జూన్ 3 తర్వాత కేరళను తాకనున్న రుతుపవనాలు..ఈ సారి వర్షపాతం చాలా తక్కువంటూ బాంబు పేల్చిన IMD..

భారతదేశ వ్యవసాయ రంగానికి జీవనాడి అయిన నైరుతి రుతుపవనాల రాకపై సందిగ్ధత కొనసాగుతోంది. సాధారణంగా జూన్ మొదటి వారంలోనే భారత ఉపఖండంలోకి ప్రవేశించే రుతుపవనాలు, ఈసారి కేరళ తీరాన్ని ఎప్పుడు తాకుతాయనే దానిపై వాతావరణ శాఖలో స్పష్టత కరువైంది. మే 26నే వర్షాలు ముందే ప్రారంభమవుతాయంటూ భారత వాతావరణ శాఖ (IMD) గతంలో చేసిన అంచనా తప్పని తేలడంతో, ద్వీపకల్ప భారతదేశంలో వర్షాల ప్రారంభానికి కొత్త తేదీని అధికారికంగా ప్రకటించడానికి IMD నిరాకరించింది. అయితే, రాబోయే 3-4 రోజుల్లో రుతుపవనాలు మరింత ముందుకు సాగడానికి పరిస్థితులు అనుకూలంగా ఉన్నాయని సోమవారం నాటి అప్‌డేట్‌లో తెలిపింది.

ప్రస్తుతం గాలులు చాలా బలహీనంగా ఉన్నందున వర్షాల ప్రారంభం ఆలస్యమవుతోందని, ఇది జూన్ 3 తర్వాతే ఉండే అవకాశం ఉందని వాతావరణ శాస్త్రవేత్తలు పేర్కొంటున్నారు. గత దశాబ్ద కాలపు డేటాను పరిశీలిస్తే, 2016, 2023 సంవత్సరాలలో రుతుపవనాలు ఆలస్యంగా జూన్ 8న రాగా, 2024 (మే 30), 2025 (మే 24)లలో మాత్రం నిర్ణీత సమయం కంటే ముందుగానే ప్రధాన భూభాగంలోకి ప్రవేశించాయి.

ఈ శతాబ్దంలోనే అత్యంత ముందస్తుగా 2004 మే 18న రుతుపవనాలు రావడం గమనార్హం. 2005 నుండి 2025 మధ్య కాలంలో 2015 మినహా ఐఎమ్‌డి చేసిన అన్ని అంచనాలు దాదాపు నిజమయ్యాయి. ఈ ఏడాది మే 16 నాటికే, అంటే షెడ్యూల్ కంటే వారం ముందే అండమాన్ సముద్రంలోకి రుతుపవనాలు ప్రవేశించినప్పటికీ, ప్రధాన భూభాగంలోకి రావడానికి మాత్రం బ్రేక్ పడింది.

యూకేలోని రీడింగ్ విశ్వవిద్యాలయ సీనియర్ పరిశోధన శాస్త్రవేత్త అక్షయ్ డియోరాస్ అందించిన విశ్లేషణ ప్రకారం.. జూన్ 3 తర్వాత కేరళలో బలహీనంగా రుతుపవనాలు ప్రవేశించే అవకాశం ఉంది. ఆ తర్వాత కొద్ది రోజుల్లోనే ఇవి తమిళనాడు, తీరప్రాంత కర్ణాటక మీదుగా విస్తరిస్తాయి. ఈశాన్య భారతదేశంలో జూన్ 5-10 మధ్య, తూర్పు భారతదేశంతో పాటు మహారాష్ట్రలోని చాలా ప్రాంతాలలో జూన్ 10 తర్వాతే ఇవి ప్రవేశించే అవకాశం ఉంది.

ప్రస్తుతం బలహీనంగా ఉన్న గాలులు, పశ్చిమ పసిఫిక్‌లో ఏర్పడిన 'జాంగ్మీ' తుఫాను కారణంగా వచ్చే వారంలో కొంత పుంజుకునే అవకాశం ఉందని ఆయన భావిస్తున్నారు. ఏదేమైనా, జూన్ మొదటి అర్ధభాగంలో దేశంలోని అనేక ప్రాంతాలలో సగటు కంటే తక్కువ వర్షపాతమే నమోదు కావచ్చని అంతర్జాతీయ వాతావరణ నమూనాలు సూచిస్తున్నాయి.

Also Read

ఎండలకు గుడ్ బై.. ఐఎండీ చల్లని కబురు.. వారం రోజుల ముందుగానే రుతుపవనాలు..

ఈ పరిణామాల మధ్య IMD దేశానికి ఒక చేదు వార్తను అందించింది. జూన్-సెప్టెంబర్ సీజన్‌కు సంబంధించి దేశవ్యాప్త వర్షపాత అంచనాను గత నెల దీర్ఘకాల సగటు (LPA)లో 92% నుండి 90%కి వాతావరణ శాఖ తగ్గించింది. ఇది "సాధారణం కంటే తక్కువ" వర్షపాతాన్ని సూచిస్తుండగా, వర్షాలు లోటు లేదా తక్కువ స్థాయిలో కురిసేందుకు ఏకంగా 84% అవకాశం ఉందని తెలిపింది. దీని బట్టి చూస్తే, ఈ ఏడాది రుతుపవనాలు 2015 తర్వాత అత్యంత బలహీనమైనవిగా మారే ప్రమాదం కనిపిస్తోంది.

సాధారణంగా జూన్ ప్రారంభంలో కేరళలో మొదలై జూలై నాటికి దేశమంతటా విస్తరించే నైరుతి రుతుపవనాలు, దేశ వార్షిక వర్షపాతంలో దాదాపు 75 శాతం వాటాను కలిగి ఉంటాయి. ఇవి సెప్టెంబర్ మధ్య నుండి ఉత్తర భారతదేశం వైపుగా క్రమంగా తగ్గుముఖం పడతాయి. ఈ వర్షాల ఆధారంగానే దేశంలో ఖరీఫ్ పంటలైన వరి, పప్పుధాన్యాలు, నూనెగింజలు, చిరుధాన్యాల విత్తనాలు వేయడం మొదలవుతుంది. అంతేకాకుండా, ఈ వర్షాలు శీతాకాలపు రబీ పంటలైన గోధుమ, పప్పుధాన్యాలకు నేలలో అవసరమైన తేమను అందిస్తాయి. ఈ నేపథ్యంలో వర్షపాతం తగ్గవచ్చనే వాతావరణ శాఖ హెచ్చరికలు వ్యవసాయ రంగ ఉత్పత్తిపై మరియు దేశ ఆర్థిక రంగానికి కొంత ఆందోళన కలిగించే విషయమే.