మూడు వారాల్లో రూ.15 లక్షల కోట్లు నష్టపోయిన ఇన్వెస్టర్లు

స్టాక్ మార్కెట్లు గతవారం భారీగా నష్టపోయాయి. అంతకుముందు ద్రవ్యోల్భణ భయాలు, గత రెండు వారాలుగా రష్యా-ఉక్రెయిన్ యుద్ధం నేపథ్యంలో నాలుగు వారాలుగా సూచీలు నష్టాల్లో ట్రేడ్ అవుతున్నాయి. ఉక్రెయిన్ సంక్షోభ సమయంలో చమురు ధరలు పెరగడంతో పాటు ద్రవ్యోల్భణ భయాలు అంతర్జాతీయ, భారత స్టాక్ మార్కెట్‌లపై తీవ్ర ప్రభావం చూపాయి. దీంతో భారత మార్కెట్లు కుప్పకూలుతున్నాయి. బ్లూచిప్ ఎన్ఎస్ఈ నిఫ్టీ 50 ఇండెక్స్ 1.53 శాతం క్షీణించి 16,245 పాయింట్ల వద్ద, ఎస్ అండ్ పీ బీఎస్ఈ సెన్సెక్స్ 750 పాయింట్లు క్షీణించి 54,333 పాయింట్ల వద్ద ముగిసింది.

ఉక్రెయిన్‌లోకి రష్యా చొచ్చుకు వచ్చి రెండు వారాలు అవుతోంది. ప్రధాన పట్టణాలను మాస్కో స్వాధీనం చేసుకుంటుంది. అమెరికా, యూరోపియన్ దేశాల ఆంక్షలు, కఠిన చర్యలకు పుతిన్ వెనుకడుగు వేయడం లేదు. సమస్య జఠిలమవుతోంది. ఇది స్టాక్ మార్కెట్ పైన ప్రభావం చూపుతోంది.

వరుస నష్టాలు ఇన్వెస్టర్లకు భారీ నష్టాన్ని కలిగించాయి. ఏ రోజుకు ఆ రోజు మార్కెట్ సంపద కరిగిపోతోంది. ఫిబ్రవరి 15వ తేదీ నుండి క్రితం సెషన్ వరకు ఈక్విటీ మార్కెట్లో ఇన్వెస్టర్లు ఎంత మేర నష్టపోయారంటే అక్షరాలా రూ.15 లక్షల కోట్లకు పైగా. ఇది 2021లో ఉక్రెయిన్ జీడీపీ కంటే ఎక్కువ అని అంచనా.