సంక్రాంతికి ఊరు వెళ్తున్నారా.. హైదరాబాద్–విజయవాడ హైవేపై ఈ రూట్లలో భారీగా ట్రాఫిక్..

తెలుగు రాష్ట్రాల్లో సంక్రాంతి సంబరాలు మొదలయ్యాయి. అందరూ తమ సొంత ఊళ్లకు బయలు దేరుతున్నారు. ఈ నేపథ్యంలోనే హైదరాబాద్ నగరం నుంచి ఏపీకి చాలామంది పండుగ జరుపుకోవడానికి వెళుతున్నారు. దీంతో నగరం దాదాపు చాలావరకు ఈ పండగ వేళ సగం ఖాళీ కానుంది. దేశంలోనే అత్యంత రద్దీగా ఉండే ప్రధాన రహదారుల్లో ఒకటైన హైదరాబాద్-విజయవాడ జాతీయ రహదారిపై సంక్రాంతి పండుగ నేపథ్యంలో భారీ ట్రాఫిక్ ఏర్పడే అవకాశం ఉందని ట్రాఫిక్ అధికారులు హెచ్చరిక జారీ చేశారు.

పండుగ సెలవుల కారణంగా హైదరాబాద్ నుంచి ఆంధ్రప్రదేశ్ వైపు వాహనాల రాకపోకలు గణనీయంగా పెరుగుతాయని, ఈ పరిస్థితుల్లో వాహనదారులు అత్యంత జాగ్రత్తగా ప్రయాణించాలని సూచించారు. ప్రస్తుతం జాతీయ రహదారి వెంబడి అనేక చోట్ల ఫ్లైఓవర్లు, అండర్‌పాస్‌లు, సర్వీస్ రోడ్ల నిర్మాణ పనులు కొనసాగుతున్నాయి. ఇవి సాధారణ రోజుల్లోనే ట్రాఫిక్‌కు ఆటంకం కలిగిస్తుండగా, పండుగ రద్దీ సమయంలో ప్రమాదాల ముప్పు మరింత పెరిగే అవకాశం ఉందని అధికారులు తెలిపారు. ముఖ్యంగా అండర్‌పాస్‌లు పూర్తికాకపోవడం, తాత్కాలిక మార్గాలు ఉండటం వల్ల వాహనాలు నెమ్మదిగా కదలాల్సిన పరిస్థితి ఏర్పడుతోంది.

ప్రతి ఏడాది సంక్రాంతి సమయంలో హైదరాబాద్ నుంచి ఆంధ్రప్రదేశ్‌కు వెళ్లే వాహనాల సంఖ్య భారీగా పెరుగుతుంది. ఈ ఏడాది జనవరి 10 రెండో శనివారం కావడంతో.. శుక్రవారం సాయంత్రం నుంచే ట్రాఫిక్ గణనీయంగా పెరుగుతుందని అధికారులు అంచనా వేస్తున్నారు. గత సంవత్సరం భోగి పండుగకు ముందు రోజున పంతంగి టోల్ ప్లాజా ద్వారా ఒక్కరోజులోనే 84,262 వాహనాలు ప్రయాణించాయి. పండుగకు ముందు మూడు రోజుల్లో మొత్తం ట్రాఫిక్ 2.07 లక్షల వాహనాలకు చేరింది. ఇది ఈ మార్గంలో పండుగ రద్దీ ఎంత తీవ్రమై ఉంటుందో స్పష్టంగా చూపిస్తోంది.

