టాటా మెమోరియల్‌కు ICICI బ్యాంకు భారీ విరాళం.. విశాఖలోనూ విస్తరణకు ప్రణాళిక

ICICI: కార్పొరేట్ సోషల్ రెస్పాన్సిబిలిటీలో భాగంగా పలు కంపెనీలు తమ ఆదాయంలో కొంత భాగాన్ని సామాజిక కార్యక్రమాల కోసం వెచ్చించాల్సి ఉంటుంది. ఇందుకోసం ICICI బ్యాంకు చేసిన పని ఇప్పుడు వైరల్‌గా మారింది. ఆరోగ్య రంగంపై దృష్టి సారించిన ఈ ప్రైవేట్ బ్యాంకు ఏకంగా 1,200 కోట్లను టాటా మెమోరియల్ సెంటర్(TMC)కి విరాళంగా ఇచ్చి అందరినీ ఆశ్చర్యపరిచింది.

క్యాన్సర్ రోగులు ముంబై వరకు వెళ్లకుండా ఇళ్లకు చేరువలోనే చికిత్స పొందడంలో సహాయపడటానికి ఈ విరాళాన్ని వినియోగించనున్నట్లు టాటా మెమోరియల్ సెంటర్ (TMC) తెలిపింది. మరో రెండు రాష్ట్రాల్లో క్యాన్సర్ సంరక్షణ సౌకర్యాలను ఏర్పాటు చేయనున్నట్లు వెల్లడించింది. మహారాష్ట్రలో తమ యూనిట్‌ని విస్తరించడానికి కొంత మొత్తాన్ని ఉపయోగించనున్నట్లు చెప్పింది. 2027 నాటికి ఈ ప్రాజెక్టులు పూర్తి చేయాలని లక్ష్యంగా నిర్ణయించినట్లు ప్రకటించింది.

ఓ ప్రభుత్వ క్యాన్సర్ ఆసుపత్రికి అందిన అతిపెద్ద విరాళం ఇదే కావడం విశేషం. ICICI బ్యాంక్ ఛైర్మన్ గిరీష్ చంద్ర చతుర్వేది సమక్షంలో ICICI ఫౌండేషన్ అధ్యక్షులు సంజయ్ దత్తా ఈమేరకు MoUపై సంతకం చేశారు. నవీ ముంబైలో 460 కోట్లు, మల్లన్‌పూర్‌లో 350 కోట్లు, విశాఖపట్నంలో 390 కోట్లు చొప్పున వెచ్చించడానికి ప్రణాళిక సిద్ధం చేశారు.

"దేశంలో ప్రతి సంవత్సరం బయటపడుతున్న 13 లక్షల కొత్త క్యాన్సర్ కేసులలో 10 శాతం టాటా మెమోరియల్ ఆసుపత్రులలోనే చికిత్స పొందుతున్నారు. ICICI ఫౌండేషన్‌కు చాలా కృతజ్ఞతలు. అధునాతన క్యాన్సర్ కేర్‌ను ఇంటి దగ్గరే అందించడం చాలా కీలకం. తద్వారా ఈ ప్రాంతం నుంచి ఎక్కువ మంది ప్రజలు ప్రయోజనం పొందుతారు" అని డాక్టర్ బద్వే పేర్కొన్నారు.

"ICICI బ్యాంక్ తన CSR నిధుల నుంచి ఈ విరాళం అందజేసింది. నవీ ముంబైలోని TMC కేంద్రం, పంజాబ్‌లోని ముల్లన్‌పూర్ మరియు APలోని విశాఖపట్నంలలో 7.5 లక్షల చదరపు అడుగుల విస్తీర్ణంలో మూడు కొత్త భవనాలను ఏర్పాటు చేయడానికి ఈ మొత్తం వినియోగించబడుతుంది. వాటిలో అత్యాధునిక యంత్రాలను సైతం సిద్ధం చేస్తాం" అని ICICI బ్యాంక్ ఛైర్మన్ చతుర్వేది తెలిపారు.