ట్యాక్స్ పేయర్స్‌కు IT శాఖ వార్నింగ్.. ఇలా చేయకపోతే రిటర్న్ ఫైల్ చేసినా ఫైన్ తప్పదు

Income Tax News: ఆదాయపు పన్ను రిటర్నుల ఫైలింగ్ ఇప్పటికే ముగిసింది. ఈ తతంగం పూర్తి చేశామని ధీమాగా ఉన్న ట్యాక్స్ పేయర్స్ ఇంకో విషయాన్ని కంప్లీట్ చేయాలని IT శాఖ వెల్లడించింది. దీనిని పూర్తి చేయని వారికి జరిమానా విధించే అవకాశం ఉన్నట్లు హెచ్చరించింది.

IT రిటర్న్స్ ఫైలింగ్ అనంతరం ఇ-ధ్రువీకరణ సైతం పూర్తి చేయాలని ఆదాయపు పన్ను విభాగం సూచించింది. లేనిపక్షంలో అదికాస్తా అసంపూర్తిగా పరిగణించబడుతుంది అని గుర్తుచేసింది. సాధ్యమైనంత త్వరగా ఈ ప్రక్రియను కంప్లీట్ చేయాలని కోరింది.

రిటర్న్స్ ఫైలింగ్ చేసిన 30 రోజుల్లోపు ITRను ధ్రువీకరించాలని ఇన్‌ కం ట్యాక్స్ శాఖ తెలిపింది. ఆగస్టు 2023 నుంచి ITRలు చెల్లుబాటు కావడానికి ఇ-వెరిఫికేషన్ తప్పనిసరి చేసినట్లు ట్వీట్ చేసింది. ఇందుకోసం ఇ-ఫైలింగ్ పోర్టల్‌ లోకి వెళ్లి, 'ఇ-వెరిఫై రిటర్న్'పై క్లిక్ చేయాల్సి ఉంటుందని పేర్కొంది.

పాన్ నంబర్, అసెస్మెంట్ సంవత్సరం, రసీదు నంబర్ ఎంటర్ చేసి సైట్‌ లో లాగిన్ కావచ్చు. ప్రత్యామ్నాయంగా పాన్‌, పాస్ వర్డ్ ఉపయోగించవచ్చు. అనంతరం మై అకౌండ్ ట్యాబ్ లోని 'ఇ-వెరిఫై రిటర్న్'ను క్లిక్ చేయాలి. అప్పుడు ధ్రువీకరణ పెండింగ్ ఉన్న ఫైల్ ను సైట్ చూపిస్తుంది. ఆధార్ కు లింక్ కాబడిన మొబైల్ నంబర్ కు వచ్చిన oTP ఎంటర్ చేస్తే సరి.