బ్యాంకు ఉద్యోగులకు గుడ్‌న్యూస్: 2017 నుండి 15% శాలరీ పెంపు, ప్రోత్సాహకాలు ఎలా ఇస్తారు..

బ్యాంకు ఉద్యోగులకు గుడ్‌న్యూస్. వేతనం పెంపుకు బ్యాంకు యూనియన్లు, ఇండియన్ బ్యాంక్స్ అసోసియేషన్ (IBA) అంగీకారానికి వచ్చాయి. దీని ద్వారా 8.5 లక్షల మంది ఉద్యోగులు, అధికారులకు ప్రయోజనం కలగనుంది. దాదాపు మూడేళ్ల పాటు జరిగిన చర్చల అనంతరం బ్యాంకు ఉద్యోగుల యూనియన్లు, ఐబీఏ ఇప్పుడు ఒక అంగీకారానికి వచ్చాయి.

ఎంత పెంపుకు అంగీకారం

15 శాతం వార్షిక వేతనం పెంపుకు బ్యాంకు ఉద్యోగుల యూనియన్లు, ఐబీఏ ఒక అంగీకారానికి వచ్చాయి. దీంతో బ్యాంకులు అదనంగా రూ.7,900 కోట్లు ఇందుకు కేటాయించవలసి వస్తుంది. నవంబర్ 2019 నుండి అమల్లోకి వచ్చే ఈ వేతన పెంపుతో 8.5 లక్షల మంది ఉద్యోగులు, అధికారులకు ప్రయోజనం కలుగుతుంది. ఈ ఒప్పందం బుధవారం కుదిరింది.

పనితీరు ఆధారిత ప్రోత్సాహకం

తాజా ఒప్పందం ప్రకారం ప్రభుత్వరంగ బ్యాంకుల ఉద్యోగులకు పనితీరు ఆధారిత ప్రోత్సాహకాలు(పర్ఫార్మెన్స్ లింక్డ్ ఇన్సెంటివ్స్-PLI) కూడా అందిస్తారు. ఆయా బ్యాంకుల నికర లాభం లేదా నిర్వహణ లాభం ఆధారంగా దీనిని నిర్ణయిస్తారు. అంటే లాభాలు ఎక్కువగా ఉన్న బ్యాంకు ఉద్యోగులకు అదనపు వేతనం లభిస్తుంది. PLI ప్రస్తుత ఆర్థిక సంవత్సరం నుంచి ప్రభుత్వరంగ బ్యాంకులకు వర్తింపచేస్తారు. ప్రయివేటు, విదేశఈ బ్యాంకులకు సంబంధించి ఇది ఆప్షనల్. బ్యాంకు నిర్వహణ లాభం 5 శాతం కంటే తక్కువగా ఉంటే PLI ఇవ్వాల్సిన అవసరం లేదు. అలాగే, మూలధన వేతనం, డీఏలను కలుపుతున్నట్లు ఐబీఐ తెలిపింది.

2017 నవంబర్ నుండి... పెన్షన్ వాటా పెంపు

ప్రభుత్వ, ప్రయివేటు, విదేశీ బ్యాంకులు 35కు పైగా ఉన్నాయి. తమ ఉద్యోగుల వేతన పెంపు అంశంపై యూనియన్లతో చర్చలు జరపాలని ఐబీఏను కోరాయి. ఈ వేతనం పెంపు విషయంలో ఐబీఏ, యునైటెడ్ ఫోరమ్ ఆఫ్ బ్యాంకు యూనియన్స్ (UFBU) మధ్య అంగీకారం కుదిరింది. నవంబర్ 2017 నాటి వేతనంపై 15 శాతం లెక్కించి వార్షిక వేతన పెంపును అమలు చేస్తారు.

అలాగే, కొత్త పెన్షన్ పథకంకు (NPS) బ్యాంకులు ఇచ్చే వాటాను కూడా 10 శాతం నుండి 14 శాతానికి పెంచనున్నారు. ప్రభుత్వం ఆమోదం లభించాక ఇది అమలు అవుతుంది. ఫ్యామిలీ పెన్షన్ విషయంలో పరిమితిని తొలగించడంతో పాటు మూలవేతనంలో 30 శాతాన్ని ఇవ్వడానికి అంగీకారం కుదిరింది.

కీలక అంశాలు..

- వేతన సవరణ నవంబర్ 2017 నుండి 2022 వరకు

- అంతకుముందు సెటిల్మెంట్ రూ.4,725తో పోలిస్తే తాజా వేజ్ బిల్ పెంపు ప్రకారం రూ.7,898 కోట్లుగా ఉంది.

- బ్యాంకుల నిర్వహణ లాభం 5 శాతం కంటే తక్కువగా ఉంటే అదనపు వేతనం లేదా ప్రోత్సాహకం లభించదు.

- 5%-10% నిర్వహణ లాభం ఉంటే అదనపు వేతనం 5 రోజులకు, 10%-15% నిర్వహణ లాభం ఉంటే అదనపు వేతనం 10 రోజులకు, 15% శాతానికి పైగా ఉంటే 15 రోజుల అదనపు వేతనం లభిస్తుంది.

- NPS కాంట్రిబ్యూషన్ ప్రస్తుతం ఉన్న 10 శాతం నుండి 14 శాతానికి పెంపు.

- ఫ్యామిలీ పెన్షన్ విషయంలో ప్రస్తుతం ఉన్న రూ.9,000 పరిమితి తొలగింపు.