Income Tax: అపర కుబేరులకు ఆదాయపు పన్ను శాఖ ఝలక్.. ఆట కట్టించేందుకు పక్కా ప్లాన్ రెడీ!

Income Tax: పన్నుల వసూళ్లు విషయంలో కేంద్రంలోని నరేంద్ర మోదీ సర్కారు కఠిన వైఖరిని అనుసరిస్తోంది. ఆదాయపు పన్ను విభాగం నూతన సాంకేతికతను అందిపుచ్చుకుని పన్ను ఎగవేతదారుల ఆట కట్టిస్తోంది. ఫలితంగా గతంలో ఎన్నడూ లేని విధంగా ట్యాక్స్ వసూళ్లు భారీగా పెరిగాయి.

గత బడ్జెట్‌లో వ్యక్తిగత ఆదాయంపై అత్యధిక పన్ను రేటును 42.74 నుంచి 39 శాతానికి కేంద్ర ప్రభుత్వం తగ్గించింది. అయినప్పటికీ అధిక నికర విలువ కలిగిన వ్యక్తుల(HNI) పన్ను ఎగవేతను అరికట్టలేకపోవడంపై ఆదాయపు పన్ను శాఖ ఆందోళన వ్యక్తం చేసింది. తక్కువ మొత్తంలో ట్యాక్స్ చెల్లిస్తూ ఎగవేతకు పాల్పడుతున్న కోటీశ్వరులపై కఠిన చర్యలకు సిద్ధమవుతోంది.

1 కోటి కంటే ఎక్కువ వార్షిక ఆదాయం కలిగి ఉన్న లేదా అందుకు అవకాశం ఉన్న వ్యక్తులను '360-డిగ్రీల ప్రొఫైలింగ్' చేయనున్నట్లు IT విభాగానికి చెందిన ఓ సీనియర్ అధికారి తెలిపారు. ఆయా వ్యక్తుల పెట్టుబడి ప్రొఫైల్‌, ఖర్చులు మరియు అసెస్‌మెంట్ కోసం ఆదాయ వనరులను డిపార్ట్‌మెంట్ ట్రాక్ చేస్తోందని వెల్లడించారు.

'FY23లో 2 లక్షల 61 వేల మంది పన్ను చెల్లింపుదారులు తమ రిటర్న్‌లలో 1 కోటి కంటే ఎక్కువ ట్యాక్సబుల్ ఆదాయాన్ని చూపించారు. అయితే పలు మార్గాల్లో సంగ్రహించిన డేటా ప్రకారం ఈ సంఖ్య మరింత ఎక్కువగా ఉండాలి. స్క్రీనింగ్ పూర్తయిన తర్వాత తమ ఆదాయాన్ని తక్కువగా నివేదించిన వారికి నోటీసులు పంపుతాం' అని ఆ అధికారి స్పష్టం చేశారు.