి.
• భారత్ ఇప్పుడు ఈయూకు 9వ అతిపెద్ద వాణిజ్య భాగస్వామిగా ఉంది.

వీటిపై సుంకం లేదు

ఈ చారిత్రాత్మక ఒప్పందంలో భాగంగా, వచ్చే 7 ఏళ్లలో భారతీయ ఉత్పత్తులపై ఉన్న సుంకాలను (Tariffs) విడతల వారీగా సున్నాకి తగ్గించేందుకు యూరోపియన్ యూనియన్ అంగీకరించింది. అయితే ఇరుపక్షాలకు అత్యంత కీలకమైన ఆటోమొబైల్, స్టీల్, వ్యవసాయ రంగాలను మాత్రం ప్రస్తుతానికి ఈ జీరో-డ్యూటీ జాబితా నుండి మినహాయించారు. ఈ రంగాలు దేశీయ ఉపాధి, ఆహార భద్రతతో ముడిపడి ఉండటమే దీనికి కారణం. కానీ, మన దేశానికి చెందిన రసాయనాలు, ప్లాస్టిక్స్, రబ్బర్, వస్త్రాలు, తోలు ఉత్పత్తులు, ఆభరణాలు ఇకపై ఎలాంటి పన్నులు లేకుండానే ఐరోపా మార్కెట్లోకి ప్రవేశించవచ్చు. దీనివల్ల మన ఎగుమతిదారుల ఖర్చులు తగ్గి, ప్రపంచ మార్కెట్‌లో భారత వస్తువులకు డిమాండ్ పెరుగుతుంది. కేవలం వాణిజ్యమే కాకుండా, గ్రీన్ హైడ్రోజన్, డిఫెన్స్ మరియు ఫైనాన్షియల్ రెగ్యులేషన్ వంటి రంగాల్లో 'టువార్డ్స్ 2030' (Towards 2030) పేరుతో ఒక ఉమ్మడి వ్యూహాత్మక రోడ్‌మ్యాప్‌ను కూడా ఇరుపక్షాలు సిద్ధం చేసుకోవడం ఈ Trade Deal విశేషం.

మొత్తంగా ఈ ఒప్పందం ద్వారా సుంకాల కంటే సమానమైన వాణిజ్యానికే (Fair trade over tariffs) ప్రాధాన్యత ఇస్తున్నామని ఈయూ ప్రెసిడెంట్ ఉర్సులా వాన్ డెర్ లేయన్ స్పష్టం చేశారు. అమెరికాతో పోలిస్తే ఈయూతో వాణిజ్య మిగులు తక్కువగా ఉన్నప్పటికీ, భవిష్యత్తులో ఇది మరింత పెరిగే అవకాశం ఉంది.