Online Gaming: ఆన్‌లైన్ గేమింగ్ ఇండస్ట్రీకి బ్యాడ్ డేస్ స్టార్ట్.. మరో రెండు రోజుల్లో మోత మొదలు!

Online Gaming: ఆన్‌ లైన్ గేమింగ్ పై వస్తు, సేవల పన్ను(GST)ని కేంద్ర ప్రభుత్వం ఇటీవల పెంచింది. పలు కంపెనీలు ఈ నిర్ణయాన్ని వ్యతిరేకించాయి. మరోసారి పునరాలోచించాలని వినతులు సైతం కేంద్రానికి సమర్పించాయి. అయితే మోదీ సర్కారు మాత్రం ఈ విషయంలో వెనక్కి తగ్గలేదు.

ఇందుకు సంబంధించి GST చట్టాల్లో సవరణలకు లోక్‌ సభ 2 నెలల క్రితం ఆమోదమూద్ర వేసింది. కాగా పెంచిన GST మరో 2 రోజుల్లో అమల్లోకి రానుంది. అక్టోబరు 1 నుంచి ఆన్‌ లైన్ గేమింగ్‌ పై 28 శాతం GST విధించనున్నట్లు సెంట్రిల్ బోర్డ్ ఆఫ్ ఇండైరెక్ట్ ట్యాక్సెస్ అండ్ కస్టమ్స్ ఛైర్‌ పర్సన్ సంజయ్ అగర్వాల్ ప్రకటించారు.

'అన్ని రాష్ట్రాల సమ్మతితో అక్టోబర్ 1 నుంచి పెరిగిన GST వసూలు చేయడానికి మేము సిద్ధంగా ఉన్నాం. ఇందుకోసం ఆయా రాష్ట్రాల అసెంబ్లీలు ఈ బిల్ పాస్ చేయాల్సి ఉంది. కొన్ని ఆన్‌ లైన్ గేమింగ్ కంపెనీలకు షోకాజ్ నోటీసులు ఇవ్వాల్సి రావచ్చు. ఇది లీగల్ ప్రోసెస్' అని అగర్వాల్ తెలిపారు.

GST చట్టానికి చేసిన ఈ మార్పుల వల్ల క్యాసినో, గుర్రపు పందాలు, ఆన్‌ లైన్ గేమింగ్ పై పన్ను విధానంపై పూర్తి క్లారిటీ తీసుకొచ్చినట్లు కేంద్రం ప్రకటించింది. కాగా తాజాగా పెంచిన GSTపై వచ్చే ఆర్థిక సంవత్సరంలో రివ్యూ చేయనున్నట్లు ప్రకటించింది.