GDP: భారత జీడీపీ అంచనాలు పెంచిన ఐఎంఎఫ్.. బలమైన పనితీరుతో..

IMF GDP Forecast: అంతర్జాతీయ గందరగోళాల మధ్య సైతం భారత ఆర్థిక వ్యవస్థ పుంజుకుంటోంది. తాజాగా కంపెనీలు ప్రకటిస్తున్న త్రైమాసిక ఫలితాలు దీనినే రుజువు చేస్తున్నాయి.

అంతర్జాతీయ ద్రవ్య నిధి(IMF) భారత వృద్ధి అంచనాలను సవరించింది. గతంలో ఏప్రిల్‌లో FY24 కోసం GDP వృద్ధిని 5.9% అంచనా వేసిన సంగతి తెలిసిందే. అయితే తాజాగా విడుదల చేసిన రిపోర్టు ప్రకారం 2023-24 ఆర్థిక సంవత్సరానికి GDP వృద్ధిని 6.1%గా అంచనా వేసింది. ఏప్రిల్ ప్రొజెక్షన్‌తో పోల్చితే 0.2 శాతం పెంచబడింది.

2022 నాలుగో త్రైమాసికంలో ఊహించిన దానికంటే బలమైన వృద్ధిని పరిగణలోకి తీసుకుని అంచనాలను సవరిస్తున్నట్లు ఐఎంఎఫ్ వెల్లడించింది. అలాగే FY25 కోసం GDP వృద్ధి అంచనాను 6.3% వద్ద ఉంచింది. ఇదే క్రమంలో రిజర్వ్ బ్యాంక్ ఆఫ్ ఇండియా ప్రస్తుత ఆర్థిక సంవత్సరంలో GDP వృద్ధిని 6.5%గా అంచనా వేయగా, ఆసియా డెవలప్‌మెంట్ బ్యాంక్ ఆర్థిక సంవత్సరానికి 6.4% వృద్ధి అంచనాను కొనసాగిస్తోంది.

పొరుగున ఉన్న చైనా ఆర్థిక వ్యవస్థ 2023లో 5.2%, 2024లో 4.5% వృద్ధిని అంచనా వేయడంతో.. భారత్ వేగంగా అభివృద్ధి చెందుతున్న ఆర్థిక వ్యవస్థ ట్యాగ్‌ను కలిగి ఉంది. గ్లోబల్ హెడ్‌లైన్ ద్రవ్యోల్బణం 2022లో 8.7% నుంచి తగ్గి 2023లో 6.8%కి.. అలాగే 2024లో 5.2%కి తగ్గుతుందని ఐఎంఎఫ్ అంచనాలు చెబుతున్నాయి.