Gold: భారత్ ఒక ఏడాది పాటు బంగారం కొనడం ఆపేస్తే ఏం జరుగుతుంది? కేంద్రం అసలు ప్లాన్ ఇదే!

మన భారతీయులకు బంగారం (Gold) అంటే కేవలం ఒక లోహం మాత్రమే కాదు, అది ఒక సెంటిమెంట్. పెళ్లిళ్లయినా, పండుగలైనా బంగారం కొననిదే మనకు ముచ్చట తీరదు. అయితే, ఒకవేళ భారత్ ఒక సంవత్సరం పాటు విదేశాల నుంచి బంగారం దిగుమతి చేసుకోవడం పూర్తిగా ఆపేస్తే ఏం జరుగుతుందో ఎప్పుడైనా ఆలోచించారా? దీనివల్ల ప్రపంచ మార్కెట్ నుంచి మన ఇంటి వరకు ఎలాంటి మార్పులు వస్తాయో ఇప్పుడు తెలుసుకుందాం.

ప్రపంచ మార్కెట్లో పసిడి ధరల పతనం?

భారత్ ఏటా దాదాపు 800 టన్నుల బంగారాన్ని దిగుమతి చేసుకుంటుంది. అంటే ప్రపంచంలోనే అతిపెద్ద కొనుగోలుదారులలో మనం ఒకరం. ఒక్కసారిగా భారత్ నుంచి డిమాండ్ తగ్గిపోతే, అంతర్జాతీయ మార్కెట్లో బంగారం ధరలు దారుణంగా పడిపోయే అవకాశం ఉంది. మార్కెట్లో బంగారం ఎక్కువగా ఉండి, కొనేవారు తక్కువగా ఉండటం వల్ల (Surplus) గ్లోబల్ ప్రైసెస్ కరెక్షన్ కి గురవుతాయి. కానీ విచిత్రం ఏమిటంటే, ప్రపంచ మార్కెట్లో ధరలు తగ్గినా, మన దేశంలో మాత్రం లభ్యత తక్కువగా ఉండటం వల్ల ధరలు ఆకాశాన్ని తాకవచ్చు.

మన ఆర్థిక వ్యవస్థకు లాభమా? నష్టమా?

బంగారం అనేది పెట్రోల్ తర్వాత భారత్ అత్యధికంగా దిగుమతి చేసుకునే రెండో వస్తువు. దీని కోసం మనం ఏటా దాదాపు $60 నుంచి $70 బిలియన్ల విదేశీ కరెన్సీని ఖర్చు చేస్తున్నాం. ఒకవేళ ఈ కొనుగోళ్లు ఆపితే, ఆ డాలర్లన్నీ ఆదా అవుతాయి. దీనివల్ల మన రూపాయి విలువ పెరగడమే కాకుండా, కరెంట్ అకౌంట్ డెఫిసిట్ (CAD) తగ్గుతుంది. ఆ మిగిలిన సొమ్మును క్రూడ్ ఆయిల్ వంటి అత్యవసర వనరుల కోసం ప్రభుత్వం వాడుకోవచ్చు. ఇది దేశ ఆర్థిక వ్యవస్థకు ఒక రకంగా మేలు చేస్తుంది.

పరిశ్రమపై ప్రతికూల ప్రభావం

మరోవైపు, ఈ నిర్ణయం వల్ల 'జెమ్స్ అండ్ జ్యువెలరీ' రంగం తీవ్రంగా దెబ్బతింటుంది. మన దేశంలో ఈ రంగంపై దాదాపు ఒక కోటి మందికి పైగా కార్మికులు ఆధారపడి జీవిస్తున్నారు. బంగారం అమ్మకాలు నిలిచిపోతే, వారందరూ ఉపాధి కోల్పోయే ప్రమాదం ఉంది. ఇప్పటికే మార్కెట్లో ఈ వార్తల వల్ల జ్యువెలరీ కంపెనీల షేర్లు పతనం అవుతున్నాయి. పైగా, ప్రభుత్వం చట్టపరంగా బంగారంపై ఆంక్షలు విధిస్తే.. స్మగ్లింగ్ పెరిగే అవకాశం ఉందని నిపుణులు హెచ్చరిస్తున్నారు. ఎందుకంటే మన దేశంలో పెళ్లిళ్ల సీజన్‌లో బంగారం అవసరం కచ్చితంగా ఉంటుంది, కాబట్టి ప్రజలు దొంగచాటుగానైనా కొనడానికి ప్రయత్నిస్తారు.

ప్రత్యామ్నాయ మార్గాలు ఇవే!

ప్రజలు భౌతికంగా బంగారాన్ని (Physical Gold) కొని దాచుకోవడం వల్ల దేశ ఆర్థిక వ్యవస్థకు పెద్దగా ఉపయోగం ఉండదు. అందుకే ప్రభుత్వం గోల్డ్ ఈటీఎఫ్‌లు (Gold ETFs) , సావరిన్ గోల్డ్ బాండ్ల (SGB) వైపు ప్రజలను మళ్లించే ప్రయత్నం చేస్తోంది. దీనివల్ల మీకు బంగారం ధర పెరిగినప్పుడల్లా లాభం వస్తుంది, కానీ దిగుమతి చేసుకునే అవసరం ఉండదు. మరోవైపు, సామాన్యులను కొనొద్దని చెబుతున్నా.. దేశ ఆర్థిక భద్రత కోసం ఆర్బీఐ (RBI) మాత్రం తన వద్ద రికార్డు స్థాయిలో 880 టన్నుల బంగారాన్ని నిల్వ ఉంచుతోంది.

మొత్తానికి, భారత్ బంగారం కొనడం ఆపేస్తే ఆర్థికంగా డాలర్లు ఆదా అవ్వొచ్చు కానీ, సామాజికంగా , ఉపాధి పరంగా భారీ ఇబ్బందులు తప్పవు. బంగారం అనేది మన సంస్కృతిలో భాగం కాబట్టి, డిమాండ్ అనేది ఎప్పటికీ తగ్గకపోవచ్చు.