హైదరాబాద్‌లో ట్రాఫిక్ సమస్యలకు చెక్.. ఈ ఏరియాల్లో రోడ్ల విస్తరణకు HMDA మాస్టర్ ప్లాన్..

హైదరాబాద్ నగరలో ట్రాఫిక్ గురించి చెప్పుకోవాల్సిన పని లేదు. బెంగళూరు నగరంతో పోటీపడుతూ ముందుకెళుతోంది. రద్దీ ఏరియాల్లో అయితే నరకమే. ఎప్పుడు ఇంటికి వెళతామో తెలియదు.. ఆఫీసుకు వెళ్లే సమయం వచ్చే సమయంలో రద్దీ చాలా ఎక్కువగా ఉంటుంది. కొంచెం వానపడితే చాలు ఇక నరకమేనని చెప్పుకోవచ్చు. నగరం రోజు రొజుకు ప్రగతి పథంలో దూసుకుపోతున్న నేపథ్యంలో జనాభా కూడా అంతే వేగంగా పెరుగుతున్నారు. దీంతో ట్రాఫిక్ చిక్కులు తప్పడం లేదు.

అయితే ఈ వాహనాల రద్దీకి అడ్డుకట్ట వేయడంతో పాటు ప్రయాణ సమయాన్ని తగ్గించడమే లక్ష్యంగా హైదరాబాద్ మెట్రోపాలిటన్ డెవలప్‌మెంట్ అథారిటీ (హెచ్‌ఎండిఏ) నగర వ్యాప్తంగా పలు కీలక మార్గాలలో రహదారుల విస్తరణ ప్రాజెక్టులను ప్రతిపాదించింది. నగరంలోని ప్రధాన నివాస ప్రాంతాలు, వాణిజ్య సముదాయాలు, ఐటీ హబ్‌లను అనుసంధానించే అత్యంత రద్దీ కలిగిన రోడ్లను ఎంపిక చేసి, వాటి వెడల్పును పెంచడం ద్వారా వాహనాల సులభతర రాకపోకలకు బాటలు వేయాలని అథారిటీ భావిస్తోంది.

ఈ ప్రతిపాదనలలో అత్యంత కీలకమైనది పీవీఎన్ఆర్ ఎక్స్‌ప్రెస్‌వే కింద పిల్లర్ నంబర్ 117 నుండి ఆరామ్‌ఘర్ క్రాస్‌రోడ్స్ వరకు ఉన్న రహదారి విస్తరణ. రాజీవ్ గాంధీ అంతర్జాతీయ విమానాశ్రయానికి వెళ్లే ప్రయాణికులకు అత్యంత ప్రధానమైన ఈ మార్గంలో ప్రస్తుతం ఉన్న 45 మీటర్ల రహదారిని ఏకంగా 60 మీటర్లకు పెంచాలని ప్రణాళిక రూపొందించారు. అదేవిధంగా ఐటీ, వ్యాపార కారిడార్లలో ట్రాఫిక్ చిక్కులను తొలగించేందుకు హైటెక్ సిటీ జంక్షన్ నుండి మాదాపూర్ రోడ్డును 36 మీటర్లకు, జీవీకే మాల్ జంక్షన్ నుండి కేబీఆర్ పార్క్ రోడ్డును 24 మీటర్లకు విస్తరించాలని హెచ్‌ఎండిఏ నిర్ణయించింది.

Also Read

రాయలసీమ మీదుగా బుల్లెట్ ట్రైన్.. హైదరాబాద్–బెంగళూరు బుల్లెట్ ట్రైన్‌కు కొత్త రూట్ ప్రతిపాదించిన ఏపీ ప్రభుత్వం

కేవలం వెస్ట్ జోన్ లేదా ఐటీ కారిడార్లకే పరిమితం కాకుండా.. నగరంలోని ఉత్తర, మధ్య, పారిశ్రామిక ప్రాంతాలలో కూడా ఈ రోడ్డు విస్తరణ ప్రాజెక్టులు విస్తరించి ఉన్నాయి. నేరేడ్‌మెట్ క్రాస్‌రోడ్స్, హిమాయత్‌నగర్ సర్కిల్ సమీపంలోని రహదారులను 30 మీటర్ల వరకు పెంచేందుకు ప్రతిపాదించగా.. సుందరయ్య పార్క్ రోడ్డు, విజయ్‌నగర్ కాలనీ రోడ్డు, నల్లకుంట కూరగాయల మార్కెట్ రోడ్డు, ఎన్‌హెచ్44-అల్వాల్ సర్కిల్ మార్గం, జీడిమెట్ల పైప్‌లైన్ రోడ్డు నుండి నర్సాపూర్ రోడ్డు వరకు ఉన్న కారిడార్లను 24 మీటర్ల చొప్పున వెడల్పు చేయనున్నారు. ఈ పారిశ్రామిక, నివాస ప్రాంతాల విస్తరణ వల్ల స్థానిక వ్యాపారాలు, ప్రయాణికులకు గొప్ప ఊరట లభిస్తుంది.

హైదరాబాద్ నగరంలో రోజురోజుకూ పెరుగుతున్న నివాస సముదాయాలు, వ్యాపార సంస్థల కారణంగా మౌలిక సదుపాయాల మెరుగుదల తక్షణ అవసరంగా మారింది. అయితే, హెచ్‌ఎండిఏ ఈ ప్రాధాన్యతా మార్గాలను ప్రాథమికంగా గుర్తించినప్పటికీ.. భూసేకరణ ప్రక్రియ, నిర్మాణ దశల కాలపరిమితి, బడ్జెట్ కేటాయింపులు, పనులు ప్రారంభమయ్యే తేదీల వివరాలను ఇంకా అధికారికంగా వెల్లడించాల్సి ఉంది. ఈ రోడ్డు విస్తరణ పనులు పూర్తయిన పక్షంలో హైదరాబాద్ పట్టణ రవాణా వ్యవస్థలో విప్లవాత్మక మార్పులు వచ్చి.. నగరవాసులకు ట్రాఫిక్ రహిత సులభతర ప్రయాణం అందుబాటులోకి వస్తుందని భావిస్తున్నారు.

ముగింపు: హైదరాబాద్‌లో పెరుగుతున్న ట్రాఫిక్ సమస్యలకు పరిష్కారం చూపే దిశగా HMDA కీలక రహదారుల విస్తరణ ప్రణాళికను సిద్ధం చేస్తోంది. PVNR ఎక్స్‌ప్రెస్‌వే పరిసరాలు, హైటెక్ సిటీ, KBR పార్క్‌తో పాటు మరికొన్ని రద్దీ ప్రాంతాల్లో రోడ్లను విస్తరించడం, ట్రాఫిక్ ప్రవాహాన్ని మెరుగుపరచడం లక్ష్యంగా ఈ చర్యలు చేపట్టనున్నట్లు సమాచారం. ఈ ప్రాజెక్టులు అమలైతే ప్రయాణ సమయం తగ్గడంతో పాటు ఐటీ కారిడార్‌లో రాకపోకలు మరింత సులభమయ్యే అవకాశం ఉంది.