IDBI Bank: లాభాలతో దుమ్ముదులిపిన ఐడిబిఐ బ్యాంక్.. 64 శాతం పెరిగిన ప్రాఫిట్..

IDBI Bank: ప్రభుత్వ రంగంలోని బ్యాంకులు ఇటీవల ఊహించినదాని కంటే మంచి పనితీరును కనబరిచాయి. ప్రైవేటు బ్యాంకులకు తామేమీ తక్కువ కాదన్నట్లుగా మంచి పనితీరును కనబరుస్తూ ముందుకు సాగుతున్నాయి.

ఏప్రిల్ 29, 2023న విడుదలైన మార్చి త్రైమాసిక ఫలితాల్లో ఐడిబిఐ బ్యాంక్ ఊహించని ఫలితాలను నమోదు చేసింది. బ్యాంక్ స్టాండ్‌లోన్ నికర లాభంలో 64.1 శాతం పెరిగి రూ.1,133 కోట్లకు చేరుకుంది. గత ఏడాది ఇదే కాలంలో కంపెనీ నికర లాభం కేవలం రూ.691 కోట్లుగా ఉంది.

మార్చితో ముగిసిన త్రైమాసికంలో బ్యాంక్ నికర వడ్డీ ఆదాయం రూ.3,279.6 కోట్లుగా ఉంది. గత ఆర్థిక సంవత్సరం ఇదే కాలంలో బ్యాంక్ వడ్డీ ఆదాయం రూ.2,420.5 కోట్లుగా ఉంది. అంటే గత ఏడాదితో పోల్చితే ఆదాయం 35.3 శాతం పెరిగింది. ఇదే సమయంలో బ్యాంక్ క్యాపిటల్ అడిక్విటీ రేషియో మెరుగుపడి 20.44 శాతానికి చేరుకుంది. త్రైమాసిక ప్రాతిపధికన ప్రొవిజన్లు వరుసగా 26 శాతం పెరిగి రూ.983.63 కోట్లకు చేరుకున్నాయి.

ఇదే సమయంలో బ్యాంక్ నిరర్థక ఆస్తులు మెరుగుపడ్డాయి. డిసెంబర్ మాసంలో 13.82 శాతంగా ఉన్న ఎన్‌పీఏలు 6.38 శాతానికి తగ్గాయి. నికర ఎన్‌పీఏ త్రైమాసికం క్రితం 1.08 శాతం నుంచి 0.92 శాతానికి పడిపోయింది. రూ.10 ఫేస్ వ్యాల్యూ కలిగిన ఒక్కో షేరుపై బ్యాంక్ రూపాయి డివిడెండ్ చెల్లించాలని డైరెక్టర్ల బోర్డు నిర్ణయించింది. ఈ క్రమంలో శుక్రవారం ఎన్ఎస్ఈలో ఐడిబిఐ బ్యాంక్ షేర్ ధర రూ.54.55 వద్ద ముగిశాయి.