ఆర్థిక వృద్ధిలో రేసు గుర్రాల్లా దూసుకుపోతున్న దేశాలివే.. మరి ఇండియా స్థానం ఎంతంటే..

కరోనాతో ప్రారంభమైన ప్రపంచ ఆర్థిక వ్యవస్థ పతనం ఇంకా కొనసాగుతూనే ఉంది. రష్యా-ఉక్రెయిన్ యుద్ధం, చమురు ధరల దెబ్బతో అంతర్జాతీయ సమాజం అనిశ్చితిలో కూరుకుపోయింది. దీంతో అగ్ర రాజ్యాలు, పెద్ద ఆర్థిక వ్యవస్థ కలిగిన దేశాలు చతికిల పడ్డాయి. కానీ మరికొన్ని మాత్రం వీటిని ఏ మాత్రం లెక్కచేయకుండా వృద్ధి పథంలో దూసుకుపోతున్నాయి.

2024లో అత్యంత వేగంగా వృద్ధి చెందుతున్న ఆర్థిక వ్యవస్థలపై అంతర్జాతీయ ద్రవ్యనిధి(IMF) అవుట్ లుక్ రిలీజ్ చేసింది. అక్టోబర్ 2023లో విడుదలైన దాని వరల్డ్ ఎకనామిక్ డేటా ఆధారంగా.. ఆయా దేశాల GDP వృద్ధిని అంచనా వేయొచ్చు. ఇతర దేశాలతో పోలిస్తే ఆసియా, సబ్-సహారా ఆఫ్రికా దేశాలు మెరుగైన పనితీరును కనబరుస్తున్నట్లు గణాంకాలు చెబుతున్నాయి.

ఆసియాలో వేగంగా అభివృద్ధి చెందుతున్న ఆర్థిక వ్యవస్థల్లో 27.2 శాతం వృద్ధి రేటుతో మకావో ముందు వరుసలో ఉంది. గుయానా 26.6, పలావు 12.4, నైగర్ 11.1, సెనెగల్ 8.8 శాతంతో తరువాతి స్థానాల్లో కొనసాగుతున్నాయి. ఇక వరల్డ్ ఎకానమీలో బ్రైట్ స్పాట్‌ గా చెప్పబడుతున్న భారత్ 6.3 శాతం అంచనా రేటుతో ఈ లిస్టులో 11వ స్థానాన్ని ఆక్రమించింది.

మకావో ఆర్థిక వ్యవస్థకు పర్యాటకమే కీలకం. 60 శాతం ఉద్యోగాలకు ఇదే ఆధారం. GDPలో ఈ రంగం వాటా దాదాపు 70 శాతం. పలావు 340 ద్వీపాలతో కూడిన చిన్న దేశం. GDPలో దాదాపు 40 శాతానికి పర్యాటకం ప్రాతినిధ్యం వహిస్తోంది. నైజర్, సెనెగల్ పూర్తిగా చమురుపై ఆధారపడినవే. కాగా జనాభా పరంగా అతిపెద్ద దేశంగా అవతరించిన భారత్.. 2064 నాటికి 1.7 బిలియన్ల మందిని కలిగి ఉంటుందని అంచనా. ఇది ఆర్థిక వ్యవస్థకు సానుకూలమని విశ్లేషకులు భావిస్తున్నారు.