Hyderabad: ఇల్లు కొనాలని చూస్తున్నారా? ఇలాంటి మాటలు నమ్మితే నిండా మునిగినట్టే!

హైదరాబాద్ (Hyderabad) నగరంలో సొంతింటి కల నిజం చేసుకోవాలని చూస్తున్న మధ్యతరగతి ప్రజలను టార్గెట్ చేస్తూ ఒక కొత్త రకమైన రియల్ ఎస్టేట్ దందా మొదలైంది. ముఖ్యంగా కోకాపేట, తెల్లాపూర్, కొల్లూరు వంటి ఐటీ కారిడార్ ప్రాంతాల్లో అత్యంత విలాసవంతమైన ఫ్లాట్లు, విల్లాలు సగం ధరకే ఇస్తామంటూ బ్రోకర్లు ఊరిస్తున్నారు. అయితే ఈ ఆఫర్ల వెనుక ఉన్నది కేవలం మాయమాటలేనని, వీటికి ఎటువంటి అధికారిక అనుమతులు లేవని తాజా ఇన్వెస్టిగేషన్లు హెచ్చరిస్తున్నాయి.

ప్రీ-లాంచ్.. వన్-టైమ్ పేమెంట్..

సాధారణంగా ఒక రియల్ ఎస్టేట్ ప్రాజెక్ట్ ప్రారంభం కావాలంటే తెలంగాణ రియల్ ఎస్టేట్ రెగ్యులేటరీ అథారిటీ (TG-RERA) అనుమతులు తప్పనిసరి. కానీ, ప్రస్తుతం హైదరాబాద్‌లో 70 శాతానికి పైగా కొత్త ప్రాజెక్టులు ఎటువంటి అనుమతులు లేకుండానే అమ్మకాలు సాగిస్తున్నాయి. "ప్రీ-లాంచ్" లేదా "OTP" (వన్ టైమ్ పేమెంట్) పేరుతో ఈ వ్యాపారం నడుస్తోంది.

ఉదాహరణకు గజానికి రూ.12,000 పైగా ఉన్న ప్రాంతాల్లో కేవలం రూ.6,500 కే ఇస్తామని ప్రకటనలు ఇస్తున్నారు. "ఇప్పుడే 20 శాతం కట్టండి. మిగతాది నెల రోజుల్లో చెల్లించండి.. అనుమతులు వచ్చాక రేట్లు రెట్టింపు అవుతాయి" అంటూ కొనుగోలుదారులను తప్పుదోవ పట్టిస్తున్నారు.

నిబంధనలు గాలికొదిలేసిన బ్రోకర్లు

సోషల్ మీడియా, వాట్సాప్ వేదికగా ఈ అక్రమ మార్కెటింగ్ జోరుగా సాగుతోంది. పటాన్‌చెరు, దుండిగల్, మేడ్చల్, ఉప్పల్ వంటి ప్రాంతాల్లో కూడా ఇటువంటి వెంచర్లు వెలుస్తున్నాయి. వీటిలో చాలా వాటికి కనీసం ప్రాజెక్ట్ పేరు కూడా ఉండదు. అనుమతుల గురించి అడిగితే.. "బిల్డర్ చాలా పేరున్న వ్యక్తి, త్వరలోనే పర్మిషన్లు వస్తాయి" అంటూ బ్రోకర్లు బుకాయిస్తున్నారు. కానీ, వాస్తవానికి అటువంటి ప్రాజెక్టుల వివరాలు రేరా (RERA) వెబ్‌సైట్‌ లో ఎక్కడా కనిపించడం లేదు.

రియల్ ఎస్టేట్ మార్కెట్ క్రాష్ అయ్యే అవకాశం?

ఈ పరిస్థితిపై రియల్ ఎస్టేట్ నిపుణులు ఆందోళన వ్యక్తం చేస్తున్నారు. చాలా మంది డెవలపర్లు భూమిని కొనుగోలు చేయడానికి ముందే ఇలాంటి ఆఫర్ల ద్వారా ప్రజల నుంచి డబ్బు వసూలు చేస్తున్నారు. అంటే సదరు డెవలపర్ వద్ద ప్రాజెక్ట్ పూర్తి చేసే ఆర్థిక శక్తి లేదని అర్థం. ఇలాంటి ప్రాజెక్టులు మధ్యలోనే ఆగిపోయే అవకాశం 90 శాతం ఉంటుంది. దీనివల్ల కొనుగోలుదారులు తమ కష్టార్జితాన్ని కోల్పోవడమే కాకుండా నగరం యొక్క రియల్ ఎస్టేట్ ప్రతిష్ట కూడా దెబ్బతింటుందని నేషనల్ అసోసియేషన్ ఆఫ్ రియల్టర్స్ ప్రతినిధులు హెచ్చరిస్తున్నారు.

కొనుగోలుదారులు తీసుకోవాల్సిన జాగ్రత్తలు

రియల్ ఎస్టేట్ రంగంలోని క్రెడాయ్ (CREDAI) వంటి సంస్థలు కూడా కొనుగోలుదారులను అప్రమత్తం చేస్తున్నాయి. తక్కువ ధర అని గుడ్డిగా నమ్మి పెట్టుబడి పెట్టవద్దని సూచిస్తున్నాయి. ఏదైనా ప్రాజెక్ట్‌ లో డబ్బు కట్టే ముందు ఈ క్రింది విషయాలను తప్పక గమనించాలి..
ఆ ప్రాజెక్టుకు TG-RERA రిజిస్ట్రేషన్ ఉందో లేదో అధికారిక వెబ్‌సైట్‌లో చెక్ చేసుకోవాలి.

• బిల్డర్ యొక్క గత ట్రాక్ రికార్డ్ ఎలా ఉందో పరిశీలించాలి.
• అన్ని రకాల ప్లాన్ అప్రూవల్స్, లేఅవుట్ అనుమతులు ఉన్నాయో లేదో స్వయంగా నిర్ధారించుకోవాలి.
• కేవలం వైట్ మనీ ట్రాన్సాక్షన్స్ మాత్రమే చేయాలి.

మొత్తంగా చెప్పేదేంటంటే.. హైదరాబాద్ రియల్ ఎస్టేట్ లో ఇన్వెస్ట్ చేయాలనుకునేవారు ఇలాంటి మోసాల పట్ల ఓ కన్నేసి ఉంచాలి. ఒక రూపాయి చెల్లించే ముందైనా పూర్తిస్థాయిలో విచారణ చేయడం మంచిది. లేదంటే లాభం వస్తుందనుకున్న ఆశ కాస్తా తీరని నష్టంగా మిగిలిపోయే ప్రమాదం ఉంది.