సాధారణ రోజుల్లో చౌటుప్పల్ బస్టాండ్ జంక్షన్ వద్ద రోజుకు సుమారు 37 వేల నుంచి 40 వేల వాహనాలు రాకపోకలు సాగిస్తుంటాయి. వారాంతాల్లో ఈ సంఖ్య 40 వేలు దాటుతుండటంతో తరచూ ట్రాఫిక్ జామ్‌లు ఏర్పడుతున్నాయి. దండుమల్కాపురం నుంచి ఆంధ్రప్రదేశ్‌లోని నందిగామ వరకు ఉన్న మార్గాన్ని పోలీసులు అత్యంత సున్నితమైన ప్రాంతంగా గుర్తించారు. ఈ సెక్షన్‌లో మొత్తం 17 నల్ల చుక్కలు (బ్లాక్ స్పాట్లు) ఉన్నట్లు తెలిపారు.

ప్రస్తుతం ఈ మార్గంలో ఒక ఫ్లైఓవర్, 13 అండర్‌పాస్‌లు, 10 ప్రదేశాల్లో సర్వీస్ రోడ్ల పనులు కొనసాగుతున్నాయి. హయత్‌నగర్, అబ్దుల్లాపూర్‌మెట్ ప్రాంతాల్లో ఆరు లైన్ల విస్తరణ పనులు నిలిచిపోవడంతో, పండుగ రద్దీని తగ్గించేందుకు తాత్కాలిక ఏర్పాట్లు చేస్తున్నారు. చౌటుప్పల్ పట్టణంలో ఆర్టీసీ బస్టాండ్, నారాయణపురం, వలిగొండ రోడ్డు జంక్షన్ల వద్ద అండర్‌పాస్‌లు లేకపోవడం వల్ల పాదచారులు రహదారి దాటేటప్పుడు అంతరాయాలు ఏర్పడుతున్నాయి. నల్గొండ జిల్లా పెద్దకపర్తి, చిట్యాల ప్రాంతాల్లో అసంపూర్తిగా ఉన్న అండర్‌పాస్‌లు traffic జామ్‌లకు కారణమవుతున్నాయి.

సూర్యాపేట జిల్లాలో టేకుమట్ల, ఎస్పీ కాలేజ్ జంక్షన్, కోదాడ బైపాస్, మేళ్లచెరువు ఫ్లైఓవర్ నుంచి ఆంధ్రప్రదేశ్ సరిహద్దు వరకు అనేక చోట్ల రోడ్డు పనులు కొనసాగుతున్నాయి. రద్దీని నియంత్రించేందుకు పోలీసులు ప్రత్యేక ట్రాఫిక్ మళ్లింపులను ప్రకటించారు. హైదరాబాద్ నుంచి గుంటూరు వెళ్లే వాహనాలను నార్కెట్‌పల్లి వద్ద నల్గొండ-మిర్యాలగూడ-పిడుగురాళ్ల మార్గంలో మళ్లిస్తారు. రాజమహేంద్రవరం, విశాఖపట్నం వైపు వెళ్లే వాహనాలను నకేర్కల్, అర్వపల్లి, ఖమ్మం మార్గంలో మళ్లిస్తారు.

పండుగ సమయంలో సూర్యాపేట జిల్లా పోలీసులు డ్రోన్ ఆధారిత నిఘాను ఏర్పాటు చేశారు. ట్రాఫిక్ నియంత్రణ కోసం క్రేన్లు, అంబులెన్స్‌లు, టోయింగ్ వాహనాలు సిద్ధంగా ఉంచారు. జిల్లా వ్యాప్తంగా 24 ప్రమాదకర బ్లాక్ స్పాట్ల వద్ద సీసీటీవీ కెమెరాలు, హెచ్చరిక బోర్డులు, వీధి దీపాలను ఏర్పాటు చేశారు. రోడ్డుపై ఓపికే ప్రాణాలను కాపాడుతుంది. వేగ పరిమితులు పాటించాలి, ట్రాఫిక్ నియమాలను గౌరవించాలి. అందరూ సురక్షితంగా సంక్రాంతి జరుపుకుని ఇంటికి చేరాలన్నదే మా లక్ష్యమని సూర్యాపేట ఎస్పీ కె. నరసింహ తెలిపారు.