Hyderabad: సిటీలో అతిపెద్ద డబుల్ డెక్కర్ ఫ్లైఓవర్.. ఇక ఆ రూట్లో ట్రాఫిక్ కష్టాలుండవ్!

హైదరాబాద్ (Hyderabad) నగరవాసులకు ముఖ్యంగా తూర్పు ప్రాంతంలో నివసించే వారికి తెలంగాణ ప్రభుత్వం తీపి కబురు అందించింది. నగరంలో అత్యంత రద్దీగా ఉండే ఎల్బీ నగర్ (LB Nagar) నుండి హయత్ నగర్ (Hayat nagar) వరకు రూ. 941 కోట్లతో భారీ డబుల్ డెక్కర్ ఎలివేటెడ్ కారిడార్‌ ను నిర్మించనున్నట్లు రాష్ట్ర రోడ్లు, భవనాల శాఖ మంత్రి కోమటిరెడ్డి వెంకట్ రెడ్డి అసెంబ్లీలో ప్రకటించారు. ఈ ప్రాజెక్టు అందుబాటులోకి వస్తే దాదాపు 70 కాలనీలకు చెందిన 12 లక్షల మంది ప్రజలకు ట్రాఫిక్ కష్టాల నుండి విముక్తి కలగనుంది.

ఈ ప్రతిష్టాత్మక ప్రాజెక్టుకు కేంద్ర, రాష్ట్ర ప్రభుత్వాలు ఉమ్మడిగా నిధులు సమకూరుస్తున్నాయి. మొత్తం రూ. 941 కోట్లలో కేంద్రం వాటా రూ. 741 కోట్లు కాగా రాష్ట్ర ప్రభుత్వం రూ. 200 కోట్లు కేటాయించనుంది. ఇప్పటికే కేంద్ర ప్రభుత్వం నుండి ఈ ప్రతిపాదనకు ఆమోదం లభించింది. రాబోయే ఆరు నెలల్లోనే టెండర్ల ప్రక్రియ ప్రారంభం కానుంది. కేవలం ఎల్బీ నగర్ మాత్రమే కాకుండా పుణే-హైదరాబాద్ కారిడార్‌లో ట్రాఫిక్ తగ్గించేందుకు మదీనగూడ నుండి బీహెచ్‌ఈఎల్ (BHEL) వరకు 1.2 కిలోమీటర్ల పొడవైన మరో డబుల్ డెక్కర్ ఫ్లైఓవర్‌ను కూడా నిర్మించనున్నారు.

మన్ననూర్ నుండి శ్రీశైలం వరకు ఎలివేటెడ్ కారిడార్

శ్రీశైలం వెళ్లే భక్తుల కోసం రూ. 7,600 కోట్లతో ఒక భారీ ఎలివేటెడ్ కారిడార్‌ను ప్రభుత్వం ప్లాన్ చేస్తోంది. తుక్కుగూడ నుండి మన్ననూర్ వరకు ఇప్పటికే ఆరు వరుసల రహదారి అభివృద్ధి చెందింది. ఇప్పుడు మన్ననూర్ నుండి శ్రీశైలం వరకు సుమారు 52 కిలోమీటర్ల పొడవైన ఎలివేటెడ్ స్ట్రెచ్ కోసం డీపీఆర్ (DPR) సిద్ధమైంది. అటవీ ప్రాంతం గుండా సాగే ఈ రహదారి వల్ల ప్రయాణ సమయం తగ్గడమే కాకుండా వన్యప్రాణులకు కూడా ఎటువంటి ఇబ్బంది కలగకుండా నిర్మాణం చేపట్టనున్నారు.

రాష్ట్రవ్యాప్తంగా భారీ రోడ్డు అభివృద్ధి పనులు

హైబ్రిడ్ యాన్యుటీ మోడల్ (HAM) కింద తెలంగాణ ప్రభుత్వం రూ. 20,000 కోట్ల విలువైన రహదారి అభివృద్ధి పనులను చేపట్టింది. రాష్ట్రవ్యాప్తంగా 6,092 కిలోమీటర్ల మేర రహదారుల నిర్మాణానికి టెండర్లు జారీ చేశారు. ఇందులో భాగంగా 34 ప్యాకేజీలలో 441 పనులను గుర్తించారు. ప్రస్తుతం టెండర్ల మూల్యాంకన ప్రక్రియ వేగంగా జరుగుతోందని, వారం రోజుల్లో మిగిలిన ప్యాకేజీల ప్రక్రియ కూడా పూర్తవుతుందని మంత్రి వెల్లడించారు.

అభివృద్ధి పథంలో భాగ్యనగరం హైదరాబాద్

హైదరాబాద్ (Hyderabad) నగరం శరవేగంగా విస్తరిస్తున్న క్రమంలో ఇలాంటి మౌలిక సదుపాయాల కల్పన ఎంతో అవసరం. డబుల్ డెక్కర్ కారిడార్లు రావడం వల్ల భూసేకరణ భారం తగ్గడమే కాకుండా ఒకే మార్గంలో మెట్రో, వాహనాల రాకపోకలకు వీలు కలుగుతుంది. ఎల్బీ నగర్ - హయత్ నగర్ కారిడార్ పూర్తయితే విజయవాడ హైవే వైపు వెళ్లే ప్రయాణికులకు కూడా పెద్ద ఊరట లభిస్తుంది. రాబోయే రెండేళ్లలో ఈ ప్రాజెక్టులు పూర్తిస్థాయిలో అందుబాటులోకి వస్తే హైదరాబాద్ ట్రాఫిక్ సమస్యలు చాలా వరకు తగ్గినట్టే.